សេដ្ឋកិច្ចវៀតណាមមានកំណើនល្អប្រសើរបំផុតក្នុងត្រីមាសទីមួយ

សេដ្ឋកិច្ចអន្តរជាតិ

អន្តរជាតិ

សេដ្ឋកិច្ចវៀតណាមមានកំណើនល្អប្រសើរបំផុតក្នុងត្រីមាសទីមួយ

29, Mar 2018 , 4:45 pm

រូបភាព

ដោយ: ថ្មីៗ

សេដ្ឋកិច្ចវៀតណាមកើនឡើងរហ័សបំផុតក្នុងរយៈពេលមួយទសវត្សរ៍ចុងក្រោយនេះ។ របាយការណ៍ថ្មីមួយដែលចេញផ្សាយនៅសប្តាហ៍នេះបង្ហាញថា គ្រាន់តែក្នុងត្រីមាសទីមួយឆ្នាំ ២០១៨ នេះ ការកើនឡើងនៃការផលិតទំនិញអេឡិចត្រូនិក និងការនាំចេញ។

វៀតណាមបានក្លាយប្រទេសដែលមានសេដ្ឋកិច្ចរីកចម្រើនរហ័សជាងគេមួយនៅក្នុងតំបន់ ហើយបីខែដើមឆ្នាំ ២០១៨ នេះ សេដ្ឋកិច្ចវៀតណាមមានកំណើនខ្ពស់ដែលស្ថិតក្នុងកម្រិតល្អបំផុតមួយផង។ នេះបើយោងតាមរបាយការណ៍ថ្មីមួយរបស់ការិយាល័យស្ថិតិរបស់រដ្ឋាភិបាលដែលដកស្រង់ដោយទីភ្នាក់ងារព័ត៌មាន AFP។

កំណើនសេដ្ឋកិច្ចវៀតណាមក្នុងរយៈពេលបីខែកន្លងមកនោះកើនឡើងដល់កម្រិត ៧,៨ ខណៈដែលឆ្នាំមុនក្នុងរយៈពេលដដែលសេដ្ឋកិច្ចវៀតណាមមានកំណើនត្រឹមប្រាំភាគរយប៉ុណ្ណោះ។ បើតាមរបាយការណ៍រដ្ឋាភិបាលដដែលនេះ វាជាកំណើនសេដ្ឋកិច្ចល្អបំផុតមួយរាប់ចាប់ពីឆ្នាំ ២០០៨ មកនោះ។

តាមពិតទៅ កំណើនសេដ្ឋកិច្ចវៀតណាមកើនឡើងខ្ពស់ខណៈដែលរដ្ឋាភិបាលក្រុងហាណូយពង្រឹងទីផ្សារក្រៅបរទេស ក្រោយសម្រេចចុះកិច្ចព្រមព្រៀងពាណិជ្ជកម្មស្តង់ដារមាសនៅខែនេះដែលមានភាគី ១១ ដើម្បីជំនួសឲ្យកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP)។

វិស័យសំខាន់ៗដែលជំរុញកំណើនសេដ្ឋកិច្ចវៀតណាម បច្ចុប្បន្នមានកសិកម្ម ពាណិជ្ជកម្ម និងការនាំចេញផលិតផលផ្សេងទៀត។ គ្រាន់តែពីខែមករាដល់ខែមីនា ការនាំចេញរបស់វៀតណាមកើនឡើងដល់ច្រើនជាង ៥៤ ពានលាន់ដុល្លារ។ គេកត់សម្គាល់ថា ផលិកម្មគ្រឿងអេឡិចត្រូនិកនោះកើនឡើងច្រើនជាង១៣ ភាគរយ និងក្លាយជាសរសរស្តម្ភនៃកំណើនសេដ្ឋកិច្ចផងដែរ។

វៀតណាមក្លាយជាទីតាំងផលិតកម្មសំខាន់ជាងគេមួយនៅអាស៊ីជាពិសេសសម្រាប់ផលិតផលអេឡិចត្រូនិក ដោយសារវាមានកម្លាំងពលកម្មថោក និងមានគោលនយោបាយបើកចំហទូលំទូលាយ។ កន្លងមកវៀតណាមបានទាក់ទាញក្រុមហ៊ុនគ្រឿងអេឡិចត្រូនិកលំដាប់ពិភពលោកដូចជា Samsung ក្រុមហ៊ុន LG និងក្រុមហ៊ុន Canon ជាដើម។

សូមបញ្ជាក់ថា វៀតណាមមានកំណើនសេដ្ឋកិច្ចខ្ពស់រយៈពេលដប់ឆ្នាំចុងក្រោយ។ កន្លងមក អាជ្ញាធរវៀតណាមព្យាករថា សេដ្ឋកិច្ចខ្លួននឹងអាចកើនឡើងដល់ ៦,៨ ភាគរយក្នុងឆ្នាំ ២០១៨ នេះខណៈដែលខាងធនាគារពិភពលោកវាយតម្លៃថា សេដ្ឋកិច្ចវៀតណាមនេះអាចមានកំណើនត្រឹម ៦,៥ប៉ុណ្ណោះ៕