ជាតិ
ដីកាសម្រេចឲ្យប្រហារជីវិតមាន់ជល់៩២ក្បាលនៅខេត្តកណ្តាល រូបតំណាង
× ភ្នំពេញ៖ មាន់៩២ក្បាលត្រូវបានប្រើប្រាស់ដើម្បីរកលុយនៅសង្វៀនបញ្ជល់មួយក្នុងខេត្តកណ្តាល ហើយបន្ទាប់ពីម្ចាស់ពួកវាមានបញ្ហា មាន់ដែលលែងមានប្រយោជន៍សម្រាប់ល្បែងភ្នាល់ទាំងនេះ ត្រូវបានសមត្ថកិច្ចកម្ចេចចោល តាមអំណាចនៃដីកាសម្រចមួយរបស់តុលាការខេត្តកណ្តាល កាលពីថ្ងៃទី១៩ ខែធ្នូ។
«ជីវិតមាន់ជល់» ៩២ក្បាល ត្រូវបានសមត្ថកិច្ចខេត្តកណ្ដាល សម្លាប់ក្រោមហេតុផលថា បង្ការកុំឲ្យមានបទល្មើសជាថ្មី។ តាមរយៈដីកាសម្រេច របស់សាលាដំបូងខេត្តកណ្ដាល បានបញ្ជាក់មូលហេតុដូច្នេះថា៖«ការថែរក្សានូវមាន់ជល់ ចំនួន៩២ក្បាល មានការលំបាក និងចំណាយសោហ៊ុយផ្សេងៗ និងដើម្បីបង្ការកុំឲ្យមានបទល្មើសកើតមានជាថ្មី និងដើម្បីពន្លឿននូវនីតិវិធីនៃការស៊ើបសួរឲ្យបានឆាប់រហ័ស គប្បីចៅក្រមស៊ើបសួរសម្រេចកម្ទេចចោល នូវមាន់ចំនួន៩២ក្បាលខាងលើនេះ»។
បើនិយាយពីតម្លៃវិញ មាន់ខ្លះមានតម្លៃ១ម៉ឺនដុល្លារ ទៅ២ម៉ឺនដុល្លារទៀតផង។ នេះបើតាមលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលបានស៊ើបអង្កេតលើអ្នកកាសែត ជាប់សង្ស័យពាក់ព័ន្ធក្នុងករណីនេះ។
មាន់ជល់ចំនួន៩២ក្បាល ត្រូវបានសមត្ថកិច្ច ប្រមូលបានពីសង្វៀនជល់មាន់ខេត្ត ដែលមានម្ចាស់ឈ្មោះ ថៃ ដានី ហៅ ម៉ាប់ ហើយត្រូវបានគេស្គាល់ថា ជាក្មួយប្រសារសម្ដេចនាយករដ្ឋមន្ត្រី ហ៊ុន សែន។ លោក ថៃ ដានី បានប្រគល់ខ្លួនឲ្យសមត្ថកិច្ច ក្រោយពីមានបញ្ជាពីនាយករដ្ឋមន្ត្រីឲ្យតាមចាប់ខ្លួន។ សុំណុំរឿងជនសង្ស័យឈ្មោះ ថៃ ដានី កំពុងស្ថិតក្រោមការពិនិត្យពីបទ បើកល្បែងស៊ីសងខុសច្បាប់ ប្រព្រឹត្តនៅឃុំអរិយក្សត្រ ស្រុកល្វាឯម ខេត្តកណ្ដាល បទល្មើសព្រហ្មទណ្ឌ ដែលមានចែងឲ្យផ្ដន្ទាទោសតាមបញ្ញត្តិមាត្រា ០៥ នៃច្បាប់ស្តីពីការបង្ក្រាបល្បែងស៊ីសង។
ដីកាសម្រេចប្រហារជីវិតសត្វមាន់នេះ ធ្វើឡើងដោយ លោកហុក វ៉ាន់ធីណា ប្រធានសាលាដំបូងខេត្តកណ្តាល និងជាចៅក្រមស៊ើបសួរ និងលោកឯក ស៊ុនរស្មី ព្រះរាជអាជ្ញារងនៃអយ្យការអមសាលាដំបូងខេត្តកណ្តាល៕
© រក្សាសិទ្ធិដោយ thmeythmey.com