អន្តរជាតិ
វិបត្តិស៊ីរី៖ មេទ័ពអាមេរិកថា រុស្ស៊ីបង្កាត់ភ្លើងផង ហើយពន្លត់ភ្លើងផង ឧត្តមសេនីយ៍ Joseph Votel ប្រមុខកងទ័ពអាមេរិកប្រចាំមជ្ឈិមបូព៌ា (រូបភាព៖ AFP)
× មេទ័ពអាមេរិកប្រចាំតំបន់មជ្ឈិមបូព៌ាឧត្តមសេនីយ៍ Joseph Votel បានចោទរុស្ស៊ីចំៗថា ជាអ្នកដុតបញ្ឆេះបញ្ហានៅស៊ីរី ហើយបន្ទាប់មកដើរតួជាអ្នកជួយដោះស្រាយបញ្ហាទៅវិញ។ លោក Votel និយាយបែបនេះ ក្នុងកិច្ចប្រជុំស្ដីពីសន្តិសុខនៅមជ្ឈិមបូព៌ា ជាមួយគណៈកម្មាធិការយោធា នៃរដ្ឋសភាអាមេរិកនៅថ្ងៃទី២៧ ខែកុម្ភៈ។ លោក Votel ចាត់ទុករុស្ស៊ី ជាគូប្រជែងប្រវត្តិសាស្ត្រ ដែលគ្មានផលប្រយោជន៍រួមគ្នាឡើយ។
ឧត្តមសេនីយ៍ Joseph Votel មេបញ្ជាការកម្លាំងអាមេរិកនៅមជ្ឈិមបូព៌ា (USCENTCOM) បានរាយការណ៍ទៅគណៈកម្មាធិការយោធា នៃរដ្ឋសភាអាមេរិក ពីប្រតិបត្តិការបោសសម្អាតក្រុមរដ្ឋឥស្លាម និងសង្គ្រាមនៅស៊ីរី អាហ្វហ្គានីស្ថាន និងយេម៉ែន ដែលស្ថិតក្រោមដែនអំណាចរបស់ខ្លួន។ សម្រាប់ជម្លោះនៅស៊ីរី មេទ័ពអាមេរិករូបនេះ បានទម្លាក់កំហុសលើរុស្ស៊ី ចំពោះវិបត្តិបង្ហូរឈាមដែលឈានដល់ឆ្នាំទី៧ ហើយ។
យោងតាមទីភ្នាក់ងារព័ត៌មាន AFP ចំពោះមុខសមាជិកសភា លោកឧត្តមសេនីយ៍ Votel និយាយថា ទាំងផ្លូវការទូត ទាំងផ្លូវយោធា រុស្ស៊ីដើរតួជាអ្នកបង្កាត់ភ្លើងផង និងអ្នកពន្លត់ភ្លើងផង។ ពោល គឺរុស្ស៊ីបញ្ឆេះកម្ដៅជម្លោះ រវាងភាគីស៊ីរីទាំងអស់ រួចក៏ចេញមុខធ្វើជាអ្នកជួយដោះស្រាយបញ្ហាវិញ ដោយប៉ុនប៉ងធ្វើឲ្យភាគីផ្សេងទៀតទន់ខ្សោយ និងគ្មានឥទ្ធិពលតថ្លៃអ្វីបានឡើយអំឡុងពេលចរចា។ លោកបន្តថា រុស្ស៊ីព្យាយាមទប់ស្កាត់ឥទ្ធិពលអាមេរិកក្នុងតំបន់ដែរ។
រុស្ស៊ីបានលូកដៃចូលជម្លោះស៊ីរីនៅចុងឆ្នាំ២០១៥ និងបានបញ្ជូនយោធារបស់ខ្លួនទៅកាន់ស៊ីរី ដោយអះអាងថា ទទួលបានការអញ្ជើញពីសំណាក់ប្រធានាធិបតីស៊ីរី Bashar al-Assad ។ ក្រោមជំនួយរបស់យោធារុស្ស៊ី ជាពិសេសកម្លាំងអាកាសតែម្ដង របបក្រុងដាម៉ាស់បានដណ្ដើមទឹកដីត្រឡប់មកវិញជាច្រើន ខណៈដែលកម្លាំងឧទ្ទាមប្រឆាំងគាំទ្រដោយអាមេរិក បានបាត់បង់តំបន់គ្រប់គ្រងរបស់ខ្លួនជាបន្តបន្ទាប់។
មេទ័ពអាមេរិកលោក Votel ក៏ចោទក្រុងមូស្គូបានថា ប្រើប្រាស់យន្តការខ្លួនដោះស្រាយវិបត្តិស៊ីរី និងបោះបង់យន្តការអង្គការសហប្រជាជាតិវិញ។ ក្រុងមូស្គូ បានបន្តជំរុញគំនិតផ្ដួចផ្ដើមថ្មីដើម្បីជំនួសការចរចានយោបាយដែលដឹកនាំដោយលោកខាងលិច មិនថានៅស៊ីរី ឬអាហ្វហ្គានីស្ថាន សំដៅកាត់បន្ថយឥទ្ធិពលរបស់ក្រុងវ៉ាស៊ីនតោន។ នេះជាការបញ្ជាក់របស់លោក Votel លើកឡើងថា តួនាទីរបស់រុស្ស៊ីបង្កជាអស្ថិរភាពទៅវិញទេ។
អ្វីគួរឲ្យចាប់អារម្មណ៍ ប្រមុខកងទ័ពអាមេរិកប្រចាំមជ្ឈិមបូព៌ារូបនេះក៏ចោទរុស្ស៊ីថា បានប្រើប្រាស់ជម្លោះប្រដាប់នៅស៊ីរី ធ្វើជាកន្លែងសាកសព្វាវុធរបស់ខ្លួនទៀត។ លោក Votel និយាយថា រុស្ស៊ីបានសាកល្បងអាវុធ និងក្បួនយោធានៅស៊ីរី ដែលបង្កការខូចខាត និងសម្លាប់មនុស្សជាច្រើន។ ការកើនឡើងវត្តមានប្រព័ន្ធបាញ់មីស៊ីលពីផ្ទៃដី ទៅផ្ទៃអាកាសនៅតំបន់មជ្ឈិមបូព៌ា បានគំរាមកំហែងកម្លាំងយោធាអាមេរិកយ៉ាងខ្លាំង៕
Tag:
ស៊ីរី
អាមេរិក
រុស្ស៊ី
© រក្សាសិទ្ធិដោយ thmeythmey.com