អន្តរជាតិ
នយោបាយអន្តរជាតិ
ដោយ: តន ចាន់រិទ្ធារ៉ា
ខេត្តយូណាន៖ កិច្ចប្រជុំរដ្ឋមន្ត្រីការបរទេសនៃកិច្ចសហប្រតិបត្តិការឡានឆាង-មេគង្គ លើកទី៣ ចាប់ផ្ដើមនៅថ្ងៃទី១៥ ខែធ្នូ នៅឯទីក្រុងតាលី ខេត្តយូណាន ប្រទេសចិន។ ប្រមុខការទូតនៃប្រទេសទាំង៦ តាមបណ្ដោយទន្លេមេគង្គ គឺចិន មីយ៉ាន់ម៉ា ថៃ ឡាវ កម្ពុជា និងវៀតណាម នឹងពិភាក្សាលើការរបាយការណ៍លទ្ធផលកន្លងមក និងជជែកលើផែនការនៃកិច្ចសហប្រតិបត្តិការសម្រាប់រយៈពេល ៥ឆ្នាំបន្ទាប់ទៀត។
រដ្ឋមន្ត្រីការបរទេសចិន វ៉ាង យី និងសមភាគីកម្ពុជា ប្រាក់ សុខុន នឹងធ្វើជាសហប្រធានដឹកនាំកិច្ចប្រជុំថ្នាក់រដ្ឋមន្ត្រីការបរទេសនៃកិច្ចសហប្រតិបត្តិការឡានឆាង-មេគង្គ លើកទីបី។ កិច្ចប្រជុំនេះ នឹងផ្តល់នូវកាលានុវត្តភាពល្អ ក្នុងការលើកកម្ពស់ និងពង្រីកបន្ថែមទៀតកិច្ចសហប្រតិបត្តិការ និងមិត្តភាពដែលមានស្រាប់នៅក្នុងក្របខណ្ឌឡានឆាង-មេគង្គ និងការពិភាក្សាពីការត្រៀមរៀបចំ កិច្ចប្រជុំកំពូលឡានឆាង-មេគង្គលើកទីពីរ ដែលធ្វើនៅកម្ពុជា នាដើមឆ្នាំ២០១៨។
កិច្ចសហប្រតិបត្តិការឡានឆាង-មេគង្គ (LMC) ជាយន្តការអនុតំបន់ថ្មីមួយ ដែលកើតជារូបរាង ក្នុង ឆ្នាំ ២០១៥ ។ ជាយន្តការថ្មីជាងគេ គំនិតផ្ដួចផ្ដើមរបស់ចិនមួយនេះ ត្រូវគេសង្ស័យថា ជាការប្រកួតប្រជែងជាមួយយន្តការសហប្រតិបត្តិការមួយចំនួនដែលផ្ដើមគំនិតដោយជប៉ុន និងឥណ្ឌា។ ប៉ុន្តែមន្ត្រីជាន់ខ្ពស់ចិនអះអាងថា យន្តការរបស់ចិន មិនមានគោលដៅជំនួសនរណាឡើយ តែជាការបំពេញបន្ថែមប៉ុណ្ណោះ។
ក្នុងជាម្ចាស់ផ្ទះ និងជាសហប្រធានកិច្ចប្រជុំលើកទីបី ចិនរំពឹងថា យន្តការ LMC នឹងកាន់តែត្រូវបានពង្រឹងពង្រីកថែមទៀត។ លោក Huang Xilian អគ្គនាយករងនាយកដ្ឋានកិច្ចការអាស៊ីនៃក្រសួងការបរទេសចិន បាននិយាយថា LMC បានដើរសំខាន់ក្នុងការជំរុញកិច្ចសហប្រតិបត្តិការអនុតំបន់ផ្សេងទៀត ព្រោះ សមាជិក LMC មានសេដ្ឋកិច្ចរីកចម្រើនខ្លាំង និងកំពុងក្លាយជាតំបន់សេដ្ឋកិច្ចងើបឡើងថ្មីផងដែរ។
មន្ត្រីចិនដដែលនេះបានប្រាប់អ្នកសារព័ត៌មានមុនកិច្ចប្រជុំរដ្ឋមន្ត្រីការបរទេស ថា ជំនួបនេះលើកធ្វើឡើងក្នុងដំណាក់កាលសំខាន់បំផុតនៃ LMC ហើយនឹងមានការវាយតម្លៃលើការឈានទៅមុខនៃកិច្ចសហប្រតិបត្តិការក្នុងតំបន់ផង ខណៈនៅឆ្នាំក្រោយ កិច្ចប្រជុំមេដឹកនាំប្រទេស LMC នឹងរៀបចំនៅកម្ពុជា។ សម្រាប់កិច្ចប្រជុំឆ្នាំ២០១៧ ភាគីចិនសង្ឃឹមថា យន្តការអនុតំបន់មេគង្គមួយនេះ នឹងកាន់រឹងមាំឡើងទៀត។
ដោយពឹងផ្អែកលើបទពិសោធពីរឆ្នាំក្រោយការកកើតក្នុងឆ្នាំ២០១៥ ក្រុងប៉េកាំងមានជំនឿថា នៅថ្ងៃអនាគត LMC នឹងមានតួនាទីកាន់តែសំខាន់ក្នុងការដោះស្រាយបញ្ហាប្រឈមនានា។ កិច្ចប្រជុំរដ្ឋមន្ត្រីការបរទេសលើកទីបីនេះ នឹងវែកផ្លូវដល់កិច្ចសហប្រតិបត្តិការនៅពេលខាងមុខ ដោយមិនត្រឹមសម្រេចគោលដៅសម្រាប់ប្រទេសទាំង៥ឡើយ តែក៏អាចសម្រេចបានគោលដៅអភិវឌ្ឍដោយចីរភាពផង។ នេះជាការបញ្ជាក់របស់លោក Huang Xilian ៕
Tag:
ចិន
3thLMC
© រក្សាសិទ្ធិដោយ thmeythmey.com
