ជាតិ
សង្គមជាតិ
នឹងមានផ្លូវថ្មើរជើងពីស្ពានភ្លោះកោះពេជ្រដល់ស្ពានព្រះមុនីវង្ស លោក ឃួន ស្រេង អភិបាលរាជធានីភ្នំពេញ
× ដំណឹងល្អសម្រាប់អ្នកចូលចិត្តដើរ! ចាប់ពីថ្ងៃទី២២ ខែមករា នេះ រដ្ឋបាលរាជធានីភ្នំពេញ ចាប់ផ្ដើមអនុវត្តសិក្សាគម្រោងសាងសង់ផ្លូវថ្មើរជើងស្របតាមមាត់ទន្លេដំណាក់កាលទី២ ដោយចាប់ពីចំណុចស្ពានភ្លោះកោះពេជ្រ រហូតដល់គល់ស្ពានព្រះមុនីវង្ស។
អភិបាលរាជធានីភ្នំពេញ លោក ឃួន ស្រេង កាលពីថ្ងៃទី១៨ ខែមករា បានចេញសេចក្ដីជូនដំណឹងពីការសិក្សាវាស់វែងកំណត់ព្រំប្រទល់អចលនវត្ថុ និងរុះរើចេញនូវចំណែកសំណង់ផ្សេងៗដែលលយចូលច្រាំងទន្លេសាធារណៈក្នុងភូមិសាស្ត្រខណ្ឌចំការមន។ លោកបានបញ្ជាក់ថា អាជ្ញាធរ គ្រោងសាងសង់ផ្លូវថ្មើរជើងស្របតាមមាត់ទន្លេក្នុងដំណាក់កាលទី២ចន្លោះស្ពានភ្លោះកោះពេជ្រ និងស្ពានព្រះមុនីវង្ស ដើម្បីលើកកម្ពស់សោភណភាព និងការរៀបចំសណ្ដាប់ធ្នាប់នៅតាមច្រាំងទន្លេឲ្យបានរៀបរយ «សំដៅបម្រើឲ្យការកម្សាន្តរបស់ប្រជាពលរដ្ឋទូទៅ»។
ដើម្បីឲ្យសម្រេចបានលទ្ធផលទៅតាមការគ្រោងទុក លោក ឃួន ស្រេង បានស្នើប្រជាពលរដ្ឋ និងអ្នកពាក់ព័ន្ធទាំងអស់ដែលមានលំនៅដ្ឋាន ឬអាជីវកម្មដ្ឋាន កំពុងអាស្រ័យផល(ទទួលផលប្រយោជន៍) នៅទីតាំងខាងលើ រៀបចំរុះរើចេញជាបន្ទាន់នូវចំណែកនៃសំណង់ផ្សេងៗ ដែលបានលយចូលច្រាំងទន្លេសាធារណៈ។
ជាមួយគ្នានេះ អភិបាលរាជធានីភ្នំពេញ បានបញ្ជាក់ថា៖ « ត្រូវត្រៀមរៀបចំឯកសារផ្សេងៗ ដែលពាក់ព័ន្ធទៅនឹងសិទ្ធិកាន់កាប់ ដើម្បីចូលរួមបង្កលក្ខណៈងាយស្រួលដល់សមត្ថកិច្ចធ្វើកិច្ចការនេះ»៕
© រក្សាសិទ្ធិដោយ thmeythmey.com