អន្តរជាតិ
ឥណ្ឌូណេស៊ី៖ បុគ្គលប្រព្រឹត្តអំពើពុករលួយច្រើនជាងគេក្នុងឆ្នាំ២០១៧ គឺមន្ត្រីរដ្ឋ អតីតប្រធានសភាឥណ្ឌូណេស៊ី Setya Novanto ដែលត្រូវបានគេចាប់ខ្លួនដោយសារពាក់ព័ន្ធការកឹបកេងលុយរដ្ឋកន្លងមក
× អង្គភាពប្រឆាំងអំពើពុករលួយឥណ្ឌូណេស៊ី បានរកឃើញថា ក្នុងចំណោមអ្នកដែលប្រព្រឹត្តអំពើពុករលួយច្រើនបំផុតនៅក្នុងសង្គមឥណ្ឌូណេស៊ីប្រចាំឆ្នាំ២០១៧ គឺមន្ត្រីរដ្ឋតែម្តង ។ អង្គភាពឯករាជ្យរបស់ឥណ្ឌូណេស៊ីមួយនេះ អះអាងដោយសម្អាងលើតួលេខនៃការស៊ើបអង្កេត និងចំនួនបុគ្គលដែលត្រូវចាប់ខ្លួនពាក់ព័ន្ធនឹងបទពុករលួយ ។ បុគ្គលិកវិស័យឯកជន ក៏មាននៅក្នុងបញ្ជីពុករលួយផងដែរ ។
គណៈកម្មការប្រឆាំងពុករលួយឥណ្ឌូណេស៊ី ដែលហៅកាត់ថា KPK នៅថ្ងៃ២៧ ធ្នូ បានចេញរបាយការណ៍មួយស្តីអំពីអំពើពុករលួយប្រចាំឆ្នាំ២០១៧ ។ តាមរយៈរបាយការណ៍នោះ គណៈកម្មការ នេះបានបញ្ជាក់ថា ក្នុងចំណោមមនុស្ស ដែលត្រូវបានចាប់ខ្លួនពីបទពុកពុករលួយ និងសូកប៉ាន់ ១២០ នាក់ មាន ៤៣នាក់ ជាមន្ត្រីរដ្ឋ ។ នេះបើយោងតាមការចុះផ្សាយរបស់សារព័ត៌មានឥណ្ឌូណេស៊ី The Jakarta Post ។
របាយការណ៍អង្គភាពប្រឆាំងពុករលួយឥណ្ឌូណេស៊ី បានរកឃើញដែរថា អ្នកជំនួញ ក៏ដូចជាអ្នកតំណាងរាស្ត្រ និងក្រុមប្រឹក្សាតំបន់ ក៏ស្ថិតនៅក្នុងលំដាប់បន្តបន្ទាប់នៃអ្នកប្រព្រឹត្តអំពើពុករលួយនៅក្នុងសង្គមឥណ្ឌូណេស៊ីផងដែរ ។ ពោលគឺ បន្ទាប់ពីមន្ត្រីរដ្ឋ អ្នកជំនួញ ស្ថិតនៅលំដាប់ទីពីរ និងក្រុមអ្នកធ្វើច្បាប់និងក្រុមប្រឹក្សា ស្ថិតនៅលំដាប់ទីបីនៃអ្នកប្រព្រឹត្តអំពើពុករលួយ ។
ជុំវិញរបាយការណ៍នេះដែរ អនុប្រធានគណៈកម្មាធិការលុបំបាត់អំពើពុករលួយឥណ្ឌូណេស៊ី Laode Muhammad Syarif បានថ្លែងថា តាមរយៈការអនុវត្ត និងអំណាចដែលផ្តល់ឲ្យ មន្ត្រីរដ្ឋ ជាមុខសញ្ញា ដែលអំពើពុករលួយ អាចកើតឡើងយ៉ាងឆាប់រហ័ស ។
អនុប្រធានរូបនេះ បានបន្ថែមទៀតថា តាមរយៈរបាយការណ៍ឆ្នាំ២០១៧នេះ បានរកឃើញថា សាធារណៈជន បានយល់ដឹងខ្ពស់ពីបញ្ហាអំពើពុករលួយ ជាក់ស្តែង វាមានការរាយការណ៍ និងបណ្តឹងជាច្រើន ត្រូវបានធ្វើឡើងដោយប្រជាពលរដ្ឋប្រឆាំងនឹងមន្ត្រីពុករលួយ ។ ជាលទ្ធផល គណៈកម្មាធិការ ក៏អាចយកត្រឡប់បាននូវទ្រព្យរដ្ឋមានតម្លៃរាប់លានដុល្លារ ដែលត្រូវបានបាត់បង់តាមរយៈការបន្លំរបស់មន្ត្រីរដ្ឋឥណ្ឌូណេស៊ីទាំងនោះផងដែរ។
ឥណ្ឌូណេស៊ីរងគ្រោះខ្លាំងដោយសារអំពើពុករលួយនេះ ហើយកន្លងមកគណៈកម្មការពុករលួយប្រទេសនេះបានព្យាយាមបោសសម្អាតបុគ្គលពាក់ព័ន្ធករណីពុករលួយនេះក្នុងតំណែងខ្ពស់ក្នុងស្ថាប័ននយោបាយផង។ ក្នុងនោះគេឃើញលោក Setya Novanto ដែលជាប្រធានសភាឥណ្ឌូណេស៊ី និងប្រធានគណបក្សនយោបាយ Golkar ក៏ត្រូវបានគេចាប់ខ្លួន ដោយសាររងការចោទប្រកាន់ថា បានកិបកេងលុយរដ្ឋអស់១៧៣លានដុល្លារ ក្នុងពេលដែលរដ្ឋាភិបាលចេញអត្តសញ្ញាណប័ណ្ណថ្មីជូនប្រជាជនឥណ្ឌូណេស៊ីកន្លងមកផងដែរ ៕
Tag:
ពុករលួយ
ឥណ្ឌូណេស៊ី
អាស៊ាន
© រក្សាសិទ្ធិដោយ thmeythmey.com