ពីនេះ ពីនោះ
ព័ត៍មានសុខភាព
អ្នកដែលខ្វះជីវជាតិក្នុងខ្លួនអាចមានអាការៈបែបណាខ្លះ?
× តើអ្នកកំពុងតែអស់កម្លាំង ស្ងួតស្បែក ឬផ្តាសាយទៀតហើយមែនទេ? បើសិនជាអ្នកយល់ថា មានអ្វីមួយតិចតួចកើតឡើងក្នុងខ្លួន អ្នកប្រហែលជាអាចដឹងថា វាជាការកង្វះនូវជីវជាតិមួយចំនួនហើយមើលទៅ។ វាអាចជួយដល់កោសិកា និងសរីរាង្គជាច្រើនក្នុងខ្លួនធ្វើការបានល្អ ហើយក៏អាចបង្កើនមុខងារប្រព័ន្ធភាស៊ាំថែមទៀត។ ជាធម្មតា មធ្យោបាយដ៏ល្អបំផុតក្នុងការទទួលបានជីវជាតិនេះគ្រប់គ្រាន់ គឺញ៉ាំអាហារដែលមានជីវជាតិទាំងនេះ។ យ៉ាងណាមិញ តើវាមានរោគសញ្ញាអ្វីខ្លះទៅដែលបញ្ជាក់ថា ជាការកង្វះជីវជាតិក្នុងខ្លួន?
អស់កម្លាំង
បើសិនជាអ្នកអស់កម្លាំងក្រោយពីគេងស្អាតពេញមួយយប់ហើយនោះ វាអាចជាអាការៈមួយនៃការកង្វះជាតិដែក ឬវីតាមីន B12 ហើយ។ ជីវជាតិទាំងពីរនេះសំខាន់សម្រាប់បង្កើតកោសិកាគ្រាប់ឈាមក្រហម សម្រាប់ដឹកនាំអុកស៊ីសែនចិញ្ចឹមរាងកាយ។ អ្នកអាចរកប្រភពរបស់ជីវជាតិមួយនេះពី សាច់សុទ្ធ សណ្តែក និងថ្លើមសត្វជាដើម។
ឈឺក្បាល
បើសិនជាអ្នកមានអាការៈមួយនេះញឹកញាប់ ចូរពិគ្រោះជាមួយគ្រូពេទ្យអំពីជាតិម៉ាញ៉េស្យូម ដែលវាមាននៅក្នុងសណ្តែក និងបន្លែពណ៌បៃតង។ ជីវជាតិមួយនេះអាចជួយដល់សរសៃប្រសាទធ្វើការកាន់តែល្អ និងរក្សាជាតិស្ករក្នុងឈាមបានយ៉ាងល្អ។ យកល្អគួរតែញ៉ាំជីវជាតិនេះ ៤០០មីលីក្រាមក្នុងមួយថ្ងៃដើម្បីអាចជួយការឈឺក្បាលបែបប្រកាំងបាន។
ស្ងួតភ្នែក
វាប្រហែលជាកើតឡើងដោយសារប្រតិកម្មអាឡែហ្ស៊ី ឬការពាក់កន្តាក់ឡេនយូរពេក ប៉ុន្តែមូលហេតុមួយផ្សេងទៀតគឺមិនទទួលបានអាស៊ីតខ្លាញ់អូមេហ្គាបីគ្រប់គ្រាន់ទៅវិញទេ។ ជីវជាតិមួយនេះមានក្នុងត្រីសម្បូរខ្លាញ់ជាពិសេសត្រីសាលម៉ុងតែម្តង ដែលវាសំខាន់សម្រាប់សុខភាពភ្នែក។ កាលណាអាស៊ីតខ្លាញ់អូមេហ្គាបីក្នុងខ្លួនមានតិច គឺវាជាប់ទាក់ទងនឹងការខូចភ្នែកដោយសារតែការចាស់ទៅតាមអាយុ និងបញ្ហាផ្សេងៗទៀត។
ស្បែកស្ងួត និងរមាស់
ការដែលប្រតិកម្មស្បែកអាចបណ្តាលមកពីការប៉ះពាល់នឹងសារធាតុបង្ករលាក ឬជំងឺប៉ុន្តែវាក៏អាចបណ្តាលមកពីការកង្វះវីតាមីន B2 ដែរ ដែលវាជាអ្នកជួយឲ្យកោសិកាលូតលាស់ និងធ្វើការបានល្អ។ អ្នកអាចរកបានជីវជាតិមួយនេះក្នុងស៊ុត និងបន្លែពណ៌បៃតងដូចជា ប្រូខូលី។
ជ្រុះសក់
រឿងនេះអាចកើតឡើងតាមបែបធម្មជាតិនៅពេលអ្នកអាយុកាន់តែច្រើន ប៉ុន្តែវាក៏អាចបណ្តាលមកពីបញ្ហាជីវជាតិដែរ ជាពិសេសស្ត្រីអាយុក្រោម ៥០ឆ្នាំ។ ចូរបង្កើនការទទួលទានជាតិដែក តាមរយៈការញ៉ាំសាច់ និងសណ្តែក ដើម្បីធានាថា សក់ និងស្បែកនៅតែមានសុខភាពល្អ។
ឈាមអញ្ចាញធ្មេញ
មូលហេតុញឹកញាប់បំផុតគឺជាជំងឺអញ្ចាញធ្មេញតែម្តង ប៉ុន្តែការកង្វះវីតាមីន Cធ្ងន់ធ្ងរ ក៏អាចនាំឲ្យមានបញ្ហានេះដែរ។ យកល្អគួរតែព្យាយាមញ៉ាំបន្លែ និងផ្លែឈើដែលជូរៗ។
ខ្សោយសាច់ដុំ
ការកង្វះវីតាមីន B1 ក៏អាចនាំឲ្យមានបញ្ហានេះ និងបញ្ហាផ្សេងៗទៀតកើតឡើងបានដែរ។ ជីវជាតិមួយនេះត្រូវបានគេរកឃើញក្នុងគ្រាប់ធញ្ញជាតិ សាច់ជ្រូក ត្រីនិងសណ្តែក។ ប៉ូតាស្យូមដែលមានក្នុងផ្លែចេក ក៏សំខាន់សម្រាប់សុខភាពសាច់ដុំដែរ។
ផ្តាសាយរ៉ាំរ៉ៃ
អ្នកប្រហែលជាក្អក និងកណ្តាសជាញឹកញាប់បើសិនជាអ្នកមិនទទួលបានវីតាមីន C និង E គ្រប់គ្រាន់ ដែលវាជាអង់ទីអុកស៊ីដង់ដ៏សំខាន់សម្រាប់បង្កើនមុខងារប្រព័ន្ធភាពស៊ាំ។ របបអាហារមានតុល្យភាពមិនអាចបង្ការជំងឺផ្តាសាយបានទេ ប៉ុន្តែវានឹងធ្វើឲ្យរាងកាយមានសុខភាពល្អគ្រប់គ្រាន់នឹងប្រឆាំងជំងឺនេះបាន៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com