អន្តរជាតិ
មេបក្សកុម្មុយនីស្តវៀតណាម ស្នើឲ្យកងទ័ពពង្រឹងសមត្ថភាពនិងតួនាទីដើម្បីផ្តល់ក្តីសុខដល់ប្រជាជន
× ប្រមុខបក្សកុម្មុយនីស្តវៀតណាម បានស្នើឲ្យកងទ័ពទាំងអស់បន្តពង្រឹងសមត្ថភាព ក៏ដូចជាតួនាទីរបស់ខ្លួនដើម្បីការពារសុវត្ថិភាពជាតិ និងប្រជាជន ។ ប្រមុខបក្សរូបនេះ ក៏ថែមទាំងណែនាំឲ្យកងទ័ពបំពេញកាតព្វកិច្ចរបស់ពួកគេស្របទៅនឹងគោលនយោបាយរបស់បក្ស និងធ្វើសហការជាមួយកងកម្លាំង និងភាគីស៊ីវិលផ្សេងទៀតដើម្បីអភិវឌ្ឍសង្គម និងសេដ្ឋកិច្ចវៀតណាមទៀតផង ។
នាសន្និសីទយោធានិងនយោបាយសម្រាប់កងទ័ពទាំងអស់នៅថ្ងៃ ២៧ ធ្នូ លោកអគ្គលេខាធិការបក្សកុម្មុយនីស្តវៀតណាម Nguyễn Phú Trọng បានលើកឡើងពីតម្រូវការនៃការពង្រឹងតួនាទីស្នូលរបស់កងទ័ពក្នុងការធានាសេចក្តីសុខរបស់ប្រជាជនទាំងអស់ ក៏ដូចជាសក្តានុពលនៃវិស័យការពារជាតិវៀតណាមផងដែរ ។ នេះបើយោងតាមការចុះផ្សាយរបស់សារព័ត៌មានវៀតណាម Vietnam News ។
តាមរយៈវេទិកាដដែលនោះ លោកអគ្គលេខាធិការ បានណែនាំដល់កងទ័ពឲ្យសហការជិតស្និទ្ធជាមួយនឹងបណ្តាក្រសួង និងអាជ្ញាធរក្នុងតំបន់ដើម្បីបង្កើតតំបន់ការពារ និងអនុវត្តផែនការការពារជាតិ ដោយផ្សារភ្ជាប់ជាមួយនឹងការអភិវឌ្ឍសង្គមសេដ្ឋកិច្ចឲ្យបានទូទាំងប្រទេស ។ នេះបើយោងតាមប្រភពព័ត៌មានដដែល ដែលបានដកស្រង់សម្តីលោកអគ្គលេខាធិការបក្ស ក៏បានទទូចឲ្យកងទ័ពទាំងអស់ ត្រៀមខ្លួនរួចជាស្រេចក្នុងការបំពេញបេសកកម្មសង្គ្រោះនានា ។
សម្រាប់ប្រមុខបក្សកុម្មុយនីស្តវៀតណាមរូបនេះ ការបង្កើតកងទ័ពដែលមានឆន្ទៈនយោបាយមិនប្រែប្រួល និងផ្តល់តម្លៃឲ្យជាតិ បក្ស និងប្រជាជន គឺជារឿងសំខាន់ណាស់ ដ្បិត វា គឺជាកត្តាដ៏សំខាន់ក្នុងការធានាបានពីរចនាសម្ព័ន្ធរឹងមាំ និងជំរុញឲ្យកងទ័ពមានសមត្ថភាពកាន់តែខ្លាំងក្លាក្នុងការប្រយុទ្ធ ។ លោកសង្កត់ធ្ងន់ថា៖«កងទ័ព ក៏ត្រូវតែប្រកាន់ខ្ជាប់គោលនយោបាយការបរទេសឯករាជ្យ និងទំនាក់ទំនងជាមួយនឹងដៃគូការពារជាតិខាងក្រៅរបស់បក្ស ដើម្បីធានាឲ្យបានអធិបតេយ្យ ឯករាជ្យ និងបូរណភាពជាតិខ្លួន» ៕
Tag:
វៀតណាម
កងទ័ព
អាស៊ាន
© រក្សាសិទ្ធិដោយ thmeythmey.com