អន្តរជាតិ
ក្វាតេម៉ាឡា ថាខ្លួនប្តូរទីតាំងស្ថានទូតទៅហ្ស៊េរុយសាឡិមមិនមែនព្រោះអាមេរិកដាក់សម្ពាធឡើយ
× រដ្ឋាភិបាលក្វាតេម៉ាឡា បានបដិសេធការចោទប្រកាន់ថា អាមេរិកដាក់សម្ពាធលើខ្លួនឲ្យសម្រេចប្តូរស្ថានទូតទៅកាន់ក្រុងហ្ស៊េរុយសាឡិម។ ទោះមិនមានសម្ពាធពីអាមេរិកក្តី កា្វតេម៉ាឡាពឹងផ្អែកសំខាន់លើជំនួយអាមេរិកដើម្បីអភិវឌ្ឍ និងកាត់បន្ថយភាពក្រីក្រក្នុងប្រទេសរបស់ខ្លួន។
«វាគ្មានសម្ពាធអ្វីពីអាមេរិកឡើយ។ វាមិនមានការលូកដៃអ្វីពីអាមេរិកដើម្បីឲ្យយើងប្តូរទីតាំងស្ថានទូតនេះទេ។ វាជាការសម្រេចចិត្តរបស់រដ្ឋាភិបាលក្វាតេម៉ាឡា។ វាជាសិទ្ធិអធិបតេយ្យ និងគោលនយោបាយការបរទេសរបស់យើង»។ នេះជាសម្តីរបស់រដ្ឋមន្ត្រីការបរទេសកា្វតេម៉ាឡា Sandra Jovel ដែលដកស្រង់ដោយទីភ្នាក់ងារព័ត៌មាន AFP។
រដ្ឋមន្ត្រីការបរទេសខាងលើបានពន្យល់បន្ថែមថា ក្វាតេម៉ាឡាជាសម្ព័ន្ធមិត្តប្រវត្តិសាស្ត្ររបស់អ៊ីស្រាអែល ហើយខ្លួនក៏មិនបានស្នើសុំអ្វីពីអ៊ីស្រាអែល និងអាមេរិកជាថ្នូរនឹងការប្តូរទីតាំងស្ថានទូតនេះដែរ។
លោកស្រីប្រមុខការទូតនេះសង្កត់ធ្ងន់ថា វាមិនមែនជាការប្តូរទីតាំងស្ថានទូតឡើយ វាជាការត្រឡប់នៃស្ថានទូតទៅកាន់កន្លែងដើមប៉ុណ្ណោះ។ កា្វតេម៉ាឡាមានស្ថានទូតនៅហ្ស៊េរុយសាឡិមតាំងពីយូររហូតដល់ឆ្នាំ ១៩៧៨ ទើបប្តូរទីតាំងស្ថានទូតទៅ Tel Aviv វិញ។
ការចោទប្រកាន់ថា ក្វាតេម៉ាឡានេះទទួលរងសម្ពាធពីសហរដ្ឋអាមេរិកកើតមានឡើង ក្រោយមានការបោះឆ្នោតនៅមហាសន្និបាតអង្គការសហប្រជាជាតិថ្កោលទោសអាមេរិកដែលទទួលស្គាល់ក្រុងហ្ស៊េរុយសាឡិមជារដ្ឋធានីអ៊ីស្រាអែល។ ប្រទេសប្រាំបួនក្នុងនោះមានអាមេរិក អ៊ីស្រាអែល និងកា្វតេម៉ាឡាផងនោះបានបោះឆ្នោតប្រឆាំងដំណោះស្រាយមហាសន្និបាត ខណៈដែលប្រទេស ១២៨ បោះឆ្នោតគាំទ្រ ទោះតំណាងអាមេរិកគំរាមកត់ឈ្មោះនិងផ្តាច់ជំនួយអ្នកប្រឆាំងអាមេរិកក្តី។
ប្រធានាធិបតីក្វាតេម៉ាឡា លោក Jimmy Morales បានប្រកាសកាលពីថ្ងៃអាទិត្យសប្តាហ៍មុនថា ក្វាតេម៉ាឡា នឹងប្តូរទីតាំងស្ថានទូតរបស់ខ្លួនទៅក្រុងហ្ស៊េរុយសាឡិមតាមសហរដ្ឋអាមេរិក ប៉ុន្តែអ្វីដែលសំខាន់នោះទាំងអាមេរិក និងក្វាតេម៉ាឡា មិនបញ្ជាក់ថាពេលណាខ្លួនប្តូរទីតាំងស្ថានទូតនេះឡើយ។
ជារួមកា្វតេម៉ាឡា ប្រហែលជាមិនរងសម្ពាធពីសហរដ្ឋអាមេរិកឡើយ ប៉ុន្តែរដ្ឋអាមេរិកខាងត្បូងនេះពឹងផ្អែកសំខាន់លើជំនួយអាមេរិកក្នុងការអភិវឌ្ឍប្រទេស និងកាត់បន្ថយភាពក្រីក្រទប់ស្កាត់ចលនាចំណាកស្រុកជាដើម។ ក្នុងឆ្នាំ ២០១៧ អាមេរិកផ្តល់ជំនួយដល់ប្រទេសនេះក្នុងទំហំរហូតដល់ ១៤០ លានដុល្លារអាមេរិកឯណោះ។ ដូច្នេះហើយចង់មិនចង់ កា្វតេម៉ាឡាត្រូវយកចិត្តអាមេរិក៕
Tag:
ក្វាតេម៉ាឡា
អាមេរិក
© រក្សាសិទ្ធិដោយ thmeythmey.com