ព្រឹត្តិការណ៍ពិភពលោកសំខាន់ៗឆ្នាំ ២០១៧

អន្តរជាតិ

ព្រឹត្តិការណ៍ពិភពលោកសំខាន់ៗឆ្នាំ ២០១៧

31, Dec 2017 , 8:59 pm

រូបភាព

ដោយ: ថ្មីៗ

ក្នុងឆ្នាំ ២០១៧ នេះ ព្រឹត្តិការណ៍ជាច្រើនបានកើតឡើងក្នុងនោះមានទាំងការឡើងកាន់អំណាចរបស់អ្នកជំនួញអាមេរិក ដូណាល់ ត្រាំ ជាប្រធានាធិបតីទី ៤៥របស់អាមេរិក រហូតដល់ការធ្លាក់ពីតំណែងរបស់មេដឹកនាំផ្តាច់ការវ័យ ៩២ឆ្នាំរបស់រដ្ឋអាហ្វ្រិកស៊ីមបាវ៉េ រ៉ូបឺត មូហ្កាបេ ផងដែរ។ ខាងក្រោមនេះជាការសង្ខេបព្រឹត្តិការណ៍សំខាន់ៗក្នុងឆ្នាំ ២០១៧៖

-ដូណាល់ ត្រាំ ស្បថចូលកាន់តំណែងជាប្រធានាធិបតីទី ៤៥ របស់អាមេរិក

ថ្ងៃ ២០ខែមករា លោក ដូណាល់ ត្រាំ បានស្បថចូលកាន់តំណែងជាផ្លូវការជាប្រធានាធិបតីទី ៤៥ របស់អាមេរិកក្រោយឈ្នះបេក្ខជនប្រធានាធិបតីបក្សប្រជាធិបតេយ្យលោកស្រី ហ៊ីឡារី គ្លីនតុន ក្នុងការបោះឆ្នោតថ្ងៃ៨ខែធ្នូឆ្នាំ ២០១៦។

-ដូណាល់ ត្រាំ ប្រកាសដកអាមេរិកចេញពីកិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិក

ក្រោយស្បថចូលកាន់តំណែងជាប្រធានាធិបតីអាមេរិក ក្នុងខែមីនា លោក ដូណាល់ ត្រាំ បានសម្រេចប្រកាសដកអាមេរិកចេញពីកិច្ចព្រមព្រៀងស្តង់ដាមាសភាពជាដៃគូអន្តរប៉ាស៊ីហ្វិក (Trans Pacific Partnership) ដែលមានភាគីសរុប ១២។ ការប្រកាសនេះធ្វើឡើងតាមការសន្យារបស់ខ្លួនក្នុងពេលឃោសនាបោះឆ្នោត ហើយលោក ត្រាំ បានចាត់ទុកកិច្ចព្រមព្រៀងពាណិជ្ជកម្មនេះជាកិច្ចព្រមព្រៀងមិនល្អដែលប៉ះពាល់សេដ្ឋកិច្ចអាមេរិកផង។

-អង់គ្លេសសម្រេចអនុវត្តមាត្រា ៥០ នៃសន្ធិសញ្ញា Lisbon ដើម្បីរៀបចំចាកចេញពីសហភាពអឺរ៉ុបជាផ្លូវការ

ក្រោយការបោះឆ្នោតប្រជាមតិនៅក្នុងឆ្នាំ ២០១៦ ចក្រភពអង់គ្លេសបានសម្រេចអនុវត្តមាត្រា ៥០នៃសន្ធិសញ្ញា Lisbon ជាផ្លូវការនៅខែមីនា ដើម្បីត្រួសត្រាយផ្លូវសម្រាប់ការលែងលះជាផ្លូវការជាមួយអឺរ៉ុប។

-លោក អេម៉ានុយអែល ម៉ាក្រុង ក្លាយជាប្រធានាធិបតីវ័យក្មេងរបស់បារាំង

អ្នកនយោបាយកណ្តាលនិយមបារាំង អេម៉ានុយអែល ម៉ាក្រុង វ័យ ៣៩ឆ្នាំបានជាប់ឆ្នោតក្លាយជាប្រធានាធិបតីបារាំងនៅខែឧសភា។ គេសង្ឃឹមថា ការជាប់ឆ្នោតជាប្រធានាធិបតីបារាំងរបស់លោក ម៉ាក្រុង ដែលមាននិន្នាការគាំទ្រអឺរ៉ុប នឹងអាចជួយផ្លាស់ប្តូរមុខមាត់ និងអនាគតរបស់អឺរ៉ុប ហើយវាក៏ជួយរំសាយក្តីបារម្ភ របស់សហភាពអឺរ៉ុបពីការឈ្នះឆ្នោតរបស់អ្នកនយោបាយស្តាំនិយមជ្រុល Marine Le Pen ផងដែរ។

-ដូណាល់ ត្រាំ ប្រកាសដកអាមេរិកចេញពីកិច្ចព្រមព្រៀងប្រែប្រួលអាកាសធាតុក្រុងប៉ារីស

បន្ទាប់ពីបញ្ចប់សមាជិកភាពអាមេរិកក្នុងកិច្ចព្រមព្រៀងពាណិជ្ជកម្ម TPP លោក ដូណាល់ ត្រាំ ក៏បានប្រកាសដកអាមេរិកចេញពីកិច្ចព្រមព្រៀងប្រវត្តិសាស្ត្រស្តីពីការប្រែប្រួលអាកាសធាតុក្រុងប៉ារីសផងដែរនៅខែមិថុនា។ លោក ដូណាល់ ត្រាំ អះអាងថា កិច្ចព្រមព្រៀងនេះមិនល្អ ហើយការប្រែប្រួលអាកាសធាតុជារឿងបោកប្រាស់ដែលត្រូវបានបង្កើតឡើងដើម្បីទប់ស្កាត់អាមេរិកកុំឲ្យបន្តលូតលាស់តែប៉ុណ្ណោះ។

-ក្រុមភេរវជនរដ្ឋឥស្លាមទទួលបរាជ័យទាំងស្រុង

ក្រុមភេរវជនរដ្ឋឥស្លាមនៅអ៊ីរ៉ាក់ និងស៊ីរី (ISIS) ឬដែស្ហ រងការបរាជ័យ ក្រោយចាប់ផ្តើមសកម្មភាពរបស់ខ្លួនអស់រយៈពេលបីឆ្នាំមកនេះ។ កម្លាំងអន្តរជាតិដែលមានទាំងសម្ព័ន្ធអន្តរជាតិដឹកនាំដោយអាមេរិក និងកងកម្លាំងរុស្ស៊ីរួមជាមួយអ៊ីរ៉ង់ ហេស្បូឡា និងស៊ីរី បានដណ្តើមយកទឹកដីមកវិញពីក្រុមភេរវជននេះមកវិញដោយជោគជ័យ ប៉ុន្តែវាមិនមែនមានន័យថា ក្រុមនេះត្រូវបានកម្ចាត់ទាំងស្រុងឡើយ។

-អារ៉ាប៊ីសាអូឌីត និងបក្សពួកផ្តាច់ទំនាក់ទំនងជាមួយកាតាដោយចោទថាប្រទេសនេះគាំទ្រភេរវជន

ខែមិថុនា អារាប៊ីសាអូឌីតនិងបក្សពួកដូចជា អារ៉ាប់រួមអេមីរ៉ាត់ និងអេហ្ស៊ីបបាននាំគ្នាប្រកាសផ្តាច់ទំនាក់ទំនងជាមួយកាតា ដោយចោទប្រកាន់ថា ប្រទេសនេះជារដ្ឋគាំទ្រភេរវជន។ ក្រៅពីកាត់ផ្តាច់ទំនាក់ទំនង រដ្ឋអារ៉ាប់ទាំងនេះបាននាំគ្នាហ៊ុមព័ទ្ធកាតានិងបង្ខំឲ្យរដ្ឋមួយនេះផ្តាច់ទំនាក់ទំនងជាមួយអ៊ីរ៉ង់ បិទទូរទស្សន៍ Al Jazeera និងធ្វើតាមការទាមទារពួកគេមួយចំនួនទៀតផងដែរ។

-កូរ៉េខាងជើងបាញ់សាកល្បងអាវុធនុយក្លេអ៊ែរជាលើកទី ៦ និងប្រកាសថាខ្លួនជាមហាអំណាចនុយក្លេអ៊ែរ

កូរ៉េខាងជើងបានបាញ់សាកល្បងអាវុធនុយក្លេអ៊ែរលើកទី ៦ នៅដើមខែកញ្ញាកន្លងមក ក្រោយបន្តបាញ់សាកល្បងមីស៊ីលផ្គើនសហគមន៍អន្តរជាតិបន្តបន្ទាប់ក្នុងឆ្នាំ ២០១៧នេះ។ កូរ៉េខាងជើងហ៊ានបាញ់សាកល្បងអាវុធនុយក្លេអ៊ែរ បើទោះបីជារដ្ឋបាលអាមេរិករបស់លោក ដូណាល់ ត្រាំ ព្រមានប្រើប្រាស់កម្លាំងទ័ពក៏ដោយ។

-ស៊ី ជិនភីង ឡើងតំណែងស្មើម៉ៅ សេទុង ក្នុងមហាសន្និបាតបក្សកុម្មុយនីស្តចិនលើកទី ១៩

ក្នុងមហាសនិ្នបាតបក្សកុម្មុយនីស្តចិនលើកទី ១៩ ក្នុងរយៈពេលមួយសប្តាហ៍ពីថ្ងៃ ១៨ ដល់ថ្ងៃ ២៤ តុលា កន្លងមក គេឃើញមានការដាក់បញ្ចូលគំនិតនយោបាយរបស់ប្រធានាធិបតីចិន ស៊ី ជិនភីង ក្នុងរដ្ឋធម្មនុញ្ញបក្ស ដែលដំឡើងឋានៈរបស់លោកឲ្យស្មើលោក ម៉ៅ សេទុង។ ក្រៅពីការសម្រេចជាប្រវត្តិសាស្ត្រនេះ លោក ស៊ី ជិនភីង ក៏ត្រូវបានគណបក្សបោះឆ្នោតផ្តល់សេចក្តីទុកចិត្តឲ្យបន្តកាន់តំណែងជាប្រធានាធិបតីសម្រាប់អាណត្តិថ្មីទៀតផងដែរ។

-មេដឹកនាំផ្តាច់ការស៊ីមបាវ៉េលោក រ៉ូបឺត មូហ្កាបេ ធ្លាក់ពីតំណែង

មេដឹកនាំផ្តាច់ការប្រធានាធិបតីស៊ីមបាវ៉េ រ៉ូបឺត មូហ្កាបេ សម្រេចចុះចេញពីតំណែងក្រោយពេលដែលយោធាធ្វើរដ្ឋប្រហារស្ងៀមស្ងាត់ ដើម្បីបង្ខំឲ្យលោកដាក់អំណាច។ អតីតអនុប្រធានាធិបតីដែលលោក មូហ្កា បណ្តេញចេញពីតំណែងលោក Emmerson Mnangagwa និងជាអ្នកតស៊ូដណ្តើមឯករាជ្យពីអង់គ្លេសនោះ ក្លាយជាប្រធានាធិបតីថ្មីរបស់ស៊ីមបាវ៉េ។

-ដូណាល់ ត្រាំ ប្រកាសប្តូរទីតាំងស្ថានទូតអាមេរិកពីក្រុង Tel Aviv ទៅកាន់ក្រុងហ្ស៊េរុយសាឡិម

ព្រឹត្តិការណ៍ដែលសំខាន់ចុងក្រោយសម្រាប់ឆ្នាំ ២០១៧នោះ គឺ ការទទួលស្គាល់ហ្ស៊េរុយសាឡិមជារដ្ឋធានីអ៊ីស្រាអែលពីសំណាក់រដ្ឋបាលអាមេរិករបស់លោក ដូណាល់ ត្រាំ។ ដើមខែធ្នូ លោក ដូណាល់ ត្រាំ បានប្រកាសប្តូរទីតាំងស្ថានទូតអាមេរិកពីក្រុង Tel Aviv ទៅកាន់ក្រុងហ្ស៊េរុយសាឡិមដោយការសម្រេចចិត្តនេះបានធ្វើឲ្យសហគមន៍អន្តរជាតិថ្កោលទោសខ្លាំងផង។ ក្រោយការសម្រេចចិត្តនេះ ក្រុមប្រឹក្សាសន្តិសុខអង្គការសហប្រជាជាតិបានកោះប្រជុំបន្ទាន់ដើម្បីពិភាក្សាពីបញ្ហាចម្រូងចម្រាសនេះ ប៉ុន្តែអាមេរិកបានប្រើប្រាស់សិទ្ធិវេតូដំណោះស្រាយដែលមានគោលដៅទាត់ចោលការសម្រេចចិត្តរបស់អាមេរិកចំពោះក្រុងហ្ស៊េរុយសាឡិមដែរ។

ដោយសារក្រុមប្រឹក្សាសន្តិសុខបរាជ័យក្នុងការថ្កោលទោសអាមេរិក ប៉ាឡេស្ទីនបន្តរត់រកជំនួយពីមហាសន្និបាតអង្គការសហប្រជាជាតិ។ ជាការឆ្លើយតប មហាសន្និបាតបានបើកប្រជុំពិភាក្សានិងបានបោះឆ្នោតអនុម័តដំណោះស្រាយមួយបដិសេធការទទួលស្គាល់ហ្ស៊េរុយសាឡិមជារដធានីអ៊ីស្រាអែលផងដែរដោយប្រទេស ១២៨ បោះឆ្នោតគាំទ្រ និងប្រាំបួន បោះឆ្នោតជំទាស់។