កម្ពុជា បញ្ជូនកងទ័ពមួកខៀវ៨០នាក់ទៀត ទៅប្រទេសម៉ាលី ក្រោយរងការវាយប្រហារពីពួកឧទ្ទាម

ជាតិ

កម្ពុជា បញ្ជូនកងទ័ពមួកខៀវ៨០នាក់ទៀត ទៅប្រទេសម៉ាលី ក្រោយរងការវាយប្រហារពីពួកឧទ្ទាម

30, Mar 2018 , 9:19 pm

រូបភាព

ហ្វេសប៊ុកកងកម្លាំងរក្សាសន្តិភាព និងកំចាត់កាកសំណល់សង្គ្រាមមិនទាន់ផ្ទុះ៖ លោក សែម សុវណ្ណី អគ្គនាយកមជ្ឈមណ្ឌលជាតិនៃកងកម្លាំងរក្សាសន្តិភាព (ឈរខាងមុខ)

ដោយ: ធឿន បញ្ញាឬទិ្ធ

ភ្នំពេញ៖ កម្ពុជាបញ្ជូនកងកម្លាំងរក្សាសន្តិភាព ៨០នាក់ ទៅប្រទេសម៉ាលី ដើម្បីបំពេញបេសកកម្មក្រោមឆត្រអង្គការសហប្រជាជាតិ នៅថ្ងៃទី៣០ មីនានេះ។

កងទ័ពមួកខៀវទាំង៨០នាក់នេះ (មានស្ត្រីចំនួន៤នាក់) គឺជាកងកម្លាំងវិស្វកម្ម ដែលត្រូវបម្រើការងារនៅប្រទេសម៉ាលី រយៈពេល១ឆ្នាំ។ លោក សែម សុវណ្ណី អគ្គនាយកមជ្ឈមណ្ឌលជាតិនៃកងកម្លាំងរក្សាសន្តិភាព និងការបោសសម្អាតមីន និងគ្រាប់មិនទាន់ផ្ទុះ បាននិយាយថា កងកម្លាំងដែលត្រូវបញ្ជូនទៅម៉ាលីលើកនេះ គឺមានជំនាញខាងថែទាំព្រលានយន្តហោះ។ ហើយវាក៏លើកទី៥ផងដែរ សម្រាប់កម្ពុជាដែលបញ្ជូនកងទ័ពមួកខៀវ ទៅប្រទេសម៉ាលីនេះ។

បន្ថែមពីនេះលោក សែម សុវណ្ណី បានបញ្ជាក់ថា ស្ថានភាពនៅប្រទេសម៉ាលី បានវិលត្រឡប់រកសភាពដើមវិញហើយ ក្រោយពីមានការវាយប្រហារមកលើជំរុំទ័ពមួកខៀវកម្ពុជា កាលពីថ្ងៃទី២២ មីនាកន្លងមក។ បើតាមលោក សុវណ្ណី ជំរុំកងទ័ពមួកខៀវកម្ពុជានៅប្រទេសម៉ាលី កំពុងតែបង្កើនការយាមកាមយ៉ាងតឹងរឹងផងដែរ ខណៈអង្គការសហប្រជាជាតិ ចំណាយថវិការៀបចំសាងសងជំរុំឡើងវិញ។

ការវាយប្រហារមកលើជំរុំកងទ័ពមួកខៀវកម្ពុជានៅម៉ាលី ពីសំណាក់ក្រុមពួកឧទ្ទាម កាលពីពេលថ្មីៗនេះ មិនបានបង្កឲ្យកងទ័ពកម្ពុជារបួស ឬបាត់បង់ជីវិតឡើយ ខណៈកងទ័ពបារាំង៥នាក់រងរបួស។

អត្ថបទទាក់ទង

សម្ដេច ហ៊ុន សែន ស្នើឲ្យកងទ័ពមួកខៀវកម្ពុជានៅម៉ាលី ពង្រឹងស្មារតីការងារ ទោះជួបការវាយប្រហារក្តី

សម្តេច ហ៊ុន សែន នឹងទទួលសពកងទ័ពមួកខៀវកម្ពុជាទាំង៤នៅយប់ថ្ងៃអាទិត្យ

ទាក់ទងនឹងបញ្ហានេះប្រមុខរដ្ឋាភិបាលកម្ពុជា បានប្រកាសថ្កោលទោសចំពោះទង្វើររបស់ក្រុមឧទ្ទាម ដែលលួចឆ្មកវាយប្រហារមកលើកងកម្លាំងរក្សាសន្តិសុខអង្គការសហប្រជាជាតិ ដែលចូលរួមបំពេញកិច្ចការមនុស្សសម្រាប់ប្រទេសម៉ាលីនេះ ។ សម្ដេច ចាត់ទុកទង្វើរក្រុមឧទ្ទាមនេះ ជាសកម្មភាពព្រៃផ្សៃ និងអមនុស្សធម៌។ ប្រមុខរដ្ឋាភិបាល នៅតែប្រកាសជំហរបញ្ជូនកងទ័ពមួកខៀវ ទៅបំពេញបេសកកម្មមនុស្សធម៌ ក្រោមឆត្រអង្គការសហប្រជាជាតិដោយស្ម័គ្រចិត្ត បើទោះជាប្រឈមមុខនឹងបញ្ហាវាយប្រហារក្តី។

គួរបញ្ជាក់ថា កងទ័ពមួកខៀវកម្ពុជា ដែលបាននិងកំពុងបំពេញបេសកកម្មនៅប្រទេសម៉ាលី មានចំនួន៣០៩នាក់ ដែលចែកចេញជា២ជំនាញ រួមមានជំនាញខាងកម្ទេចគ្រាប់មិនទាន់ផ្ទុះ និងជំនាញខាងវិស្វកម្ម ។ នេះបើតាមលោក សែម សុវណ្ណី អគ្គនាយកនៃមជ្ឈមណ្ឌលជាតិ សម្រាប់កងកម្លាំងរក្សាសន្តិភាព៕