អន្តរជាតិ
ប្រទេសអាស៊ីប្រាំនឹងដណ្តើមតំណែងលោកខាងលិចជារដ្ឋមានសេដ្ឋកិច្ចធំជាងគេត្រឹមឆ្នាំ ២០៣២
× ស្ថាប័នស្រាវជ្រាវអង់គ្លេសបានព្យាករថា មហាយក្សចិននឹងជំនួសតំណែងអាមេរិកជាមហាអំណាចសេដ្ឋកិច្ចលេខមួយនៅត្រឹមឆ្នាំ ២០៣២។ ចំណែកប្រទេសអាស៊ីចំនួនបួនមានដូចជាជប៉ុន ឥណ្ឌា កូរ៉េខាងត្បូង និង ឥណ្ឌូណេស៊ីនឹងស្ថិតនៅក្នុងចំណោមប្រទេសសេដ្ឋកិច្ចធំជាងគេចំនួនដប់ផងដែរ។
មជ្ឈមណ្ឌលស្រាវជ្រាវសេដ្ឋកិច្ច និងធុរកិច្ចរបស់អង់គ្លេស (CEBR) បានអះអាងថា មហាយក្សចិននឹងក្លាយជាមហាអំណាចសេដ្ឋកិច្ចលំដាប់ទីមួយដោយវ៉ាដាច់អាមេរិកនៅឆ្នាំ ២០៣២ ខាងមុខ។
ទីភ្នាក់ងារព័ត៌មានរុស្ស៊ី Sputnik បានស្រង់សម្តីក្នុងរបាយការណ៍ខាងលើថា កំណើនសេដ្ឋកិច្ចរបស់មហាយក្សចិនបន្តមានទៅមុខ បើទោះបីជាវាយឺតជាងមុនក៏ដោយ។ ដូច្នេះហើយនៅឆ្នាំ ២០៣២ ចិនអាចមានលទ្ធភាពនាំមុខអាមេរិក។
ក្រៅពីការរះត្រដែតឡើងរបស់ចិនជាមហាអំណាចសេដ្ឋកិច្ចពិភពលោកលើនៅលេខរៀងទីមួយ ប្រទេសផ្សេងទៀតនៅអាស៊ីមានដូចជា ជប៉ុន ឥណ្ឌា កូរ៉េខាងត្បូង និងឥណ្ឌូណេស៊ីក៏នឹងស្ថិតក្នុងចំណោមមហាអំណាចសេដ្ឋកិច្ចទាំងដប់លើពិភពលោកផងដែរ។
មហាយក្សអាស៊ីខាងត្បូងឥណ្ឌានឹងក្លាយជាមហាអំណាចសេដ្ឋកិច្ចលេខរៀងទីបីនៅឆ្នាំ ២០២៧ ឈ្នះជប៉ុន និងអាល្លឺម៉ង់។ ហើយអ្វីដែលសំខាន់ត្រឹមក្នុងឆ្នាំ ២០១៨ ខាងមុខ ឥណ្ឌាដោយវ៉ាដាច់ប្រទេសបារាំង និងអតីតម្ចាស់អាណានិគមរបស់ខ្លួនអង់គ្លេសផង។
ចំណែកកូរ៉េខាងត្បូងដែលសេដ្ឋកិច្ចបច្ចុប្បន្នស្ថិតនៅលេខរៀងទី១១ និងឥណ្ឌូណេស៊ីស្ថិតក្នុងលំដាប់ថ្នាក់លេខ ១៦ នោះនឹងឡើងមកក្នុងចំណោមប្រទេសដប់ដែលមានសេដ្ឋកិច្ចធំជាងគេនៅឆ្នាំ ២០៣២ផងដែរ។
របាយការណ៍ស្ថាប័នស្រាវជ្រាវខាងលើបានបន្ថែមផងដែរថា ប្រទេសកាណាដា និងអ៊ីតាលីបានធ្លាក់ចេញពីតារាងប្រទេសដែលមានសេដ្ឋកិច្ចធំជាងគេចំនួនដប់លើពិភពលោក ខ ណៈដែលប្រេស៊ីលធ្លាក់ពីលេខប្រាំបី មកលេខប្រាំមួយវិញ៕
© រក្សាសិទ្ធិដោយ thmeythmey.com