បង់ក្លាដែស គ្រោងបញ្ជូនជនភៀសខ្លួនរ៉ូហ៊ីងយ៉ា «១០ម៉ឺននាក់»លើកដំបូងទៅមីយ៉ាន់ម៉ា

អន្តរជាតិ

នយោបាយអន្តរជាតិ

បង់ក្លាដែស គ្រោងបញ្ជូនជនភៀសខ្លួនរ៉ូហ៊ីងយ៉ា «១០ម៉ឺននាក់»លើកដំបូងទៅមីយ៉ាន់ម៉ា

30, Dec 2017 , 9:11 pm

រូបភាព

ដោយ:

រដ្ឋាភិបាលបង់ក្លាដែស បានបង្ហាញពីគម្រោងក្នុងការបញ្ជូនជនភៀសខ្លួនជនជាតិភាគតិចរ៉ូហ៊ីងយ៉ាប្រមាណជាង១០ម៉ឺននាក់ជាលើកដំបូងទៅកាន់មីយ៉ាន់ម៉ាវិញ ។ ផែនការនេះ នឹងត្រូវបានអនុវត្តប្រសិន បើមានការព្រមព្រៀងគ្នាពីសំណាក់រដ្ឋាភិបាលមីយ៉ាន់ម៉ា ដែលជារដ្ឋាភិបាលអាណាព្យាបាលរបស់ជនភៀសខ្លួន ។

មន្ត្រីជាន់ខ្ពស់បង់ក្លាដែស Obaidul Quader នៅថ្ងៃ២៩ ធ្នូ បានឲ្យដឹងថា រដ្ឋាភិបាលក្រុងដាហ្កា បានផ្តល់បញ្ជីឈ្មោះជនភៀសខ្លួនជនជាតិភាគតិចរ៉ូហ៊ីងយ៉ា ១០ម៉ឺននាក់ ទៅកាន់រដ្ឋាភិបាលក្រុងណៃពិដោរហើយ ដើម្បីសម្រេច និងចាប់ផ្តើមនីតិវិធីក្នុងការបញ្ជូនជនភៀសខ្លួននៅដើមឆ្នាំពី២០១៨ តាមកិច្ចព្រមព្រៀង ដែលរដ្ឋាភិបាលទាំងពីរ បានធ្វើកន្លងមក ។

តាមភ្នាក់ងារព័ត៌មាន AFP លោក Obaidul Quader បានសង្កត់ធ្ងន់ថា៖« ការបញ្ជូនជនភៀសខ្លួន នឹងអាចចាប់ផ្តើមភ្លាមៗ ក្រោយពីក្រុមការងារប្រទេសទាំងពីរ សម្រេចចុងក្រោយលើបញ្ជីឈ្មោះអ្នកដែលត្រូវបញ្ជូន ។ ពួកគេ ក៏នឹងត្រូវបានធានាទាំងសុវត្ថិភាព និងកិត្តិយសផងដែរ» ។

អ្វីគួរកត់សម្គាល់ ផែនការនេះ អាចលេចឡើងបាន ក្រោយពីមានកិច្ចព្រមព្រៀងទ្វេភាគីរវាងរដ្ឋាភិបាលទាំងពីរ ដែលបានធ្វើឡើង ក្រោមសម្ពាធអន្តរជាតិនោះ ។ នៅថ្ងៃ២៣ វិច្ឆិកា កន្លងទៅ រដ្ឋាភិបាលមីយ៉ាន់ម៉ា និងបង់ក្លាដែស បានចុះកិច្ចព្រមព្រៀងរួមគ្នា ក្នុងការបញ្ជូនជនភៀសខ្លួនជនជាតិភាគតិចរ៉ូហ៊ីងយ៉ា ដែលកំពុងស្នាក់នៅបង់ក្លាដែសទៅកាន់មីយ៉ាន់ម៉ាវិញ ។

គួរជម្រាបថា បើតាមរបាយការណ៍របស់អង្គការសហប្រជាជាតិ គិតចាប់ពីការប៉ះទង្គិចនៅខែសីហាមក មានជនភៀសខ្លួនជនជាតិភាគតិចម៉ូស្លីមរ៉ូហ៊ីងយ៉ា ជាង៦០ម៉ឺននាក់ហើយ បានភៀសខ្លួនចេញពីរដ្ឋ Rakhine របស់មីយ៉ាន់ម៉ាទៅកាន់បង់ក្លាដែស ដោយពួកគេ បានអះអាងថា ពួកគេ រងការគំរាមកំហែងពីសំណាក់អាជ្ញាធរ ។

លំហូរនៃជនភៀសខ្លួនរាប់ម៉ឺននាក់នេះ កន្លងមកបានធ្វើឲ្យរដ្ឋាភិបាលលោកស្រី អ៊ុងសាន ស៊ូជី រងការបន្ទោស និងថ្កោលទោសជាខ្លាំងពីបណ្តាសហគមន៍អន្តរជាតិ ដែលរាប់បញ្ចូលទាំងអង្គការសិទ្ធិមនុស្ស និងអង្គការសហប្រជាជាតិផងដែរ ។ គួរកត់សម្គាល់នោះ បង់ក្លាដែស កន្លងមក ក៏បានឆ្លៀតឱកាសក្នុងការចូលរួមក្នុងវេទិកាអន្តរជាតិធំដើម្បីវាយប្រហារមីយ៉ាន់ម៉ាទៀតផង ៕