វីដេអូឯកសារសង្គ្រោះជាតិរបស់លោក ហ៊ុន សែន ត្រូវផ្សព្វផ្សាយមុនខួបកំណើត៧មករា

ជាតិ

វីដេអូឯកសារសង្គ្រោះជាតិរបស់លោក ហ៊ុន សែន ត្រូវផ្សព្វផ្សាយមុនខួបកំណើត៧មករា

04, Jan 2018 , 5:06 pm

រូបភាព

ដោយ: លាង ដឺលុច (Leang Delux)

នាយប់ថ្ងៃទី៣ខែមករា ទូរទស្សន៍ជាតិ និងឯកជន ព្រមទាំងបណ្តាញសង្គមហ្វេសប៊ុក បានផ្សព្វផ្សាយយ៉ាងទូលំទូលាយនូវវីដេអូឯកសារ ដែលពិពណ៌នាការដឹកនាំរបស់សម្តេចនាយករដ្ឋមន្ត្រី ហ៊ុន សែន រំដោះកម្ពុជាពីរបបខ្មែរក្រហម។ វីដេអូឯកសារដែលមានចំណងជើងថា «ដំណើរឆ្ពោះទៅរកការសង្គ្រោះជាតិ» ត្រូវបានចែកផ្សាយ មុនគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ប្រារព្ធខួបទី៣៩នៃទិវាជ័យជម្នះលើរបបខ្មែរក្រហមកាលពីថ្ងៃទី៧ខែមករាឆ្នាំ១៩៧៩។

នៅម៉ោង៩យប់ នៃថ្ងៃទី២០ខែមិថុនាឆ្នាំ១៩៧៧ មេបញ្ជាការកងវរសេនាធំលេខ៩២ ហ៊ុន សែន បានធ្វើសេចក្តីសម្រេចចិត្តដ៏គ្រោះថ្នាក់ ដោយនាំយុទ្ធមិត្ត៤នាក់ទៀតចាកចេញដោយថ្មើរជើងពីបន្ទាយ ពីប្រទេសកំណើត និងពីគ្រួសារឆ្ពោះទៅទិសខាងកើតដើម្បីចូលទៅប្រទេសវៀតណាម។ គោលបំណងរបស់មេបញ្ជាការវ័យក្មេងរូបនេះ គឺស្វែងរកជំនួយរបស់ប្រទេសជិតខាងមួយនេះ ដើម្បីរំដោះកម្ពុជា និងប្រជាជនពីរបបវាលពិឃាតប៉ុល ពត។

ទិដ្ឋភាពនេះជាផ្នែកដ៏តូចមួយនៃដំណើរជីវិតរបស់សម្តេច ហ៊ុន សែន កាលពី៤០ឆ្នាំមុន ដែលមាននៅក្នុងវីដេអូឯកសារដែលមានរយៈពេល១ម៉ោងនិង៣៤នាទី។

វីដេអូបានចាប់ផ្តើមជាមួយរូបភាពឯកសារនៃការចាប់ផ្តើមរបបកម្ពុជាប្រជាធិបតេយ្យនាថ្ងៃទី១៧មេសា១៩៧៥ ដែលបង្ហាញពីការកាប់សម្លាប់រង្គាលលើប្រជាជនខ្មែរ ដើម្បីបង្ហាញពីមូលហេតុនៃការចាប់ផ្តើមចលនាតស៊ូរបស់លោក ហ៊ុន សែន នាពេលនោះ រហូតដល់ផ្តួលរំលំរបបប៉ុល ពត និងរំដោះក្រុងភ្នំពេញបានមកវិញនៅវេលាថ្ងៃត្រង់ថ្ងៃទី៧ខែមករាឆ្នាំ១៩៧៩។

វីដេអូឯកសារនេះ ត្រូវបានផ្សព្វផ្សាយជាសាធារណៈ តែប៉ុន្មានថ្ងៃមុនគណបក្សប្រជាជនកម្ពុជាដែលកំពុងដឹកនាំប្រទេសគ្រោងរៀបចំប្រារព្ធខួបទិវា៧មករាលើកទី៣៩ នៅចុងសប្តាហ៍នេះ។

អ្នកនាំពាក្យគណបក្សកាន់អំណាច លោក សុខ ឥសាន បានពន្យល់ប្រាប់សារព័ត៌មានថ្មីៗ ដោយចាត់ទុកវីដេអូឯកសារនេះ មានតម្លៃបែបប្រវត្តិសាស្ត្រមិនត្រឹមតែសម្រាប់គណបក្សរបស់លោកតែប៉ុណ្ណោះទេ ប៉ុន្តែសម្រាប់ប្រជាជនកម្ពុជា ពិសេសមនុស្សជំនាន់ក្រោយ។ លោក សុខ ឥសាន បានបញ្ជាក់យ៉ាងដូច្នេះថា៖«ឯកសារនេះបានពន្យល់អំពីមូលហេតុនៃការកកើតជីវិតទី២របស់យើង។ វាបង្ហាញពីរូបភាពនៃការតស៊ូរបស់ថ្នាក់ដឹកនាំរបស់គណបក្សប្រជាជនកម្ពុជារបស់យើង មុននឹងកម្ពុជាមានកិច្ចព្រមព្រៀងទីក្រុងប៉ារីស និងការបោះឆ្នោតឆ្នាំ១៩៩៣ រហូតដល់ការអនុវត្តនយោបាយឈ្នះឈ្នះរបស់សម្តេចហ៊ុន សែន»។

វីដេអូឯកសារនេះមានជាភាសាខ្មែរ និងអង់គ្លេស ហើយត្រូវបានផលិតដោយគណៈកម្មការស្រាវជ្រាវប្រវត្តិសាស្ត្រ និងអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី ដោយសហការជាមួយសាកលវិទ្យាល័យប្រព័ន្ធផ្សព្វផ្សាយព័ត៌មាន និងសារគមនាគមន៍អន្តរជាតិ។

ដើម្បីអាចពិពណ៌នាលំអិតបានអំពីដំណើរតស៊ូប្រឆាំងរបបប៉ុលពតនេះ ក្រុមអ្នកផលិតឯកសារនេះ បានសម្ភាសសាក្សីទាំងអស់២២នាក់ ដោយរួមមានទាំងតួអង្គឯកគឺសម្តេច ហ៊ុន សែន សម្តេច ប៊ុន រ៉ានី យុទ្ធមិត្ត ពលរដ្ឋខ្មែរ អតីតកម្មាភិបាលយោធារបស់វៀតណាម និងប្រជាជនវៀតណាម រហូតដល់លោក ហ៊ុន ម៉ាណែត ដែលជាកូនប្រុសច្បងរបស់សម្តេច ហ៊ុន សែន ផងដែរ។ លោក ហ៊ុន ម៉ាណែត បាននិយាយអរគុណចំពោះការលះបង់ និងការតស៊ូរបស់មេដឹកនាំជំនាន់មុន ដែលអនុញ្ញាតឲ្យមនុស្សជំនាន់ក្រោយមានឱកាសចូលរួមចំណែកកសាងប្រទេសកម្ពុជាឲ្យកាន់តែរុងរឿង៕