ប្រធានាធិបតី មូន ចេអ៊ីន ស្នើកែរដ្ឋធម្មនុញ្ញបន្ថយអំណាចប្រធានាធិបតី

អន្តរជាតិ

ប្រធានាធិបតី មូន ចេអ៊ីន ស្នើកែរដ្ឋធម្មនុញ្ញបន្ថយអំណាចប្រធានាធិបតី

27, Mar 2018 , 7:39 pm

រូបភាព

ដោយ: ថ្មីៗ

ប្រធានាធិបតីកូរ៉េខាងត្បូង មូន ចេអ៊ីន បានស្នើកែទម្រង់រដ្ឋធម្មនុញ្ញដើម្បីបន្ថយអំណាចប្រធានាធិបតី បន្ថយអាយុអ្នកបោះឆ្នោត និង អនុញ្ញាតឲ្យប្រធានាធិបតីជាប់ឆ្នោតបានពីរអាណត្តិដែរ។ សំណើរកែទម្រង់រដ្ឋធម្មនុញ្ញនេះនឹងត្រូវដាក់ឲ្យសភាអនុម័ត មុននឹងត្រូវប្រជាជនបោះឆ្នោតប្រជាមតិនៅខែមិថុនាខាងមុខ។

តាមការសន្យាក្នុងពេលឃោសនាបោះឆ្នោតឆ្នាំមុន ប្រធានាធិបតីកូរ៉េខាងត្បូងលោក មូន ចេអ៊ីន នាថ្ងៃចន្ទទី ២៦ ខែមីនានេះបានសម្រេចដាក់សំណើរសុំកាត់បន្ថយអំណាចប្រធានាធិបតី បន្ថយអាយុអ្នកបោះឆ្នោត និងលើកលែងការកំណត់អាណត្តិប្រធានាធិបតីត្រឹមមួយអាណត្តិផងដែរ។

យោងតាមទីភ្នាក់ងារព័ត៌មាន AFP សំណើរទាំងនេះស្ថិតក្នុងកញ្ចប់សំណើរសុំកែទម្រង់រដ្ឋធម្មនុញ្ញ ហើយវានឹងត្រូវដាក់ឲ្យសភាអនុម័ត មុននឹងបន្តដាក់ឲ្យប្រជាជនបោះឆ្នោតប្រជាមតិផងដែរ។ បើសិនជាមានការគាំទ្រមែននោះ ការកែប្រែនេះនឹងចូលជាធរមានចាប់ពីការបោះឆ្នោតប្រធានាធិបតីលើកក្រោយប៉ុណ្ណោះ ហើយវាមិនអាចមានអនុភាពក្នុងអាណត្តិលោក មូន ចេអ៊ីនឡើយព្រោះលោកកាន់អំណាចបានតែមួយអាណត្តិប៉ុណ្ណោះ។

ថ្វីបើកូរ៉េខាងត្បូងជាប្រទេសប្រជាធិបតេយ្យជឿនលឿនក្តី ប្រធានាធិបតីកូរ៉េខាងត្បូង មានអំណាចខ្លាំងណាស់។ ខាងក្រុមអ្នករិះគន់បានអះអាងថា ការផ្តល់អំណាចច្រើនហួសហេតុដល់ប្រធានាធិបតីនេះជំរុញឲ្យមានអំពើពុករលួយកើនឡើងនិងបន្ថយសំឡេងក្រុមប្រឆាំងថែមទៀត។

ពាក់ព័ន្ធនឹងការបន្ថយអំណាចប្រធានាធិបតី លោក មូនបានស្នើឲ្យមានការដកអំណាចក្នុងការតែងតាំងប្រធានតុលាការធម្មនុញ្ញរបស់ប្រធានាធិបតី ដោយអនុញ្ញាតឲ្យចៅក្រមតុលាការនេះបោះឆ្នោតជ្រើសរើសដោយខ្លួនឯងវិញ។

ក្រៅពីនេះរាល់ការលើកលែងរបស់ប្រធានាធិបតីត្រូវត្រួតពិនិត្យដោយគណៈកម្មការពិសេស ហើយក្រុមប្រឹក្សាសវនកម្ម និងអធិការកិច្ចជាភ្នាក់ងារត្រួតពិនិត្យដ៏មានឥទ្ធិពលរបស់រដ្ឋដែលបច្ចុប្បន្នស្ថិតក្រោមការដឹកនាំរបស់ការិយាល័យប្រធានាធិបតីនោះក៏នឹងត្រូវដាក់ឲ្យជាស្ថាប័នឯករាជ្យដែរ។

លោក មូន ដែលជាអតីតអ្នកច្បាប់សិទ្ធិមនុស្សនោះបានអះអាងថា លោកចង់ឲ្យមានការបញ្ចប់ការរិះគន់ និងហៅតំណែងប្រធានាធិបតីថាជាអធិរាជនោះ។ លោកបញ្ជាក់ដូច្នេះ៖« ខ្ញុំមិនបានទទួលអ្វីឡើយពីការកែទម្រង់រដ្ឋធម្មនុញ្ញនេះ ព្រោះវាផ្តល់អំណាចប្រធានាធិបតីទៅប្រជាជន ទៅរដ្ឋាភិបាលថ្នាក់តំបន់ និងសភា»។

ទាក់ទិននឹងការបន្ថយអាយុបោះឆ្នោត លោក មូន ចង់ឲ្យមានការបន្ថយអាយុប្រជាជនកូរ៉េខាងត្បូងដែលមានសិទ្ធិបោះឆ្នោតពី ១៩ ទៅ ១៨ ឆ្នាំវិញ ហើយសភាក៏នឹងមានអំណាចក្នុងការត្រួតពិនិត្យជាមុនលើសេចក្តីសម្រេចមុនៗតាមរយៈក្រឹត្យរបស់ប្រធានាធិបតីនោះ។

ចំណែកអាណត្តិប្រធានាធិបតី លោក មូន ចង់ឲ្យមានការដកការកំណត់អាណត្តិតែមួយសម្រាប់ប្រធានាធិបតី តែបន្ថយរយៈពេលកាន់អំណាចពីមួយអាណត្តិប្រាំឆ្នាំមកត្រឹមបួនឆ្នាំ។ ប្រធានាធិបតីអាចមានឱកាសឈរឈ្មោះជាថ្មីសម្រាប់អាណត្តិទីពីរ តាមរយៈការស្នើសុំនេះ។

តាមពិតទៅ កូរ៉េខាងត្បូងកំណត់អាណត្តិប្រធានាធិបតីចាប់ពីពេលដែលប្រធានាធិបតីផ្តាច់ការ Park Chung-he ឪពុកលោកស្រី ប៉ាក ហ្គឺនហេ ត្រូវគេធ្វើឃាត។ លោក Park បានកាន់អំណាចចាប់ពីឆ្នាំ ១៩៦១ ដល់ឆ្នាំ ១៩៧៩ ហើយលោកបានសើរើរដ្ឋធម្មនុញ្ញដើម្បីអនុញ្ញាតឲ្យលោកកាន់អំណាចបានយូរតាមដែលអាចធ្វើបានផងដែរ។ ក្រៅពីនោះលោកក៏បានកែរដ្ឋធម្មនុញ្ញដើម្បីពង្រឹងអំណាចប្រធានធិបតីផងដែរ៕