អន្តរជាតិ
ប្រជាជនស៊ូដង់ខាងត្បូងកាន់តែច្រើនបន្តធ្វើអត្តឃាត ព្រោះអស់សង្ឃឹមនឹងភាពរ៉ាំរ៉ៃនៃសង្គ្រាមស៊ីវិល
× ប្រជាជនស៊ូដង់ខាងត្បូងកាន់តែច្រើនសម្រេចជ្រើសរើសយកការសម្លាប់ខ្លួនដើម្បីរួចផុតពីទុក្ខលំបាកវេទនា និងគ្រាំគ្រាដោយវិបត្តិផ្លូវចិត្តដែលបង្កឡើងដោយសារសង្គ្រាមរ៉ាំរ៉ៃដែលផ្ទុះឡើងជាងមួយឆ្នាំក្រោយប្រកាសឯករាជ្យឆ្នាំ ២០១១នោះ។
ជាងប្រាំឆ្នាំហើយ ដែលស៊ូដង់ខាងត្បូងក្លាយជារដ្ឋឯករាជ្យ និងមានអធិបតេយ្យពេញលេញ ប៉ុន្តែរឿងដែលគួរឲ្យសោកស្តាយនោះគឺ ប្រជាជនស៊ូដង់ខាងត្បូងបន្តរងទុក្ខវេទនាមិនស្រាកស្រាន្តដោយសារសង្គ្រាមដណ្តើមអំណាច។ ប្រជាជនរាប់ពាន់នាក់បានស្លាប់ដោយសារជម្លោះប្រដាប់អាវុធ ខណៈដែលប្រជាជនរាប់ម៉ឺននាក់ផ្សេងទៀតត្រូវបង្ខំចិត្តភៀសខ្លួនដើម្បីរកសុវត្ថិភាព។
បើតាមទីភ្នាក់ងារព័ត៌មាន AFP បញ្ហាប្រឈមធំមួយទៀតសម្រាប់ប្រជាជនស៊ូដង់ខាងត្បូងគឺ ការបង្ខំចិត្តធ្វើអត្តឃាតដើម្បីគេចឲ្យផុតពីក្តីលំបាកវេទនាទាំងអស់នេះ។ ប្រជាជនកាន់តែច្រើនសម្រេចចិត្តបញ្ចប់ជីវិត ព្រោះពួកគេមើលមិនឃើញពន្លឺនៃសន្តិភាព និងការប្រសើរឡើងនៃជីវិតរបស់ខ្លួនឡើយ។
ក្នុងវ័យ ៤៤ ឆ្នាំ Ayak ជាជនភៀសសឹកម្នាក់ក្នុងចំណោមប្រជាជនស៊ូដង់ខាងត្បូងរាប់សែននាក់ផ្សេងទៀតដែលកំពុងរស់នៅលំបាកលំបិនក្នុងជំរុញជនភៀសខ្លួន។ នាងបានរៀបរាប់ថា ជីវិតខ្លួនគ្មានន័យទៀតឡើយដោយសារនាងបានបាត់បង់បងប្អូនប្រុសបួននាក់ និងកូនប្រុសវ័យ ១៩ ឆ្នាំម្នាក់ទៀតពេលរត់គេចពីសង្គ្រាម។ និយាយទាំងទឹកភ្នែក នាងអះអាងថា៖« ខ្ញុំបានឃើញរាល់គ្រប់រូបភាពហើយ។ នៅពេលខ្ញុំគិតពិតជីវិតបងប្អូនកូនចៅ និងការស្លាប់របស់ពួកគេ ខ្ញុំសម្រេចចិត្តសម្លាប់ខ្លួនដូចគ្នា»។
Ayak ធ្លាប់បានប៉ុនប៉ងធ្វើអត្តឃាតម្តងហើយកន្លងមកប៉ុន្តែបរាជ័យ និងត្រូវគេសង្គ្រោះ។ ប៉ុន្តែគេក៏ឃើញចំនួនអ្នកធ្វើអត្តឃាតកាន់តែច្រើនផងដែរនៅស៊ូដង់ខាងត្បូងជាពិសេសនៅជំរំជនភៀសខ្លួនតែម្តង។
យោងតាមរបាយការណ៍អង្គការអន្តរជាតិទេសន្តរប្រវេសន៍(IMO) ឆ្នាំ ២០១៧ មនុស្ស ៣១ នាក់បានប៉ុនប៉ងធ្វើអត្តឃាត ក្នុងនោះមានប្រុស ១៦នាក់ និងស្ត្រី ១៥ នាក់ផង។ ប៉ុន្តែមានតែប្រាំមួយនាក់ប៉ុណ្ណោះដែលបានស្លាប់ ហើយកាលពីឆ្នាំ ២០១៦ មនុស្សបួននាក់ស្លាប់ដោយការធ្វើអត្តឃាតនេះដែរ។
របាយការណ៍ស្រាវជ្រាវរបស់មជ្ឈមណ្ឌលជាតិព័ត៌មានបច្ចេកវិទ្យាខាងជីវសាស្ត្ររបស់អាមេរិកបានបង្ហាញថា ប្រជាជនស៊ូដង់ខាងត្បូងយ៉ាងហោចណាស់ណាស់ ៤០ភាគរយដែលចូលរួមក្នុងការស្ទង់មតិ សុទ្ធតែមានជំងឺបាក់ទឹកចិត្ត និងអស់សង្ឃឹមធ្ងន់ធ្ងរដោយសារសង្គ្រាមស៊ីវិលនេះ។
«បញ្ហាជាច្រើនកើតឡើងមុនពេលដែលមនុស្សម្នាក់សម្រេចចិត្តធ្វើអត្តឃាត។ ស្ថានភាពរស់នៅ កង្វះចំណីអាហារ និងបញ្ហាលំបាកផ្សេងទៀតសុទ្ធតែមានចំណែកធ្វើឲ្យមនុស្សៗម្នាក់ៗចង់សម្លាប់ខ្លួន។ វាជាបន្ទុកធ្ងន់ដែលមិនជំរុញឲ្យបុគ្គលនោះមានសង្ឃឹមថានឹងមានការផ្លាស់ប្តូរឡើយ»។ នេះជាការលើកឡើងរបស់លោក Raimund Alber ជាបុគ្គលិកផ្នែកសុខាភិបាលនៃអង្គការគ្រូពេទគ្មានព្រំដែន។
បច្ចុប្បន្ននេះខាងស្ថាប័នពាក់ព័ន្ធជាពិសេសខាងសុខាភិបាលនិងសិទ្ធិមនុស្សបានព្យាយាមជំរុញឲ្យមានការផ្តល់ការប្រឹក្សា យោបល់ និងគាំទ្រសុខភាពផ្លូវចិត្តដល់ជនរងគ្រោះដោយសារសង្គ្រាមស៊ូដង់ខាងត្បូងផងដែរ៕
Tag:
ស៊ូដង់ខាងត្បូង
សង្គ្រាមស៊ីវិល
អត្តឃាត
© រក្សាសិទ្ធិដោយ thmeythmey.com