អន្តរជាតិ
ក្រុមការងារអាស៊ាន-ចិន ជួបគ្នានៅវៀតណាម ជជែកពី DoC និង CoC រូបភាព៖ ក្រសួងការបរទេសចិន
× សមាគមប្រជាជាតិអាស៊ីអាគ្នេយ៍ និងចិន នៅថ្ងៃ១ និង២ មីនានេះ នឹងរៀបចំកិច្ចប្រជុំក្រុមការងាររួមគ្នាលើកទី២៣ ស្តីពីការអនុវត្តសេចក្តីថ្លែងការណ៍ស្តីពីភាគីនៃប្រតិបត្តិសមុទ្រចិនខាងត្បូង (DoC) នៅក្នុងប្រទេសវៀតណាម ។ ភាគីទាំងពីរ ក៏នឹងចាប់ផ្តើមការពិគ្រោះយោបល់គ្នាលើការបង្កើតក្រមប្រតិបត្តិសម្រាប់អនុវត្ត និងគ្រប់គ្រងនៅក្នុងសមុទ្រចិនខាងត្បូងផងដែរ ។
អ្នកនាំពាក្យក្រសួងការបរទេសចិន លោក លូ កាង នៅថ្ងៃ២៨ កុម្ភៈ នាសន្និសីទសារព័ត៌មានប្រចាំថ្ងៃ បានឲ្យដឹងថា ក្រុមការងាររួមចិន និងអាស៊ាន នឹងបើកិច្ចប្រជុំពីរថ្ងៃ នៅក្នុងខេត្ត Nha Trang របស់វៀតណាម ។ តាមរយៈជំនួបនេះ លោក រំពឹងថា ភាគីពាក់ព័ន្ធនឹងអាចមានឱកាសដើម្បីផ្លាស់ប្តូរទស្សនៈគ្នាលើការអនុវត្ត DoC , ការលើកកម្ពស់កិច្ចសហប្រតិបត្តិការដែនសមុទ្រ ក៏ដូចជាការពិគ្រោះយោបល់លើក្រមប្រតិបត្តិសមុទ្រចិនខាងត្បូង ( CoC ) ។
ខណៈការរបាយការណ៍នៅតែបន្តចុះផ្សាយពីសកម្មភាពចិននៅក្នុងតំបន់សមុទ្រចិនខាងត្បូង ក៏ដូចជាលទ្ធភាពនៃការប្រឈមគ្នារវាងចិន និងអាមេរិកនៅតំបន់នោះ អ្នកនាំពាក្យខាងលើ បានពណ៌នាពីស្ថានភាពនៅក្នុងសមុទ្រចិនខាងត្បូង ថាមានស្ថិរភាពបំផុត ។ ស្ថិរភាពនេះ លោក អះអាងថា កើតឡើងបានដោយសារតែកិច្ចប្រឹងប្រែងរបស់ចិន និងប្រទេសនៅក្នុងតំបន់ប៉ុណ្ណោះ ។
លោក ក៏បានសង្កត់ធ្ងន់យ៉ាងដូច្នេះថា៖« ចិន និងប្រទេសអាស៊ាន មានឆន្ទៈ និងទំនុកចិត្តក្នុងការបន្តកិច្ចសន្ទនា និងសហប្រតិបត្តិការ ក៏ដូចជាពុះពារជាមួយគ្នាសម្រាប់ការដំណើរការកាន់តែល្អ និងរឹងមាំនៃស្ថានភាពនៅក្នុងតំបន់ » ។
គួរជម្រាបផងដែរថា សមុទ្រចិនខាងត្បូង គឺជាដែនជម្លោះអធិបតេយ្យមួយដែលមានភាគីពាក់ព័ន្ធអាស៊ានដូចជា ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន ។ កន្លងមក លិខិតូបករណ៍ពាក់ព័ន្ធនឹងជម្លោះសមុទ្រចិនខាងត្បូងខាងត្បូង ដែលរឹងមាំជាងគេ ដែលភាគីបានសម្រេចបាននោះគឺ DoC ។ លិខិតូបករណ៍នេះ ត្រូវបានអ្នកជំនាញមួយចំនួន យល់ឃើញថា មិនមានចរិកចាប់បង្ខំភាគី ហើយ ក៏មិនមានយន្តការច្បាស់លាស់សម្រាប់គ្រប់គ្រងតំបន់ជម្លោះផងដែរ ។
ដូច្នេះហើយទើបបានជាភាគីពាក់ព័ន្ធអាស៊ាន និងចិន នៅចុងឆ្នាំមុន បានព្រមព្រៀងគ្នាចុះហត្ថលេខាលើក្របខណ្ឌក្រមប្រតិបត្តិសមុទ្រចិនខាងត្បូង ដែលសំដៅលើយន្តការបឋម ក្នុងការឈានទៅដល់ការបង្កើតក្រមប្រតិបត្តិមួយសម្រាប់គ្រប់គ្រងសកម្មភាពផ្សេងៗនៅទីនោះ ។ តែយន្តការបែបណា នឹងត្រូវដាក់បញ្ចូលនៅក្នុងក្រមនេះ នៅមិនទាន់មានភាពជាក់លាក់ឡើយ ដ្បិតភាគីពាក់ព័ន្ធ ក៏ទើបតែចាប់ផ្តើមនីតិវិធីចរចា និងពិគ្រោះយល់គ្នា ជាមួយនិងឆន្ទៈធ្វើសម្បទានឲ្យគ្នាទៅវិញទៅមកផង៕
Tag:
ចិន
វៀតណាម
អាស៊ាន
សមុទ្រចិនខាងត្បូង
© រក្សាសិទ្ធិដោយ thmeythmey.com