អន្តរជាតិ
ហ្វេសប៊ុកបញ្ចប់ការសាកល្បង Explore Feed នៅកម្ពុជា និងប្រទេស៥ទៀត
× ក្រុមហ៊ុនបណ្តាញសង្គមហ្វេសប៊ុក (Facebook) បានប្រកាសបញ្ចប់ការសកល្បងដំណើរការ Explore Feed នៅប្រទេសចំនួន៦ ដែលក្នុងនោះមានកម្ពុជា ស្រីលង្កា បូលីវី ស្លូវ៉ាគី ស៊ែប៊ី និងហ្គាតេម៉ាឡា។ ការសម្រេចនេះ មានន័យថា នឹងគ្មានការបែងចែកព័ត៌មានដោយឡែករវាងគណនី និងទំព័រហ្វេសប៊ុកទៀតហើយ។
លោក Adam Mosseri ប្រធានផ្នែក News Feed របស់ក្រុមហ៊ុនហ្វេសប៊ុក បានសរសេរនៅលើប្លក់របស់ខ្លួន កាលពីថ្ងៃទី១ ខែមីនា កន្លងមកថា ពេលវេលានៃការសាកល្បង Explore Feed នៅប្រទេសចំនួន៦ឈានដល់ទីបញ្ចប់ហើយ។
លោក Mosseri បានសរសេរថា ហ្វេសប៊ុកបានធ្វើការបន្ទាន់សម័យលើកម្មវិធីជាច្រើន ដូចជាប៊ូតុង Like ប្រតិកម្ម (Reactions), Live Video និង GIFs ជាដើម ហើយកម្មវិធីទាំងនោះ ទទួលបាននូវការចូលរួមយោបល់វិជ្ជមានដ៏គួរឲ្យកត់សម្គាល់។
ទាក់ទងនឹង Explore Feed ដែលហ្វេសប៊ុក ចង់ភ្ជាប់ទំនាក់ទំនងកាន់តែរឹងមាំរវាងមិត្តភក្តិ និងគ្រួសារ តាមរយៈការបែងចែកឲ្យដាច់ពីទំព័រក្រុមហ៊ុន និងទំព័រពាណិជ្ជកម្មផ្សេងៗ ប៉ុន្តែលទ្ធផលមិនបានដូចការរំពឹងនោះឡើយ។ ហ្វេសប៊ុកទទួលបានមតិយោបល់ (Feedback) ជាច្រើនពីសំណាក់អ្នកប្រើប្រាស់នៅកម្ពុជា ស្រីលង្កា បូលីវី ស្លូវ៉ាគី ស៊ែប៊ី និងហ្គាតេម៉ាឡា ដែលសុទ្ធតែត្អូញត្អែ ចំពោះការបែងចែក News Feed បែបនេះ។
លោក Adam Mosseri បានបញ្ជាក់ថា ការសម្រេចបញ្ចប់ការសាកល្បង Explore Feed ដែលចាប់ផ្តើមកាលពីខែតុលា ឆ្នាំ២០១៧ នៅប្រទេសទាំង៦នោះ គឺដោយសារតែហ្វេសប៊ុកផ្អែកលើមតិយោបល់ចូលពីសំណាក់អ្នកប្រើប្រាស់។
ប្រធាន News Feed ហ្វេសប៊ុករូបនេះ បានបញ្ជាក់ថា ហ្វេសប៊ុកនៅតែបន្តប្រើប្រាស់មធ្យោបាយស្ទាបស្ទង់មតិរាល់ការសាកល្បងផលិតផលថ្មីរបស់ខ្លួន ដើម្បីឲ្យការផ្សព្វផ្សាយព័ត៌មាន News Feed កាន់តែទូលំទូលាយ។
ទោះបីជាយ៉ាងណាក៏ដោយ គិតត្រឹមព្រឹកថ្ងៃសុក្រ ទី២ ខែមីនា នេះ Explore Feed នៅតែបន្តវត្តមានលើគណនីហ្វេសប៊ុករបស់អ្នកប្រើប្រាស់កម្ពុជានៅឡើយ៕
Tag:
ហ្វេសប៊ុក
Explore Feed
© រក្សាសិទ្ធិដោយ thmeythmey.com