លោកយាយ ស៊ិន សាម៉ាដឹកឆូ អតីតគ្រូល្ខោនខោល និងចម្រៀង ទទួលមរណភាព

ជាតិ

សិល្បះ

លោកយាយ ស៊ិន សាម៉ាដឹកឆូ អតីតគ្រូល្ខោនខោល និងចម្រៀង ទទួលមរណភាព

22, Dec 2017 , 6:19 pm

រូបភាព

ដោយ: ខន ចំប៉ា

លោកយាយ ស៊ិន សាម៉ាដឹកឆូ អតីតអ្នកគ្រូផ្នែកចម្រៀង និងល្ខោនខោល បានទទួលមរណភាព នៅម៉ោង១១ព្រឹក ថ្ងៃទី២២ ខែធ្នូនេះ ក្នុងអាយុ៧៧ឆ្នាំ ដោយសារមានជំងឺប្រចាំកាយ។ សពលោកយាយ ត្រូវបានបូជា នៅល្ងាចថ្ងៃទី២២ ខែធ្នូដដែលនេះ នៅវត្តទួលអស់លោក ស្ថិតនៅឃុំគីឡូម៉ែត្រលេខ៦ ក្នុងខណ្ឌឫស្សីកែវ។

លោក ចំរើន វ៉ាន់ថា ទីប្រឹក្សាអមក្រសួងវប្បធម៌ និងវិចិត្រសិល្បៈ ដែលជាតំណាងចូលរួមពិធីបុណ្យសព បានប្រាប់សារព័ត៌មានថ្មីៗតាមទូរសព្ទថា មរណភាពរបស់លោកយាយដឹកឆូ គឺជាការបាត់បង់ធនធានមនុស្សដ៏មានតម្លៃរបស់ខ្មែរ ក្នុងផ្នែកចម្រៀង និងល្ខោនខោល។ លោក ចំរើន វ៉ាន់ថា បញ្ជាក់បន្ថែមដូច្នេះ៖«យើងពិតជាសោកស្តាយណាស់! គាត់ជាអ្នកមានចំណេះជំនាញមួយរូបក្នុងវិស័យសិល្បៈ វប្បធម៌។ ក្រសួង នឹងដើម្បីចាត់ចែងរៀបចំបុណ្យ ឲ្យស័ក្តិសមនឹងកិត្តិយសរបស់គាត់»។

តាមលោក វ៉ាន់ថា ក្រសួងវប្បធម៌ ជាអ្នករ៉ាប់រងការចំណាយចាប់ពីពេលលោកយាយ ទទួលមរណភាព ដល់ពេលបូជា។

លោកយាយ ស៊ិន សាម៉ាដឹកឆូ ជាអតីតគ្រូធំបង្ហាត់របាំនៅសាកលវិទ្យាល័យ ភូមិន្ទវិចិត្រសិល្បៈ និងធ្លាប់ជាដៃគូចម្រៀងមហោរី និងល្ខោនហ្លួង ឬរបាំបុរាណ ឬរបាំព្រះរាជទ្រព្យ ដែលមានប្រគំតែនៅព្រះបរមរាជវាំងប៉ុណ្ណោះក្នុងសម័យសង្គមរាស្ត្រនិយម ជាមួយលោក ស៊ីន ស៊ីសាមុតទៀតផង៕