ហ្ស៊កដានីបដិសេធព័ត៌មានចាប់ខ្លួនក្សត្រពីរអង្គដែលឃុបឃិតជាមួយអារ៉ាប៊ីសាអូឌីតរៀបចំរដ្ឋប្រហារ

អន្តរជាតិ

ហ្ស៊កដានីបដិសេធព័ត៌មានចាប់ខ្លួនក្សត្រពីរអង្គដែលឃុបឃិតជាមួយអារ៉ាប៊ីសាអូឌីតរៀបចំរដ្ឋប្រហារ

01, Jan 2018 , 4:56 pm

រូបភាព

ដោយ: ថ្មីៗ

ហ្ស៊កដានីទាត់ចោលពាក្យចរចាមអារ៉ាមរឿងចាប់ព្រះអណុជពីរអង្គរបស់ព្រះមហាក្សត្រ អាប់ឌុលឡា ដែលលួចបង្កើតទំនាក់ទំនងជាមួយមន្ត្រីអារ៉ាប៊ីសាអូឌីតដើម្បីធ្វើរដ្ឋប្រហារ។ រដ្ឋាភិបាលនេះអះអាងថា ក្សត្រពីរអង្គសុំលាលែងពីតំណែងប៉ុណ្ណោះ មិនមែនចាប់ខ្លួនដូចការអះអាងឡើយ។

ក្រោយបែកធ្លាយព័ត៌មានពាក់ព័ន្ធការចាប់ខ្លួនព្រះអណុជពីររបស់ព្រះចៅ អាប់ឌុលឡា អាជ្ញាធរហ្ស៊កដានីបានចេញមុខបកស្រាយ និងទាត់ចោលព័ត៌មាននេះ។ បើយោងតាមសារព័ត៌មាន Times of Israel ដែលស្រង់សម្តីមន្ត្រីយោធាហ្ស៊កដានី ក្សត្រពីរអង្គដែលគេអះអាងថាត្រូវបានចាប់ខ្លួននោះ គ្រាន់តែចូលនិវត្តន៍ប៉ុណ្ណោះ។

មន្ត្រីយោធាហ្ស៊កដានីក៏បានពន្យល់បន្ថែមផងដែរថា ការចូលនិវត្តន៍របស់ក្សត្រទាំងពីរអង្គនេះជាផ្នែកមួយនៃគោលនយោបាយកែទម្រង់ក្នុងវិស័យយោធាដែលត្រូវឲ្យមានការផ្លាស់ប្តូរមុខតំណែងមួយចំនួនផង។ ប៉ុន្តែតាំងពីមានពាក្យចរចាអារ៉ាមពាក់ព័ន្ធការចាប់ខ្លួននេះ គេមិនទាន់បានឃើញព្រះអណុជទាំងពីរអង្គនោះបង្ហាញវត្តមានជាសាធារណៈនៅឡើយទេ។

ព័ត៌មានពាក់ព័ន្ធនឹងការចាប់ខ្លួននេះ ត្រូវបានគេផ្សព្វផ្សាយយ៉ាងទូលំទូលាយកាលពីចុងសប្តាហ៍កន្លងទៅ។ គេអះអាងថា ព្រះចៅអាប់ឌុលឡា បានចេញបញ្ជាដោយផ្ទាល់ឲ្យចាប់ខ្លួនព្រះអណុជទាំងពីរ ក្រោយពេលដែលទ្រង់ទទួលបានព័ត៌មានពីភ្នាក់ងារចារកម្មថា ក្សត្រទាំងពីរមានទំនាក់ទំនងជាសម្ងាត់ជាមួយមន្ត្រីអារ៉ាប៊ីសាអូឌីត។ ក្សត្រពីរអង្គដែលជាប្អូនរបស់ព្រះចៅអាប់ឌុលឡានោះមានដូចជា Faisal bin Hussein និង Ali bin Hussein។

ហ្ស៊កដានីក៏ដូចជាបណ្តាប្រទេសដទៃទៀតនៅក្នុងតំបន់មជ្ឈិមបូព៌ាដែរ សុទ្ធតែបារម្ភ និងសង្ស័យពីគោលបំណងរបស់អារ៉ាប៊ីសាអូឌីតក្នុងការបង្កើនឥទ្ធិពល និងអំណាចរបស់ខ្លួនដើម្បីគ្រប់គ្រងតំបន់។ ដូចឃើញស្រាប់ការបន្តប្រឈមមុខគ្នាជាមួយអ៊ីរ៉ង់ ក៏ដូចជាបន្តចោទប្រកាន់ និងហ៊ុមព័ទ្ធកាតាដែលមានទំនាក់ទំនងជិតស្និទ្ធជាមួយអ៊ីរ៉ង់កន្លងមកដែរ៕