អន្តរជាតិ
ផ្លូវដែកគុនមីង-សិង្ហបុរី៖ កំណាត់ផ្លូវនៅចិននឹងរួចរាល់នៅ៨ឆ្នាំទៀត ឯកំណាត់ផ្សេងមិនទាន់ច្បាស់ លោក Yu Zhongmin ប្រធានក្រុមហ៊ុនផ្លូវដែកចិនអន្តរជាតិ
× ខ្សែរថភ្លើងអន្តរអាស៊ី ដែលភ្ជាប់ពីទីក្រុងគុនមីង ខេត្តយូណាន ប្រទេសចិន ទៅកាន់សិង្ហបុរី នឹងមិនទាន់អាចលេចជារូបរាងក្នុងពេលឆាប់ៗនេះឡើយ។ កំណាត់ខ្លះនៃគម្រោងខ្សែរថភ្លើងស្ថិតក្នុងដំណាក់កាលសាងសង់ កំណាត់ខ្លះកំពុងក្រោមការសិក្សា និងខ្លះទៀតស្ថិតក្នុងគម្រោងនៅឡើយ។ ចិននឹងបញ្ចប់ការសាងសង់កំណាត់ផ្លូវរថភ្លើងក្នុងទឹកដីរបស់ខ្លួននៅ៨ឆ្នាំខាងមុខ ប៉ុន្តែកំណាត់ឯទៀតនៅប្រទេសផ្សេងមិនទាន់កំណត់ពេលជាក់លាក់នៅឡើយ។
ខ្សែរថភ្លើងអន្តរអាស៊ី គុនមីង-សិង្ហបុរី ត្រូវបែងចែកជាបីខ្នែង។ ខ្នែងខាងកើត ភ្ជាប់ពីទីក្រុងគុនមីង ឆ្លងកាត់វៀតណាម កម្ពុជា ថៃ ម៉ាឡេស៊ី និងសិង្ហបុរី។ នៅខ្នែងកណ្ដាល ខ្សែរថភ្លើងរត់ពីចិន ឆ្លងកាត់ឡាវ ថៃ ម៉ាឡេស៊ី និងសិង្ហបុរី។ ឯខ្នែងខាងលិច គឺជាភ្ជាប់ពីចិន ទៅមីយ៉ាន់ម៉ា ថៃ ម៉ាឡេស៊ី និងសិង្ហបុរី។ គម្រោងខ្សែរថភ្លើងមួយនេះ នឹងជួយជំរុញការដឹកជញ្ជូនទំនិញគ្រប់ប្រភេទ និងសម្រួលការធ្វើដំណើររបស់ប្រជាជនផងដែរ។
យ៉ាងណាមិញ គម្រោងតភ្ជាប់បណ្ដាញផ្លូវដែកនេះ មិនអាចបញ្ចប់ក្នុងពេលឆាប់នេះឡើយ ដ្បិតកំណាត់ផ្លូវជាច្រើនមិនទាន់លេចជារូបរាងនៅឡើយ ជាពិសេសនៅតាមប្រទេសសមាជិកអាស៊ាន។ ចំណែកឯកំណាត់ផ្លូវរថភ្លើងនៅលើទឹកដីចិន នឹងបញ្ចប់ការសាងសង់នៅ៥ ទៅ៨ឆ្នាំទៀត។ នេះបើតាមការលើកឡើងរបស់លោក Yang Zhongmin ប្រធានក្រុមហ៊ុនផ្លូវដែកចិនអន្តរជាតិ (China Railway International) ដែលជាផ្នែកមួយនៃក្រុមហ៊ុនផ្លូវដែករដ្ឋចិន។
ចំពោះមុខអ្នកសារព័ត៌មានជាច្រើនមកពីប្រទេសតាមដងទន្លេមេគង្គទាំង៥ លោក Yang និយាយនៅថ្ងៃទី១៩ ខែធ្នូ ថា ចិនបានឆ្លើយតបយ៉ាងសកម្មទៅនឹងគម្រោងផ្លូវដែកនេះ ដោយបានពន្លឿនការសាងសង់ផ្លូវរថភ្លើងក្នុងទឹកដីខ្លួនយ៉ាងខ្លាំង។ នៅខ្នែងខាងកើត ផ្លូវរថភ្លើងមានរួចស្រេចហើយ ឯគម្រោងនៅខ្នែងកណ្ដាលនឹងបញ្ចប់ការសាងសង់ក្នុងឆ្នាំ២០២០ ខណៈគម្រោងសាងសង់នៅខ្នែងខាងលិចជួបបញ្ហាបន្តិច តែអាចបញ្ចប់នៅឆ្នាំ២០២៥ ។
លោក Yang និយាយថា បញ្ហារាំងស្ទះ មិនមែននៅលើទឹកដីចិនឡើយ តែជាគម្រោងនៅប្រទេសផ្សេង ដែលចិនមិនអាចសម្រេចអ្វីបានទេ។ សម្រាប់ខ្នែងខាងកើត ចន្លោះសម្រាប់តភ្ជាប់កើតមាននៅត្រង់កម្ពុជា ដែលមិនទាន់ផ្លូវរថភ្លើងភ្ជាប់ទៅវៀតណាម និងស្ថិតក្នុងដំណាក់កាលសិក្សា ឯនៅខ្នែងខាងលិច មានចន្លោះត្រង់មីយ៉ាន់ម៉ា ហើយខ្នែងកណ្ដាលត្រង់ថៃ ដែលកំពុងស្ថិតក្នុងគម្រោងនៅឡើយ។ ដោយឡែក ម៉ាឡេស៊ី និងសិង្ហបុរី ក៏ទើបចាប់ផ្ដើមការសាងសង់ដែរ។
មន្ត្រីក្រុមហ៊ុនផ្លូវដែកចិនដដែលនេះបញ្ជាក់ថា ប្រទេសផ្សេងក្រៅពីចិន មានគម្រោងអាទិភាពរៀងៗខ្លួន ហើយមានបញ្ហាប្រឈមមុខច្រើនដូចជាការស្វែងរកប្រភពហិរញ្ញវត្ថុ បច្ចេកទេស និងផែនការអភិវឌ្ឍប្រទេសជាដើម។ ប៉ុន្តែ ចិនមានឆន្ទះជួយសហការដើម្បីឲ្យគម្រោងផ្លូវរថភ្លើងនេះលេចជារូបរាងដើម្បីផលប្រយោជន៍ប្រជាជនទាំងអស់ ការពង្រឹងកិច្ចសហប្រតិបត្តិការតំបន់ ក៏ដូចជាជំរុញការអភិវឌ្ឍផងដែរ៕
© រក្សាសិទ្ធិដោយ thmeythmey.com