ពីនេះ ពីនោះ
ព័ត៍មានសុខភាព
ញ៉ាំផ្លែប៉ោមជាមួយអាហារពេលព្រឹក មានប្រយោជន៍ដល់ថ្នាក់ហ្នឹងផង!!!
× អ្វីដែលយើងធ្លាប់ដឹងនោះគឺថា មួយថ្ងៃញ៉ាំផ្លែប៉ោមមួយផ្លែអាចជួយការពារកុំឲ្យមានជំងឺបាន។ ដូច្នេះតើអ្នកនឹងអោយអតិភាពនៃការញ៉ាំផ្លែឈើនេះជារៀងរាល់ថ្ងៃដើម្បីសុខភាពដែរទេ? ខាងក្រោមនេះគឺជាអត្ថប្រយោជន៍មួយចំនួននៃការញ៉ាំផ្លែប៉ោមជាមួយអាហារពេលព្រឹក៖
ប្រឆាំងនឹងមហារីក
អ្នកស្រាវជ្រាវជាច្រើនបានយល់ស្របថា ការញ៉ាំផ្លែប៉ោមដែលសម្បូរទៅដោយសារធាតុ Flavonol អាចជួយបន្ថយការប្រឈមនឹងការកើតជំងឺមហារីកលំពែងបានរហូទដល់ ២៣ភាគរយ។ អ្នកវិទ្យាសាស្ត្របានសម្គាល់ឃើញសារធាតុជាច្រើន ដោយក្នុងនោះរួមទាំង Triterpenoids ដែលស្ថិតនៅក្នុងសម្បកផ្លែប៉ោម ហើយវាក៏ជួយប្រឆាំងការលូតលាស់កោសិកាមហារីកសុដន់ ថ្លើម និងពោះវៀនទៀត។
ឆ្អឹងមានសុខភាពល្អ
រឿងនេះប្រហែលជាមិនត្រូវបានមនុស្សជាច្រើនដឹងឡើយ ប៉ុន្តែផ្លែប៉ោមមានជាតិកាលស្យូមដែរ។ មួយវិញទៀត សារធាតុ Phloridzin ក៏ជាជីវជាតិដ៏កម្រមួយក្នុងផ្លែប៉ោមដែរ។ ការស្រាវជ្រាវបានរកឃើញថា សារធាតុមួយនេះអាចជួយបង្ការបញ្ហានៅឆ្អឹងបាន ជាពិសេសស្ត្រីក្រោយរ៉ាំងរដូវតែម្តង។ ផ្លែប៉ោមក៏មានសារធាតុ Boron ដែលដើរតួនាទីដ៏សំខាន់មួយក្នុងការការពារសុខភាពរបស់ឆ្អឹង។
សុខភាពបេះដូង
ផ្លែប៉ោមអាចជួយបង្ការកំណកក្នុងសរសៃឈាមអាក់ទែកុំឲ្យមានកំណក ដែលវាជាដើមហេតុដ៏ចំបងមួយនៃជំងឺសរសៃឈាមបេះដូង។ នេះដោយសារតែសារធាតុ Phenolic ដែលមានក្នុងសម្បកផ្លែប៉ោម។
បញ្ចុះកូឡេស្តេរ៉ុល
មូលហេតុដែលគេណែនាំឲ្យញ៉ាំផ្លែប៉ោមជាមួយអាហារពេលព្រឹក ដោយសារតែវាមានកូឡេស្តេរ៉ុលទាប។ ជាតិសរសៃក្នុងផ្លែប៉ោមក៏អាចជួយបឺតស្រូបជាតិកូឡេស្តេរ៉ុលពីក្នុងខ្លួនដើម្បីបញ្ចេញចោលដែរ។
បន្ថយការប្រឈមនឹងជំងឺទឹកនោមផ្អែម
ការសិក្សាបានឲ្យដឹងថា ផ្លែប៉ោមអាចជួយបន្ថយការប្រឈមនឹងជំងឺទឹកនោមផ្អែមបាន។ រឿងនេះមិនមែនមានន័យថា ការញ៉ាំផ្លែប៉ោមអាចជួយបង្ការរោគសញ្ញាជំងឺទឹកនោមផ្អែមបានយ៉ាងល្អ។
ការពារជំងឺ Parkinson’s
ការស្រាវជ្រាវបានបង្ហាញថា អ្នកដែលញ៉ាំផ្លែឈើ និងអាហារមានជាតិសរសៃខ្ពស់ ប្រហែលជាអាចការពារខ្លួនពីជំងឺ Parkinson’s បាន ដែលជំងឺនេះសម្គាល់ដឹងតាមរយៈការបំផ្លាញកោសិកាសរសៃប្រសាទសម្រាប់ផលិតអ័រម៉ូន Dopamine។
សម្រកទម្ងន់
ផ្លែប៉ោមផ្ទុកទៅដោយជាតិសរសៃដែលមានប្រយោជន៍សម្រាប់សុខភាពក្បាលពោះ។ អ្នកដែលកំពុងតែស្វែងរកវិធីគ្រប់គ្រងទម្ងន់ ឬសម្រកទម្ងន់ ចូរចាប់ផ្តើមញ៉ាំផ្លែប៉ោមនៅពេលព្រឹកទៅ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com