ពលរដ្ឋជាង១ម៉ឺននាក់ បានប្រើប្រាស់សេវារថយន្តក្រុងសាធារណៈក្នុងមួយថ្ងៃ

ជាតិ

ពលរដ្ឋជាង១ម៉ឺននាក់ បានប្រើប្រាស់សេវារថយន្តក្រុងសាធារណៈក្នុងមួយថ្ងៃ

14, Jan 2018 , 12:03 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ រថយន្តក្រុងសាធារណៈចំនួន១៥៧គ្រឿង ដែលកំពុងដំណើរការលើផ្លូវចំនួន៩ខ្សែ នៅក្រុងភ្នំពេញ។ មានពលរដ្ឋជាង១ម៉ឺននាក់ ក្នុងមួយថ្ងៃ បានប្រើប្រាស់សេវារថយន្តក្រុងនេះ ពោលចំនួននេះ គឺបានកើនឡើងទ្វេដង។

រថយន្តក្រុងសាធារណៈក្នុងរាជធានីភ្នំពេញ ដែលកំពុងដំណើរការមកដល់សព្វថ្ងៃនេះ មានចំនួន ១៥៧គ្រឿង ដោយរត់លើផ្លូវចំនួន ៩ខ្សែ។ ប្រជាពលរដ្ឋ កម្មកររោងចក្រ សិស្ស និស្សិត ជនពិការ និងព្រះសង្ឃ ដែលបានប្រើប្រាស់សេវារថយន្តក្រុងសាធារណៈប្រចាំថ្ងៃ បានកើនទ្វេដង ពោលគឺពីប្រមាណ ៥ពាន់ ទៅ ៦ពាន់នាក់ កើនឡើង ប្រមាណពី១ម៉ឺន ២ពាន់នាក់ ទៅ១ម៉ឺន៣នាក់។ នេះបើតាមលោក ម៉េត មាសភក្ដី អ្នកនាំពាក្យសាលារាជធានីភ្នំពេញ ដែលបានថ្លែងប្រាប់សារព័ត៌មានថ្មីៗតាមទូរសព្ទ មុននឹងបន្តបញ្ជាក់ថា៖«រថយន្តក្រុងសាធារណៈ ជាចំណែកមួយដែលចូលរួមកាត់បន្ថយការកកស្ទះចរាចរណ៍ក្នុងក្រុងភ្នំពេញ ពិសេសដើម្បីកុំឲ្យមានការកកស្ទះចរាចរណ៍ មិនមែនផ្អែកតែលើរថយន្តតែមួយមុខនោះទេ គឺត្រូវមានកត្តាចូលរួមជាច្រើន»។

ទន្ទឹមនឹងនេះ សាលារាជធានីភ្នំពេញ នឹងបន្ថែមខ្សែរត់ថ្មីបន្ថែមទៀត ដើម្បីផ្ដល់ភាពងាយស្រួលដល់ប្រជាពលរដ្ឋ ខណៈនៅខែមេសាខាងមុខ ភាគីជប៉ុន នឹងផ្ដល់រថយន្តក្រុង៨០គ្រឿងដល់កម្ពុជា និងសន្យាផ្ដល់ជំនួយរថយន្ត១៤០ ចាប់ពីឆ្នាំ២០១៨ ដល់២០២០ ដែលគិតជាទឹកប្រាក់សរុប៨លានដុល្លារ៕