អន្តរជាតិ
UN ដាក់ទណ្ឌកម្មថ្មីទៀតលើកូរ៉េខាងជើង ក្រោយបាញ់មីស៊ីលខែមុន ក្រុមប្រឹក្សាសន្តិសុខអនុម័តទណ្ឌកម្មថ្មីលើកូរ៉េខាងជើង (រូបភាព៖ Xinhua)
× ក្រុមប្រឹក្សាសន្តិសុខអង្គការសហប្រជាជាតិបានអនុម័តទណ្ឌកម្មថ្មីលើកូរ៉េខាងជើង ដែលបានបាញ់មីស៊ីលមួយគ្រាប់កាលពីខែមុន។ ទណ្ឌកម្មលើកនេះមានគោលដៅរឹតត្បិតការនាំចូលប្រេងចម្រាញ់រួចស្រេច និងការកាត់បន្ថយប្រាក់ចំណូលរបស់កូរ៉េខាងជើង។ អាមេរិក ជាអ្នករៀបរៀងទណកម្មនេះដើម្បីបង្ខំឲ្យកូរ៉េខាងជើងបញ្ឈប់កម្មវិធីនុយក្លេអ៊ែររបស់ខ្លួន និងងាកចូលតុចរចាជាមួយអន្តរជាតិឡើងវិញ។
ដោយសំឡេង១៥-០ ក្រុមប្រឹក្សាសន្តិសុខអង្គការសហប្រជាជាតិ នៅថ្ងៃទី២២ ខែធ្នូ បានសម្រេចជាឯកច្ឆន្ទលើទណ្ឌកម្មថ្មីទៀតលើកូរ៉េខាងជើង ក្រោយការបាញ់មីស៊ីលចម្ងាយឆ្ងាយកាលពីចុងខែវិច្ឆិកា។ ទណ្ឌកម្មថ្មីនេះតាក់តែងដោយអាមេរិក ដោយមានគោលដៅហាមប្រាមកូរ៉េខាងជើងពីការសាកល្បងមីស៊ីល ឬក៏គ្រាប់នុយក្លេអ៊ែរទៀត។ ការនាំចូលប្រេង និងការកាត់បន្ថយប្រាក់ចំណូលរបស់កូរ៉េខាងជើង ជាផ្ទាំងស៊ីបធំសម្រាប់វិធានការលើកនេះ។
ក្រោមទណ្ឌកម្មថ្មីនេះ កូរ៉េខាងជើងនឹងមិនអាចនាំចូលប្រេងចម្រាញ់ប្រហែលប្រាំសែនបារ៉ែលក្នុងមួយឆ្នាំ ដែលស្មើនឹងជិត៩០ភាគរយនៃបរិមាណនាំចូលសរុប។ ជាមួយគ្នានោះ ការផ្គត់ផ្គង់ប្រេងឆៅទៅកាន់កូរ៉េខាងជើងក៏ត្រូវកាត់បន្ថយនៅត្រឹមបួនលានបារ៉ែលក្នុងមួយឆ្នាំដែរ ហើយការកាត់បន្ថយអាចនឹងកើនឡើងទៀត បើកូរ៉េខាងជើងនៅតែបន្តផ្គើនដោយការបាញ់មីស៊ីល ឬសាកល្បងនុយក្លេអ៊ែរលើកក្រោយៗទៀត។
ក្នុងន័យកាត់បន្ថយប្រភពហិរញ្ញវត្ថុរបស់កូរ៉េខាងជើង សេចក្ដីសម្រេចរបស់ក្រុមប្រឹក្សាសន្តិសុខក៏បានបញ្ជាឲ្យជនជាតិកូរ៉េខាងជើងទាំងអស់ ដែលជាកំពុងធ្វើការនៅបរទេស ត្រូវត្រឡប់ចូលស្រុកវិញនៅរយៈពេល២៤ខែទៀត គិតចាប់ពីថ្ងៃអនុម័តសេចក្ដីសម្រេចនេះ។ តាមពិតទៅ សេចក្ដីព្រាងដំបូងបានកំណត់ពេល១២ខែឲ្យពលករកូរ៉េខាងជើង ដែលជាប្រភពចំណូលដ៏ធំមួយនៃរបបក្រុងព្យុងយ៉ាងត្រឡប់ទៅប្រទេសវិញ តែក្រោយមកក៏ត្រូវពន្យារដល់២៤ខែវិញ។
យោងតាមទីភ្នាក់ងារព័ត៌មាន Xinhua ក្រុងព្យុងយ៉ាងក៏ត្រូវបានហាមឃាត់នាំចេញផលិតផលជាច្រើនមុខដូចជាផលិតផលកសិកម្ម គ្រឿងម៉ាស៊ីន បរិក្ខារអេឡិចត្រូនិច និងឈើជាដើម។ ក្រៅពីមិនអាចនាំចេញ កូរ៉េខាងជើងក៏មិនអាចនាំចូលសម្ភារច្រើនទៀតបន្ថែមពីលើការកាត់បន្ថយបរិមាណប្រេងឆៅ និងប្រេងចម្រាញ់រួចស្រេចរួមមានគ្រឿងបរិក្ខារសម្រាប់ឧស្សាហកម្ម រថយន្តដឹកជញ្ជូន ដែក និងផលិតផលលោហៈឯទៀត។
សមាជិកក្រុមប្រឹក្សាសន្តិសុខទាំងអស់បានបង្ហាញការប្ដេជ្ញាចិត្តក្នុងការអនុវត្តសេចក្ដីសម្រេចកលើនេះ និងចាត់ទុកជាចំណាត់ដែលត្រូវដាក់ចេញដើម្បីចាប់បង្ខំឲ្យកូរ៉េខាងជើងដើរលើកផ្លូវត្រូវវិញ។ តំណាងអាមេរិកលោកស្រី Nikki Haley និយាយថា ទណ្ឌកម្មនេះជាសារផ្ញើទៅកាន់កូរ៉េខាងជើង បើហ៊ានបំពានកាន់តែខ្លាំង នឹងរងទណ្ឌកម្មកាន់តែខ្លាំង។ ចំណែកតំណាងចិនវិញក៏រំឭកកូរ៉េខាងជើងពីការទាមទាររបស់អន្តរជាតិដែលចង់បញ្ចប់បញ្ហានុយក្លេអ៊ែរដោយសន្តិវិធីដែរ៕
Tag:
UN
កូរ៉េខាងជើង
អាមេរិក
© រក្សាសិទ្ធិដោយ thmeythmey.com