ភ្នំពេញ៖ លោក សម រង្ស៊ី ផ្ញើសារតាមរយៈសារព័ត៌មានមកកាន់សម្តេច ហ៊ុន សែន ម្តងទៀត ដោយឲ្យបោះបង់ចោលនូវជម្លោះបុគ្គល ទើបអាចមានការចរចា និងដំណោះស្រាយរួមគ្នា។ លោក សម រង្ស៊ី បង្ហាញពីបំណងនៃចរចាជាលើកទីពីរនេះ បន្ទាប់ពីសម្តេច ហ៊ុន សែន បដិសេធសំណើលើកទីមួយរបស់លោក។
ថ្វីបើពីមួយថ្ងៃទៅមួយថ្ងៃ លោក សម រង្ស៊ី អតីតប្រធានគណបក្សសង្គ្រោះជាតិ រួមទាំងសហការី និងអ្នកគាំទ្រនៅក្រៅប្រទេស នៅតែព្រួតគ្នាវាយប្រហាររដ្ឋាភិបាល និងគណបក្សប្រជាជនកម្ពុជា ដោយតម្រង់មកកាន់សម្តេច ហ៊ុន សែន ខ្លាំងជាងគេក្តី ប៉ុន្តែលោក ក៏នៅឆ្លៀតព្យាយាមរកផ្លូវទៅកាន់តុចរចាដែរ។ ក្នុងរយៈពេលចុងក្រោយនេះ គេ សង្កេតឃើញលោក សម រង្ស៊ី ទិតៀនរដ្ឋាភិបាលកម្ពុជា និងបក្សកាន់អំណាច ដោយលាយឡំជាមួយនឹងការបន្ទន់ឥរិយាបទតិចៗ ដែលស្តាប់ និងមើលទៅ ទំនងជាចង់ឲ្យមានការចរចា។
សម្រាប់កាលៈទេសៈនេះ លោក សម រង្ស៊ី មានជំនឿថា ក្រៅពីការចរចារវាងក្រុមប្រឆាំង និងបក្សកាន់អំណាច ប្រហែលជាគ្មានមធ្យោបាយអ្វីផ្សេងឡើយ ដែលអាចដោះស្រាយវិបត្តិនយោបាយសព្វថ្ងៃ។ មកដល់ចំណុចនេះ លោក ក៏ផ្តល់តម្លៃដល់វប្បធម៌សន្ទនាសាជាថ្មី ដែលមនុស្សភាគច្រើនយល់ថាស្លាប់បាត់ទៅហើយ។
ទោះជាលោក សម រង្ស៊ី មិនបញ្ចេញឈ្មោះចំៗថា ចង់ចរចាជាមួយអ្នកណាក៏ដោយ ប៉ុន្តែតួអង្គដែលលោក សំដៅនោះ មិនមានអ្នកណាផ្សេងក្រៅពីសម្តេច ហ៊ុន សែន ប្រធានគណបក្សប្រជាជនកម្ពុជា ឡើយ។ លោក សម រង្ស៊ី បានសរសេរសារលើបណ្តាញទំនាក់ទំនង Twitter ជាភាសាអង់គ្លេស ដោយមានន័យជាភាសាខ្មែរ បែបនេះថា៖«ខ្ញុំ នៅតែជឿលើវប្បធម៌សន្ទនាដដែល បើយើង អនុវត្តដោយស្មោះត្រង់ និងគ្មានការគំរាមកំហែង»។
លោក សម រង្ស៊ី យល់ថា ដើម្បីបន្តវប្បធម៌សន្ទនា ឬក៏ដើម្បីឲ្យការចរចាកើតឡើងបាន លុះត្រាតែសម្តេច ហ៊ុន សែន ទុករឿងបុគ្គលមួយអន្លើសិន។ សម្រាប់លោក រឿងជាតិ គឺសំខាន់ជាងរឿងបុគ្គល។
ក្នុងបទសម្ភាសជាមួយវិទ្យុបារាំងអន្តរជាតិតាមប្រព័ន្ធទូរសព្ទ លោក សម រង្ស៊ី បានផ្ញើសារមកកាន់សម្តេច ហ៊ុន សែន យ៉ាងដូច្នេះថា៖«ខ្ញុំ ក៏ត្រូវគេថាឲ្យច្រើនដែរ។ បើខ្ញុំ គិតតែរឿងផ្ទាល់ខ្លួន ខ្ញុំ ឈប់និយាយរកគេបាត់ទៅហើយ។ ប៉ុន្តែ បើយើង ធ្វើអ៊ីចឹង មិនត្រឹមត្រូវទេ។ យើង ឈឺចាប់មិនប៉ុន្មានទេ កុំឲ្យតែជាតិយើងលិចលង់។ យើងត្រូវតម្កល់ប្រយោជន៍ជាតិ ជាធំ។ យើង ត្រូវគិតថា ត្រូវធ្វើអ្វី ដើម្បីលើកតម្កើងប្រយោជន៍ជាតិ»។
ថ្មីៗនេះ លោក សម រង្ស៊ី ធ្លាប់បង្ហើបពីបំណងនៃការចរចាម្តងរួចមកហើយ ប៉ុន្តែសម្តេច ហ៊ុន សែន បានបដិសេធ។ សម្តេច ហ៊ុន សែន បានទម្លាក់កំហុសឲ្យលោក សម រង្ស៊ី ថាបានប្រព្រឹត្តនូវទង្វើជ្រុលហួសហេតុ ដែលនាំឲ្យបិទផ្លូវចរចា។
ក្នុងពិធីសំណេះសំណាលជាមួយកម្មករ-កម្មការិនី កាលពីព្រឹកថ្ងៃទី២១ ខែមីនា ឆ្នាំ២០១៨ សម្តេច ហ៊ុន សែន ប្រាប់ទៅលោក សម រង្ស៊ី យ៉ាងដូច្នេះថា៖«ហ៊ុន សែន អត់មានត្រូវចរចាជាមួយអ្នកណាទាំងអស់។ អ្នកឯងទៅហួសពីគំនូសក្រហមហើយ»។
បើមានការចរចាមែននោះ គ្មានរឿងអ្វីផ្សេង ក្រៅពីចង់ឲ្យដោះលែងលោក កឹម សុខា និងស្នើឲ្យបើកផ្លូវសម្រាប់គណបក្សសង្គ្រោះជាតិ ដើម្បីបានធ្វើសកម្មភាពឡើងវិញនោះទេ។ នេះជាការបង្ហើបរបស់លោក សម រង្ស៊ី។
មិនមែនតែលោក សម រង្ស៊ី និងបក្សពួករបស់លោកនោះទេ សូម្បីតែសហគមន៍អន្តរជាតិ ក៏យល់ថា ការបោះឆ្នោតថ្នាក់ជាតិនៅឆ្នាំ២0១៨ មិនអាចខ្វះគណបក្សសង្គ្រោះជាតិដែរ។ សហគមន៍អន្តរជាតិមួយចំនួន បានប្រកាសទុកជាមុនថា ពួកគេនឹងមិនទទួលស្គាល់ការបោះឆ្នោតឡើយ បើអវត្តមានរបស់គណបក្សសង្គ្រោះជាតិ ហើយលោក កឹម សុខា ដែលជាប្រធានគណបក្សនេះ មិនត្រូវបានដោះលែង។
ទោះជាមានការព្រមានយ៉ាងនេះក្តី ក៏រដ្ឋាភិបាលកម្ពុជា មិនបារម្ភដែរ។ រដ្ឋាភិបាលកម្ពុជា ក៏ដូចជាបក្សកាន់អំណាច ឆ្លើយតបថា ការបោះឆ្នោតនៅកម្ពុជា មិនទាមទារឲ្យមានការទទួលស្គាល់ពីបរទេសនោះទេ។
នៅថ្ងៃទី២៦ ខែមីនា ឆ្នាំ២0១៨នេះ សម្តេច ហ៊ុន សែន ក្នុងនាមជាប្រមុខរដ្ឋាភិបាល បានប្រកាសក្នុងពិធីបើកការដ្ឋានសាងសង់កំណាត់ផ្លូវជាតិលេខ៥ ពីខេត្តបាត់ដំបង ទៅក្រុងសិរីសោភ័ណ ខេត្តបន្ទាយមានជ័យ ថា កម្ពុជា នឹងរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី៦ តាមការគ្រោងទុក នៅថ្ងៃទី២៩ ខែកក្កដា ឆ្នាំ២0១៨ ដោយមិនពន្យារពេលឡើយ៕