អន្តរជាតិ
២០១៧៖ វៀតណាមមានកំណើនសេដ្ឋកិច្ចខ្ពស់បំផុតក្នុងរយៈពេលដប់ឆ្នាំចុងក្រោយ
× សេដ្ឋកិច្ចវៀតណាមនៅក្នុងឆ្នាំ ២០១៧នេះមានកំណើន ៦,៨១ ភាគរយ ដែលគេចាត់ទុកថា វាជា កំណើនរហ័សបំផុតក្នុងរយៈពេលមួយទសវត្សចុងក្រោយ។ នេះបើយោងតាមរបាយការណ៍នៃការិយាល័យស្ថិតិទូទៅរបស់វៀតណាម។
សេដ្ឋកិច្ចវៀតណាមមានកំណើនរហ័សគួរឲ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ហើយនៅក្នុងឆ្នាំ ២០១៧នេះ កំណើនសេដ្ឋកិច្ចរដ្ឋកុម្មុយនីស្តមួយនេះមានទំហំ ៦,៨១ភាគរយឯណោះ។ បើតាមរបាយការណ៍ការិយាល័យស្ថិតិទូទៅវៀតណាម កំណើនសេដ្ឋកិច្ចឆ្នាំ២០១៧នេះជា ខ្លាំងបំផុតមួយក្នុងរយៈពេលដប់ឆ្នាំមកនេះ។
ទីភ្នាក់ងារព័ត៌មាន AFP បានស្រង់របាយការណ៍ស្ថាប័នស្ថិតិខាងលើថា កំណើនសេដ្ឋកិច្ចឆ្នាំ ២០១៧ នេះខ្ពស់លើសការព្យាកររបស់រដ្ឋាភិបាលវៀតណាមដែលរំពឹងត្រឹម ៦,៧ ភាគរយប៉ុណ្ណោះ ហើយវាកើនលើសឆ្នាំ ២០១៦ ដែលមានកំណើនសរុបត្រឹម ៦,២ ភាគរយនោះ។
បើតាមប្រធានការិយាល័យស្ថិតិខាងលើលោក Nguyen Bich Lam កំណើនសេដ្ឋកិច្ចវៀតណាមខ្ពស់នេះក៏ដោយសារការរីកចម្រើននៃវិស័យកសិកម្ម អាហារសមុទ្រ និង រុក្ខាប្រមាញ់ផងដែរ។
លោក Bich Lam បាននិយាយដូច្នេះ៖ «ការកើនឡើងនៃផលិតផលកសិកម្ម និងការអភិវឌ្ឍនៃវិស័យជលផល និងរុក្ខាប្រមាញ់ជាហេតុផលសំខាន់នៃការរីកលូតលាស់នៃសេដ្ឋកិច្ចរបស់យើងនេះ»។
សម្រាប់ការនាំចេញនៅក្នុងឆ្នាំ ២០១៧នេះ ស្ថាប័នខាងលើបានបញ្ជាក់ឲ្យដឹងថា ទំហំនៃការនាំចេញសរុបរបស់វៀតណាមគឺ ២១៣ ពាន់លានដុល្លារអាមេរិក ដែលវាកើនឡើង ២១ ភាគរយបើប្រៀបធៀបនឹងការនាំចេញឆ្នាំ ២០១៦។
អ្នកជំនាញសេដ្ឋកិច្ចទទួលស្គាល់ថាកំណើនសេដ្ឋកិច្ចខ្ពស់នេះបង្ហាញឲ្យឃើញពីការយកចិត្តទុកដាក់របស់រដ្ឋាភិបាលក្នុងការអភិវឌ្ឍវិស័យកសិកម្មវៀតណាម។ ក្រៅពីនេះវាក៏ដោយសារការកើនឡើងនៃតម្រូវការក្រៅប្រទេស និងក្នុងស្រុកផង ដោយវាបានជំរុញកឲ្យការផលិតក្នុងស្រុកកើនឡើង ជំរុញពាណិជ្ជកម្ម និងទាក់ទាញការវិនិយោគបរទេសដូចគ្នា។
សម្រាប់ឆ្នាំ ២០១៨ រដ្ឋាភិបាលក្រុងហាណូយរំពឹងផងដែរថា សេដ្ឋកិច្ចរបស់ខ្លួននឹងមានកំណើនខ្ពស់។ អ្នកជំនាញធនាគារពិភពលោកកោតសរសើរកំណើនសេដ្ឋកិច្ចខ្ពស់បំផុតក្នុងរយៈពេលដប់ឆ្នាំចុងក្រោយនៅវៀតណាមនេះ ប៉ុន្តែគេសង្កត់ធ្ងន់ថា វៀតណាមទំនងជាប្រឈមការលំបាកក្នុងការរក្សាកំណើនឲ្យនៅខ្ពស់ដូចឆ្នាំ ២០១៧នេះ៕
Tag:
វៀតណាម
សេដ្ឋកិច្ច
Nguyen Bich Lam
© រក្សាសិទ្ធិដោយ thmeythmey.com