អន្តរជាតិ
ចិនប្រាប់ឲ្យ ICC គោរពអធិបតេយ្យហ្វីលីពីនជុំវិញសង្គ្រាមគ្រឿងញៀន លោក Lu Kang អ្នកនាំពាក្យក្រសួងការបរទេសចិន (រូបភាពគេហទំព័រក្រសួងការបរទេសចិន)
× នៅថ្ងៃទី២៨ ខែមីនា ចិនបានចេញមុខការពារប្រធានាធិបតីហ្វីលីពីន រ៉ូឌ្រីហ្គោ ឌូទើតេ បន្ទាប់ពីត្រូវបានតុលាការព្រហ្មទណ្ឌអន្តរជាតិ (ICC) ស៊ើបអង្កេតជំហានដំបូងលើករណីសម្លាប់រង្គាលជុំវិញយុទ្ធនាការបង្ក្រាបគ្រឿងញៀន។ ក្រុងប៉េកាំងបានប្រាប់ឲ្យស្ថាប័នអន្តរជាតិមួយនេះគោរពអធិបតេយ្យរបស់ហ្វីលីពីន ព្រោះយុទ្ធនាការបោសសម្អាតគ្រឿងញៀនមានប្រសិទ្ធភាព និងទទួលបានការគាំទ្រខ្លាំងពីប្រជាជនក្នុងស្រុក។
ស្របពេលដែលសង្គ្រាមបង្ក្រាបគ្រឿងញៀននៅហ្វីលីពីនរងការរិះគន់ពីអង្គការសិទ្ធិមនុស្ស និងប្រទេសជាច្រើន ដល់ថ្នាក់តុលាការព្រហ្មទណ្ឌអន្តរជាតិបើកការស៊ើបអង្កេតដំបូងនោះ ចិនឯណោះវិញបានការពារ និងលើកសរសើរមិនដាច់ពីមាត់។ ដោយសារតែមិនពេញចិត្តនឹងការស៊ើបអង្កេតនេះ ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានដកហ្វីលីពីនចេញពីលក្ខន្តិកៈទីក្រុងរ៉ូមស្តីពីតុលាការព្រហ្មទណ្ឌអន្តរជាតិតែម្ដង។
ជុំវិញរឿងនេះ ក្រុងប៉េកាំង យល់ថា ចំណាត់ការរបស់លោក ឌូទើតេ គឺជារឿងត្រឹមត្រូវ។ អ្នកនាំពាក្យក្រសួងការបរទេសចិន Lu Kang និយាយថា លោក ឌូទើតេ ប្រកាន់ជំហរតឹងរ៉ឹងក្នុងការបង្ក្រាបឧក្រិដ្ឋកម្មពាក់ព័ន្ធគ្រឿងញៀន និងបានពង្រឹងសន្តិសុខសាធារណៈថែមទៀត។ បើតាមអ្នកនាំពាក្យរូបនេះ វិធានការ ដែលមានការគាំំទ្រពីប្រជាជន បានបង្កើតបរិយាកាសល្អសម្រាប់សេដ្ឋកិច្ចហ្វីលីពីន និងជីវិតរស់នៅដោយសន្តិភាពសម្រាប់ប្រជាជន។
ក្នុងន័យការពារយុទ្ធនាការរបស់លោក ឌូទើតេ អ្នកនាំពាក្យដដែលបានប្រាប់ឲ្យសហគមន៍អន្តរជាតិស្វែងយល់ពីហ្វីលីពីនឲ្យបានច្រើន និងគាំទ្រវិធានការរបស់ហ្វីលីពីនក្នុងការបោសសម្អាតគ្រឿងញៀនជាជាងការស្ដីបន្ទោស។ មន្ត្រីក្រសួងការបរទេសចិនខាងលើក៏ឆ្លៀតផ្ញើសារទៅឲ្យតុលាការព្រហ្មទណ្ឌអន្តរជាតិ ដែលបានបើកការស៊ើបអង្កេតបឋមលើមេដឹកនាំហ្វីលីពីន រហូតបង្ខំឲ្យហ្វីលីពីចាកចេញទាំងមិនអាល័យ។
«ចិនតែងតែប្រកានខ្ជាប់ជំហរថា តុលាការព្រហ្មទណ្ឌអន្តរជាតិគួរគោរពអធិបតេយ្យរបស់ប្រទេសនានា ធ្វើអ្វីឲ្យប្រយ័ត្នប្រយែង និងចៀសវាងក្លាយជាឧបករណ៍នយោបាយ។ ចិនជឿថា ប្រទេសមានអធិប តេយ្យ មានសិទ្ធិនិយាយ «ទេ» ចំពោះឧបាយកលនយោបាយ»។ នេះជាការលើកឡើងរបស់លោក Lu Kang ក្នុងសន្និសីទសារព័ត៌មានថ្ងៃទី២៨ ខែមីនា។
ក្រោយការដើរចេញពីស្ថាប័នយុត្តិធម៌អន្តរជាតិហើយនោះ លោកប្រធានាធិបតី ឌូទើតេ ក៏បបួលប្រទេសហត្ថលេខីផ្សេងទៀតនៃលក្ខន្តិកៈក្រុងរ៉ូម ឲ្យដើរចេញពីតុលាការព្រហ្មទណ្ឌអន្តរជាតិ។ ពេលហ្វីលីពីនដកខ្លួនចេញ នៅតំបន់អាស៊ាន នៅមានតែកម្ពុជា មួយប៉ុណ្ណោះដែលនៅជាសមាជិកនៃលក្ខន្តិកៈទីក្រុងរ៉ូមនេះ៕
Tag:
ចិន
ហ្វីលីពីន
ICC
រ៉ូឌ្រីហ្គោ ឌូទើតេ
© រក្សាសិទ្ធិដោយ thmeythmey.com