រថយន្ត
អន្តរជាតិ
រថយន្តMercedes មួយគ្រឿងរបស់ អ៊ីត្លែរ ដាក់លក់ដេញថ្លៃនៅអាមេរិកនាថ្ងៃទី១៧ ខែមករា
× ក្រុមហ៊ុន Worldwide Auctioneers បានប្រកាសពីការដាក់លក់ចេញថ្លៃរថយន្ត Mercedes ដ៏ទំនើបមួយគ្រឿងរបស់អតីតមេដឹកនាំផ្តាច់ការណាហ្ស៊ីអាល្លឺម៉ង់ អាដូហ្វ អ៊ីត្លែរ ក្នុងរថយន្តផ្សេងៗទៀត។ ពិធីចេញថ្លៃនឹងប្រព្រឹត្តទៅនៅថ្ងៃទី១៧ ខែមករា ឆ្នាំ២០១៨នេះ នៅក្រុង Scottsdale រដ្ឋ Arizona សហរដ្ឋអាមេរិក។
រថយន្ត Mercedes-Benz 770K Grosser Offener Tourenwagen ដែលផលិតនៅឆ្នាំ១៩៣៩ ត្រូវបានចាត់ទុកជាម៉ូដែលកំពូល «Super Mercedes» និងស្ថិតក្នុងចំណោមម៉ូដែលចំនួន៤ប៉ុណ្ណោះ ដែលត្រូវបានផលិតឡើងតែមួយលើកគត់នាអំឡុងឆ្នាំ១៩៣៩ ។
អាដូហ្វ អ៊ីត្លែរ បានប្រើប្រាស់រថយន្ត Mercedes-Benz 770K Grosser ដែលមានល្បឿន១៦០គីឡូម៉ែត្រក្នុងមួយម៉ោងនេះ នាក្បួនដង្ហែរជ័យជម្នះនៅទីក្រុងប៊ែរឡាំងបន្ទាប់ពីកាន់កាប់បានទីក្រុងរបស់បារាំងនាឆ្នាំ១៩៤០ និងប្រើប្រាស់នាអំឡុងទស្សនកិច្ចរបស់អតីតមេដឹកនាំអ៊ីតាលី Benito Mussolini។
នាអំឡុងប្រតិបត្តិការយោធាមួយនៅបារាំងនាឆ្នាំ១៩៤៥ កងទ័ពអាមេរិក បានរឹបអូសរថយន្តនេះបាន។ បើតាមការផ្សាយ AFP រថយន្តនេះ ធ្លាប់ត្រូវបានទិញរយៈពេលខ្លីនៅបែលហ្ស៊ិក បន្ទាប់មក គេបានប្រទះឃើញនៅសហរដ្ឋអាមេរិក និងអឺរ៉ុប។
តាមការផ្សាយរបស់សារព័ត៌មានមួយចំនួន រថយន្តនេះ ក៏ធ្លាប់ធ្លាក់ក្នុងដៃរបស់មហាសេដ្ឋីរុស្ស៊ីមួយរូបផងដែរ ប៉ុន្តែគេមិនបានបង្ហើបពីតម្លៃដែលចេញថ្លៃបាននោះឡើយ។ ក្រុមហ៊ុន Worldwide Auctionneers ក៏មិនបានបញ្ជាក់ពីអត្តសញ្ញាណម្ចាស់រថយន្តដែលដាក់លក់ចេញថ្លៃនោះឡើយ ដោយគ្រាន់តែអះអាងថា ទឹកប្រាក់១០ភាគរយដែលទទួលបានពីការលក់ នឹងយកទៅបរិច្ចាគសម្រាប់យុទ្ធនាការអប់រំស្តីពីគ្រោះថ្នាក់នៃរបបណាហ្ស៊ី៕
© រក្សាសិទ្ធិដោយ thmeythmey.com