អន្តរជាតិ
សិស្សជិត៣លាននាក់នៅឥណ្ឌា ត្រូវប្រឡងឡើងវិញ ដោយសារការបែកធ្លាយវិញ្ញាសាមុន រដ្ឋមន្ត្រីក្រសួងអប់រំឥណ្ឌា លោក Prakash Javadekar។ រូបថត AFP
× រដ្ឋាភិបាលឥណ្ឌា បានប្រកាសរឹតបន្តឹងសុវត្ថិភាពអនឡាញ បន្ទាប់ពីមានការបែកធ្លាយវិញ្ញាសានៅមុនថ្ងៃសិស្សប្រឡង។ ករណីនេះផងដែរ ក្រសួងបានតម្រូវឲ្យសិស្សប្រមាណ២.៨លាននាក់ ប្រឡងឡើងវិញ។ នេះបើតាមការផ្សាយរបស់ AFP។
រដ្ឋមន្ត្រីក្រសួងអប់រំឥណ្ឌា លោក Prakash Javadekar ប្រកាសបើកការស៊ើបអង្កេតលើករណីបែកធ្លាយវិញ្ញាសាប្រឡងគណិតវិទ្យា និងសេដ្ឋកិច្ចរបស់សិស្សវិទ្យាល័យទូទាំងប្រទេសកាលពីថ្មីៗកន្លងមកនេះ តាមរយៈបណ្តាញសង្គម WhatsApp។
«ឧក្រិដ្ឋជនដែលប្រព្រឹត្តអំពើនេះ នឹងមិនត្រូវបានលើកលែងឡើយ។ ខ្ញុំជឿជាក់ថា ប៉ូលិសនឹងចាប់បានអ្នកទាំងនោះយ៉ាងឆាប់រហ័ស»។ លោក Javadekar បានថ្លែងបែបនេះទៅកាន់អ្នកសារព័ត៌មាន ដោយប្រកាសពង្រឹងប្រព័ន្ធទំនាក់ទំនងផ្នែកអប់រំតាមអនឡាញ។
លោក Rahul Gandhi មកពីគណបក្សប្រឆាំង បានលើកយកករណីបែកធ្លាយវិញ្ញាសាប្រឡងដើម្បីវាយប្រហាររដ្ឋបាលរបស់លោកនាយករដ្ឋមន្ត្រី Narendra Modi លើការគ្រប់គ្រងសុវត្ថិភាពឌីជីថល។ លោកបានចំអកថា៖ «សិស្ស២.៨លាននាក់ត្រូវប្រឡងឡើងវិញ! វាជាការលេងសើចជ្រុលពេកហើយ! តើអ្នកណាត្រូវទទួលខុសត្រូវលើរឿងនេះ?»។
លោក Javadekar ទទួលស្គាល់ថា ការសម្រេចរៀបចំឲ្យមានការប្រឡងឡើងវិញ ពិតជាធ្វើឲ្យសិស្ស និងឪពុកម្តាយសិស្ស ខឹងសម្បារ និងពិបាកទទួលយកបាន ប៉ុន្តែរដ្ឋាភិបាលត្រូវតែរៀបចំការប្រឡងឲ្យបានសុក្រឹត្យ។
ទាំងគណបក្សកាន់អំណាច និងគណបក្សប្រឆាំងនៅឥណ្ឌា សុទ្ធតែបានភ្ជាប់ករណីនេះទៅនឹងរឿងអាស្រូវដ៏ក្តៅគគុករបស់ហ្វេសប៊ុកលើការលួចប្រើប្រាស់ទិន្នន័យពីសំណាក់ក្រុមហ៊ុន Cambridge Analytica ។ ពួកគេបានអះអាងថា គ្មានសុវត្ថិភាពក្នុងការទាក់ទងគ្នាជាឯកជនតាមរយៈបណ្តាញសង្គមនេះ។
ទោះបីជាយ៉ាងណាក៏ដោយ ការលួចបើកចម្លងពេលប្រឡង បានក្លាយជារឿងទូទៅនៅក្នុងវិស័យអប់រំឥណ្ឌា ជាពិសេសការសូកប៉ាន់គណៈមេប្រយោគ ជាដើម៕
© រក្សាសិទ្ធិដោយ thmeythmey.com