ជាតិ
កម្ពុជា មានអ្នកជំនាញទេសចរណ៍ជាង២ពាន់នាក់ ដែលទទួលស្គាល់ពីលេខាធិការដ្ឋានអាស៊ាន រូបភាពពីក្រសួងទេសចរណ៍
× ភ្នំពេញ៖ ក្រសួងទេសចរណ៍ បញ្ជាក់ថា បច្ចុប្បន្នកម្ពុជាមានអ្នកជំនាញទេសចរណ៍ជាង ២ពាន់នាក់ ដែលទទួលស្គាល់ដោយលេខាធិការដ្ឋានអាស៊ាន និងប្រទេសជាសមាជិក។ អ្នកជំនាញទេសចរណ៍កម្ពុជា ជាង ២ពាន់នាក់នេះ បានឆ្លងកាត់កម្មវិធីសិក្សាជំនាញវិជ្ជាជីវៈទេសចរណ៍អាស៊ានផងដែរ។
លោក ថោង ខុន រដ្ឋមន្ត្រីក្រសួងទេសចរណ៍ បានលើកឡើងថា បច្ចុប្បន្ន កម្ពុជាមានអ្នកជំនាញទេសចរណ៍ប្រមាណជាង២ពាន់នាក់ ដែលបានឆ្លងកាត់កម្មវិធីសិក្សាជំនាញវិជ្ជាជីវៈទេសចរណ៍អាស៊ាន ដែលដាក់ចុះដោយក្រសួងទេសចរណ៍។ លោករដ្ឋមន្ត្រី បន្តថាអ្នកជំនាញទាំងនោះ មានការទទួលស្គាល់ ដោយលេខាធិការដ្ឋានអាស៊ាន និងប្រទេសជាសមាជិក រួមទាំងមានឱកាសផ្លាស់ការងារ ក្នុងតំបន់ផងដែរ។ នេះបើតាមទំព័រហ្វេសប៊ុកផ្លូវការរបស់ក្រសួងទេសចរណ៍។
រដ្ឋមន្ត្រីក្រសួងទេសចរណ៍ បញ្ជាក់ថា តាមការសិក្សា ក្នុងចំណោមអ្នកជំនាញទេសចរណ៍កម្ពុជា ប្រមាណ៦២ម៉ឺននាក់ មានអ្នកជំនាញប្រមាណ ៤០ភាគរយ បានឆ្លើយតបទៅនឹងស្តង់ដាសមត្ថភាពអាស៊ាន។ ជាមួយគ្នានេះ ក្រសួងក៏បានបណ្តុះបណ្តាល និងវាយតម្លៃអ្នកជំនាញទេសចរណ៍ប្រមាណ៦០ភាគរយបន្ថែមទៀតផងដែរ។
លោក ថោន ខុន បន្ថែមថា តាមការព្យាករ នៃការមកដល់របស់ភ្ញៀវទេសចរអន្តរជាតិក្នុងឆ្នាំ២០២០ ប្រមាណ៧លាននាក់ ឧស្សាហកម្មទេសចរណ៍ នឹងបង្កើតឱកាសការងារផ្ទាល់ ប្រមាណ១លាននាក់ និងប្រមាណ១,២លាននាក់ នៅឆ្នាំ២០២៥ ព្រមទាំងប្រមាណ១,៧លាននាក់ នៅឆ្នាំ២០៣០។
សូមបញ្ជាក់ថា ក្រសួងទេសចរណ៍ នឹងអនុវត្តកម្មវិធីបណ្ដុះបណ្ដាលជំនាញទេសចរណ៍អាស៊ាន នៅតាមវិទ្យាល័យចំណេះទូទៅ និងបច្ចេកទេស ដោយសហការជាមួយក្រសួងអប់រំ និងក្រសួងជំនាញផ្សេងៗ។ កម្មវិធីបណ្ដុះបណ្ដាលនេះ នឹងជួយឲ្យសិស្សដែលបញ្ចប់ថ្នាក់ទី៩ អាចបន្តការសិក្សាជំនាញវិជ្ជាជីវៈទេសចរណ៍រយៈពេល៣ឆ្នាំ ដោយទទួលបានសញ្ញាបត្រវិជ្ជាជីវៈ ដែលមានតម្លៃស្មើសញ្ញាបត្រមធ្យមសិក្សាទុតិយភូមិ៕
Tag:
អ្នកជំនាញទេសចរណ៍
អាស៊ាន
ថោន ខុន
© រក្សាសិទ្ធិដោយ thmeythmey.com