ដើម្បីកាត់បន្ថយជម្លោះព្រោះ«កំពប់កាហ្វេលើគ្នា»កូរ៉េខាងត្បូងហាមប្រជាជនខ្ចប់កាហ្វេចូលឡានក្រុង

អន្តរជាតិ

ដើម្បីកាត់បន្ថយជម្លោះព្រោះ«កំពប់កាហ្វេលើគ្នា»កូរ៉េខាងត្បូងហាមប្រជាជនខ្ចប់កាហ្វេចូលឡានក្រុង

30, Dec 2017 , 11:05 pm

រូបភាព

ដោយ:

រដ្ឋាភិបាលក្រុងសេអ៊ូល បានចេញបទបញ្ជាថ្មី ដោយហាមប្រាមប្រជាជនយកកាហ្វេដែលពួកគេខ្ចប់ផឹកខាងក្រៅចូលទៅក្នុងឡានក្រុងសាធារណៈ ។ បម្រាមនេះ មានគោលដៅកាត់បន្ថយជម្លោះដែលជានិច្ចកាលកើតឡើងនៅក្នុងឡានក្រុង ដោយសារតែពួកគេ មិនប្រុងប្រយត្ន័ បណ្តាលឲ្យកាហ្វេកំពប់លើអ្នកដទៃ ដែលរួមដំណើរជាមួយគ្នា។--

ប្រជាជនកូរ៉េខាងត្បូង ទំនងជាលែងបានផឹកកាហ្វេ ដែលពួកគេខ្ចប់ នៅតាមឡានក្រុងសាធារណៈបានទៀតហើយ ។ នេះក៏ព្រោះតែបម្រាមដែលជាបទបញ្ជាថ្មី ដែលទើបតែអនុម័តដោយរដ្ឋាភិបាលកូរ៉េខាងត្បូង ដែលទើបតែចូលជាធរមាននៅថ្ងៃ២៨ ធ្នូ ២០១៧ ។ នេះបើយោងតាមភ្នាក់ងារព័ត៌មានកូរ៉េខាងត្បូង Yonhap ។

តាមរយៈបទបញ្ជាថ្មីនេះ អ្នកបើកបរឡានក្រុងសាធារណៈ មានសមត្ថកិច្ចក្នុងការពិនិត្យអ្នកដំណើរមុនពេលពួកគេចូលទៅក្នុងឡាន ពោលគឺ ប្រសិន អ្នកដំណើរ មានកាន់កែវកាហ្វេ ដែលពួកគេខ្ចប់ពីខាងក្រៅ អ្នកបើកបរ អាចឃាត់ពួកគេមិនឲ្យចូលឡានក្រុង រហូតទាល់តែពួកគេ បោះកាហ្វេនោះចោល ។

តាមការបញ្ជាក់របស់ លោក Yoo Kwang-sang សមាជិកនៃអ្នកធ្វើសំណើនេះឡើង បានអះអាងថា កន្លងមក មានករណីជាច្រើនបានកើនឡើង ពាក់ព័ន្ធការធ្វើឲ្យកំពប់កែវកាហ្វេក្តៅ ឬកាហ្វេទឹកកកទៅលើអ្នករួមដំណើរ ខណៈវប្បធម៌នៃការខ្ចប់កាហ្វេដើម្បីផឹកនៅពេលធ្វើដំណើរ កាន់តែមានការពេញនិយមនោះ ។
លោក សង្កត់ធ្ងន់យ៉ាងដូច្នេះថា៖«យើងបានសង្កេតឃើញជម្លោះដែលបង្កឡើងដោយការកំពប់កាហ្វេ ឬភេសជ្ជៈកាន់តែច្រើន តាមរយៈការវេចខ្ចប់ ដូច្នេះដើម្បីទប់ស្កាត់វិវាទប្រភេទនេះ យើងត្រូវតែបង្កើតបទបញ្ជាដើម្បីគ្រប់គ្រង»៕