កម្ពុជា ទទួលឥទ្ធិពលខ្សោយពីកូនព្យុះទី១ ដែលនឹងធ្វើឲ្យមានភ្លៀងពីថ្ងៃទី៥-៩ ខែមករា

ជាតិ

កម្ពុជា ទទួលឥទ្ធិពលខ្សោយពីកូនព្យុះទី១ ដែលនឹងធ្វើឲ្យមានភ្លៀងពីថ្ងៃទី៥-៩ ខែមករា

04, Jan 2018 , 8:19 pm

រូបភាព

ដោយ: ថ្មីៗ

កម្ពុជា នឹងទទួលរងឥទ្ធិពលខ្សោយពីកូនព្យុះទី១ ប្រចាំឆ្នាំ២០១៨ ឈ្មោះបូឡាវិន។ ឥទ្ធិពលកូនព្យុះនេះ ធ្វើឲ្យកម្ពុជា នៅថ្ងៃទី៥ និងទី៦ ខែមករា នឹងមានភ្លៀងធ្លាក់នៅពេលថ្ងៃក្នុងកម្រិតតិច ទៅបង្គួរ ពិសេស នៅតំបន់មាត់សមុទ្រ និងតំបន់ទំនាបកណ្តាល និងភ្លៀងបន្តធ្លាក់រាយប៉ាយពីតិច ទៅមធ្យម នៅក្នុងពេលយប់ ក្នុងក្របខណ្ឌស្ទើរទូទាំងប្រទេស ពីថ្ងៃទី៧ ដល់ទី៩ ខែមករា។

វិសម្ពាធ ដែលបានកើតឡើងនៅភាគអាគ្នេយ៍ប្រទេសហ្វីលីពីន បានវិវត្តខ្លួនទៅជាកូនព្យុះទី១ ប្រចាំឆ្នាំ២០១៨ ឈ្មោះ បូឡាវិន(BOLAVEN) នឹងកំពុងស្ថិតនៅក្នុងសមុទ្រចិនខាងត្បូង។ នេះបើតាមសេចក្តីជូនដំណឹងបន្ថែមពីស្ថានភាពអាកាសធាតុ របស់ក្រសួងធនធានទឹក និងឧតុនិយម។

បើតាមការវិភាគ និងព្យាករណ៍របស់ក្រសួងជំនាញដដែល នៅល្ងាចថ្ងៃទី៥ ខែមករា ឥទ្ធិពលរបស់កូនព្យុះបូឡាវិន នឹងបែងចែកជា២ផ្នែក គឺផ្នែកដែលមានឥទ្ធិពលខ្លាំង នឹងធ្វើដំណើរទៅកាន់ឆ្នេរប្រទេសវៀតណាមភាគកណ្តាល ឯផ្នែកមួយទៀតដែមានឥទ្ធិពលមធ្យម នឹងធ្វើដំណើរមកកាន់តំបន់ដីសណ្តមេគង្គ។

អត្ថបទទាក់ទង

កម្ពុជា នឹងមានភ្លៀងពីថ្ងៃទី៥-៩ ខែមករា

ដូច្នេះកម្ពុជា នឹងទទួលឥទ្ធិពលពីកូនព្យុះខ្សោយ ហើយអាកាសធាតុចាប់ពីថ្ងៃទី៥ និងទី៦ ខែមករា មានពពកច្រើននៅផ្ទៃមេឃ ហើយនឹងមានភ្លៀងធ្លាក់ ពីតិចទៅបង្គួរ នៅពេលថ្ងៃ ពិសេសនៅ តំបន់មាត់សមុទ្រ និងតំបន់ទំនាបកណ្តាល។ នេះបើតាមក្រសួងធនធានទឹកដដែល ដោយបានឲ្យដឹងទៀតថាពីថ្ងៃទី៧ ដល់ទី៩ ខែមករា ភ្លៀងបន្តធ្លាក់រាយប៉ាយពីតិច ទៅមធ្យម នៅក្នុងពេលយប់ ក្នុងក្របខណ្ឌស្ទើរទូទាំងប្រទេស៕