អន្តរជាតិ
រជ្ជទាយាទអារ៉ាប៊ីសាអូឌីត៖«សង្គ្រាមរវាងអារ៉ាប៊ីសាអូឌីតនិងអ៊ីរ៉ង់អាចកើតឡើងចន្លោះពី១០ទៅ ១៥ឆ្នាំទៀត»
× រជ្ជទាយាទអារ៉ាប៊ីសាអូឌីត សង្គ្រាមរវាងអ៊ីរ៉ង់ និងអារ៉ាប៊ីសាអូឌីតអាចនឹងកើតឡើងក្នុងរយៈពេល ១០ ទៅ ១៥ ឆ្នាំទៀត បើសិនជាសហគមន៍អន្តរជាតិមិនមានលទ្ធភាពក្នុងការដាក់ទណ្ឌកម្មលើអ៊ីរ៉ង់នោះ។ មេដឹកនាំក្រុងរីយ៉ាដនេះព្រមានដូច្នេះក្នុងបទសម្ភាសន៍ជាមួយសារព័ត៌មាន Wall Street Journal ក្នុងពេលទស្សនកិច្ចនៅអាមេរិកដើមសប្តាហ៍នេះ។
អនាគតក្សត្រអារ៉ាប៊ីសាអូឌីត Mohammed Bin Salman បានព្រមានចំៗថា សង្គ្រាមរវាងរដ្ឋឥស្លាមប្រកាន់និកាយស៊ូនី អារ៉ាប៊ីសាអូឌីត និងរដ្ឋប្រកាន់និកាយស៊ីអ៊ីត អ៊ីរ៉ង់ អាចនឹងផ្ទុះឡើងនៅចន្លោះពី ១០ ទៅ ១៥ ឆ្នាំខាងមុខនេះ។
ក្នុងបទសម្ភាសន៍ជាមួយ Wall Street Journal ក្សត្រ Mohammed Bin Salman សង្កត់ធ្ងន់ថា សង្គ្រាមនេះកើតឡើងបើសិនជាសហគមន៍អន្តរជាតិព្រងើយកន្តើយនិងមិនដាក់សម្ពាធលើរបបដឹកនាំអ៊ីរ៉ង់ទេនោះ។
«ប្រសិនយើងមិនទទួលជោគជ័យក្នុងការដាក់ទណ្ឌកម្មលើអ៊ីរ៉ង់ទេ យើងនឹងអាចមានសង្គ្រាមជាមួយអ៊ីរ៉ង់ក្នុងរយៈពេល ១០ ទៅ ១៥ឆ្នាំទៀត»។ នេះជាការបញ្ជាក់របស់រជ្ជទាយាទអារ៉ាប៊ីសាអូឌីត។
រជ្ជទាយាទអង្គនេះក៏បានផ្តល់បទសម្ភាសន៍ដល់ប្រព័ន្ធផ្សព្វផ្សាយអាមេរិក ក្នុងពេលដែលទ្រង់បំពេញទស្សនកិច្ចនៅអាមេរិកដើមសប្តាហ៍កន្លងទៅ ហើយទ្រង់ក៏បានជួបពិភាក្សាជាមួយមេដឹកនាំប្រធានាធិបតីអាមេរិកលោក ដូណាល់ ត្រាំផង។
ទាំងលោក ត្រាំ និងរជ្ជទាយាទអារ៉ាប៊ីសាអូឌីត សុទ្ធតែទិតៀនកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ហើយលោក ត្រាំផ្ទាល់ធ្លាប់គំរាមលុបចោលកិច្ចព្រមព្រៀងនេះដែរ។ សហគមន៍អន្តរជាតិជាពិសេសបណ្តាប្រទេសសមាជិកហត្ថលេខីនៃកិច្ចព្រមព្រៀងមានសមាជិកអចិន្ត្រៃយ៍ក្រុមប្រឹក្សាសន្តិសុខទាំងប្រាំ និងអាល្លឺម៉ង់សុទ្ធតែបង្ហាញកង្វល់ចំពោះបញ្ហានេះ។
ដោយឡែក នៅក្នុងដំណើរទស្សនកិច្ចនៅអាមេរិកនោះដែរ តំណាងក្រុងរីយ៉ាដបានសង្កត់ធ្ងន់ថា បញ្ហាមួយទៀតដែលអាចនឹងកើតឡើងនោះ គឺវានឹងមានការប្រកួតប្រជែងអាវុធនុយក្លេអ៊ែររវាងអ៊ីរ៉ង់និងអារ៉ាប៊ីសាអូឌីត បើសិនជាអ៊ីរ៉ង់មានលទ្ធភាពផលិតអាវុធប្រល័យលោកបានមែននោះ។
Bin Salman ក៏បានហៅហៅមេដឹកនាំសាសនាកំពូលអ៊ីរ៉ង់ថាជា ហ៊ីត្លែរសម័យថ្មីថែមទៀតផង តែរដ្ឋមន្ត្រីការបរទេសអ៊ីរ៉ង់បានឆ្លើយតបវិញថា អនាគតក្សត្រអារ៉ាប៊ីសាអូឌីត ខ្វះខាតការគិតពិចារណា និងមានការយល់ឃើញខុសពីការពិតជាក់ស្តែងថែមទៀតផង។
តាមពិតទៅ ក្រុងតេអ៊ីរ៉ង់ និងក្រុងរីយ៉ាដ ប្រឈមមុខដាក់គ្នាលើបញ្ហាជាច្រើននៅក្នុងតំបន់កន្លងមក ក្រៅពីមានមនោគមន៍វិជ្ជាសាសនាផ្សេងគ្នានោះ។ ជម្លោះសំខាន់ៗ បច្ចុប្បន្នដែលមហាអំណាចតំបន់ទាំងពីរកំពុងប្រកួតប្រជែងគ្នានោះបង្កើនឥទ្ធិពលរៀងខ្លួននោះគឺក្នុង សង្គ្រាមយេម៉ែន ដែលអ៊ីរ៉ង់គាំទ្រក្រុមឧទ្ទាម Houthis ខណៈដែលអារ៉ាប៊ីសាអូឌីតបន្តទម្លាក់គ្រាប់បែកប្រឆាំងក្រុមប្រដាប់អាវុធនេះ។ មួយទៀតគឺសង្គ្រាមស៊ីវិលស៊ីរី ដោយអ៊ីរ៉ងជ្រោមជ្រែងមេដឹកនាំបច្ចុប្បន្នលោក បាសា អាល់អាសាដ ស្របពេលដែលអារ៉ាប៊ីសាអូឌីតជាខ្នងបង្អែកក្រុមឧទ្ទាមប្រឆាំងរដ្ឋាភិបាល៕
Tag:
អារ៉ាប៊ី សាអូឌីត
Mohammed Bin Salman
អ៊ីរ៉ង់
© រក្សាសិទ្ធិដោយ thmeythmey.com