ជាតិ
MRC បើកការប្រកួតនិពន្ធរឿងខ្លីសម្រាប់ពលរដ្ឋកម្ពុជា ឡាវ ថៃ និងវៀតណាម
× គណៈកម្មការទន្លេមេគង្គ (MRC) បានប្រកាសបើកការប្រកួតនិពន្ធរឿងខ្លីសម្រាប់ប្រជាពលរដ្ឋក្នុងតំបន់មេគង្គ មុនកិច្ចប្រជុំកំពូលប្រជុំកំពូលលើកទីបីរបស់ខ្លួន។ បើតាមសេចក្តីប្រកាសព័ត៌មានពីក្រុងវៀងចន្ទន៍ កាលពីថ្ងៃទី១៥ ខែកុម្ភៈ ការប្រកួតប្រជែងធ្វើឡើងក្រោមប្រធានបទ «តើទន្លេមេគង្គមានអត្ថន័យយ៉ាងដូចម្តេចចំពោះអ្នក?»។
ពលរដ្ឋកម្ពុជា ឡាវ ថៃ និងវៀតណាម មានឱកាសបង្ហាញសមត្ថភាពរបស់ខ្លួន តាមរយៈការចូលរួមប្រកួតប្រជែងនិពន្ធរឿងខ្លី ដែលពាក់ព័ន្ធផលប្រយោជន៍របស់ទន្លេមេគង្គ។ ក្រោមប្រធានបទ «តើទន្លេមេគង្គមានអត្ថន័យយ៉ាងដូចម្តេចចំពោះអ្នក?» ការប្រកួតនេះត្រូវបានរៀបចំឡើងដើម្បីអបអរសាទរទិវាទន្លេមេគង្គ នៅថ្ងៃទី៥ ខែមេសា និងកិច្ចប្រជុំកំពូលលើកទីបីនៃគណៈកម្មការទន្លេមេគង្គ ដែលមានការចូលរួមពីនាយករដ្ឋមន្ត្រីនៃបណ្តាប្រទេសក្នុងទន្លេមេគង្គ។
ការប្រកួតនេះ មានបំណងស្វែងរកសំណេរអត្ថបទខ្លីៗ ដែលរំលេចពីទំនាក់ទំនងរវាងទន្លេមគេង្គ និងប្រជាជនដែលរស់នៅតាមដងទន្លេនេះ ក៏ដូចជាសារសំខាន់នៃទំនាក់ទំនងនេះចំពោះពួកគេ។
លោក Anoulak Kittikhoun ប្រធានផ្នែកយុទ្ធសាស្ត្រ និងភាពជាដៃគូ និងជាប្រធានផ្នែកទំនាក់ទំនងនៃលេខាធិការដ្ឋាន MRC មានប្រសាសន៍ថា៖ «ការប្រកួតនេះ គឺជាគំនិតផ្តួចផ្តើមមួយ ក្នុងចំណោមគំនិតផ្តួចផ្តើមជាច្រើនរបស់យើង ដើម្បីលើកកម្ពស់កិច្ចសហប្រតិបត្តិការរវាងប្រទេសក្នុងតំបន់មេគង្គ និងឆ្លុះបញ្ចាំងពីភាពចម្រុះនៃទន្លេរបស់យើង។ ការប្រកួតប្រជែងនេះផ្តល់ឲ្យអ្នកចូលរួមនូវឱកាសបង្ហាញពីតួនាទីដ៏សំខាន់របស់ទន្លេមេគង្គ ក្នុងជីវិតប្រចាំថ្ងៃរបស់ពួកគេ បញ្ហាប្រឈមដែលពួកគេជួបប្រទះ និងអ្វីដែលយើងអាចធ្វើបាន ដើម្បីឆ្លើយតបចំពោះបញ្ហាទាំងនេះ»។
ដើម្បីចូលរួមក្នុងការប្រកួតប្រជែងនេះ បេក្ខជនត្រូវផ្ញើទម្រង់ពាក្យសុំដែលបំពេញរួច ដោយពួកគេត្រូវសរសេរអត្ថបទជាភាសាអង់គ្លេស ឬជាភាសាកំណើតរបស់ខ្លួន មិនឲ្យលើសពី ៦០ពាក្យ រួចហើយផ្ញើទៅកាន់អ៊ីមេល
[email protected]។
ការប្រកួតនឹងទទួលយកពាក្យសុំទាំងនេះ ត្រឹមថ្ងៃទី ១៥ ខែ មីនា ឆ្នាំ ២០១៨។ ការវាយតម្លៃលើអត្ថបទសំណេរ នឹងធ្វើឡើងដោយគណៈកម្មាធិការវាយតំលៃមួយក្រុម បន្ទាប់ពីការប្រកួតនេះបញ្ចប់ ហើយការប្រកាសជ័យលាភី នឹងត្រូវធ្វើឡើង មុនចុងខែ មីនា។
ជ័យលាភីនៃការប្រកួតប្រជែងនេះ នឹងទទួលបានរង្វាន់ជាសាច់ប្រាក់ពី ៥០ ដល់ ៣០០ ដុល្លារ រួមនឹងវិញ្ញាបនបត្រ ហើយអាចនឹងត្រូវបានអញ្ជើញឱ្យចូលរួមក្នុងសន្និសីទអន្តរជាតិរបស់ MRC ដែលនឹងត្រូវរៀបចំឡើងក្នុងខេត្តសៀមរាប ប្រទេសកម្ពុជា នៅថ្ងៃទី ២-៣ ខែ មេសា។ សំណេររបស់ជ័យលាភី អាចនឹងត្រូវដាក់តាំងបង្ហាញ ក្នុងសន្និសីទនេះ និងក្នុងទិវាទន្លេមេគង្គ បង្ហាញទៅកាន់ថ្នាក់ដឹកនាំនៃប្រទេសមេគង្គនៅក្នុងកិច្ចប្រជុំកំពូលលើកទី ៣ របស់ MRC ព្រមទាំងបង្ហាញក្នុងរបាយការណ៍ផ្សព្វផ្សាយដទៃទៀត៕
© រក្សាសិទ្ធិដោយ thmeythmey.com