ថាក់ស៊ីន ជឿថា អ្នកនយោបាយគាំទ្រលោកក្នុងបក្សភឿថៃនឹងឈ្នះការបោះឆ្នោតថៃភ្លូកទឹកភ្លូកដី

អន្តរជាតិ

នយោបាយអន្តរជាតិ

ថាក់ស៊ីន ជឿថា អ្នកនយោបាយគាំទ្រលោកក្នុងបក្សភឿថៃនឹងឈ្នះការបោះឆ្នោតថៃភ្លូកទឹកភ្លូកដី

31, Mar 2018 , 1:43 pm

រូបភាព

ដោយ:

អតីតនាយករដ្ឋមន្ត្រីថៃ លោក ថាក់ស៊ីន ស៊ីនណាវ៉ាត់ បានបង្ហាញវត្តមានរបស់លោក រួមជាមួយនឹងប្អូនស្រីបង្កើតរបស់លោក គឺលោកស្រីយីងឡាក់ ស៊ីណាវ៉ាត់ ដែលជាអតីតនាយករដ្ឋមន្ត្រីថៃដូចគ្នា នៅកម្មវិធីមួយក្នុងទឹកដីជប៉ុន ។ តាមរយៈកម្មវិធីនោះ អតីតនាយរដ្ឋមន្ត្រីរូបនេះ មិនមានសារប្រឆាំងនឹងរបបសឹកឡើយ តែលោក បានបង្ហាញជំនឿលើអ្នកគាំទ្ររបស់លោកពីជោគជ័យសម្រាប់ការបោះឆ្នោតខាងមុខ ។

ពីទីក្រុងតូក្យូ ប្រទេសជប៉ុន អតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត់ នៅថ្ងៃ ២៩ មីនា កន្លងទៅ បានទទូចឲ្យនាំយកលទ្ធិប្រជាធិបតេយ្យសម្រាប់រាជាណាចក្រថៃមកវិញ ហើយ លោក បានព្យាករផងដែរថា គណបក្សនយោបាយ ដែលជាអ្នកគាំទ្ររបស់លោក នឹងឈ្នះការបោះឆ្នោតជាតិខាងមុខបានយ៉ាងងាយស្រួលបំផុត ។

តាមការចុះផ្សាយរបស់សារព័ត៌មាន ABC របស់អូស្ត្រាលី លោកអតីតនាយករដ្ឋមន្ត្រី បានប្រាប់អ្នកសារព័ត៌មានយ៉ាងសង្ខេបថា លោក មិនមានពាក់ព័ន្ធនឹងបក្សនយោបាយភឿថៃទៀតឡើយ ក៏ប៉ុន្តែ លោក ក៏បានសង្កត់ធ្ងន់យ៉ាងដូច្នេះថា៖« ខ្ញុំ ជឿជាក់ថា យើងមានមនុស្សល្អៗជាច្រើននៅក្នុងបក្សភឿថៃ ។ ពួកគេ អាចមានលទ្ធភាពគ្រប់គ្រាន់ក្នុងការដឹកនាំបក្សឲ្យឈ្នះការបោះឆ្នោតជាថ្មីម្តងទៀត » ។

គួរជម្រាបផងដែរ ទាំងលោក ថាក់ស៊ីន និង លោកស្រី យីងឡាក់ ដែលជាអតីតមេដឹកនាំកំពូលថៃ និងបក្សភឿ ថៃ សុទ្ធសឹងតែត្រូវបានទម្លាក់ចេញពីអំណាចដោយសាររដ្ឋប្រហារយោធា ។ លោក ថាក់ស៊ីន ធ្លាប់ជាតួអង្គនយោបាយដ៏ឥទ្ធិពល និង ប្រជាប្រិយភាពបំផុតនៅក្នុងបរិបទនយោបាយថៃ។ លោក ត្រូវបានទម្លាក់ចេញពីអំណាចតាមរយៈរដ្ឋប្រហារ យោធាឆ្នាំ២០០៦ ដោយរងនូវការចោទពីបទប្រព្រឹត្តអំពើពុករលួយ និង ប្រើប្រាស់អំណាចខុសច្បាប់។ ឆ្នាំ ២០០៨ លោកត្រូវតុលាការថៃកាត់ទោសពន្ធនាគារ ។

សម្រាប់លោកស្រី យីងឡាក់វិញ ត្រូវបានទម្លាក់ចេញពីអំណាចដោយសាររដ្ឋប្រហារយោធាឆ្នាំ២០១៤ ក្រោមការដឹកនាំដោយនាយករដ្ឋមន្ត្រីថៃបច្ចុប្បន្នគឺលោកឧត្តមសេនីយ៍ ប្រាយុទ្ធ ចន្ទ អូចា ។ មិនខុសពីបងប្រុសបង្កើតលោកស្រីឡើយ លោកស្រី យីងឡាក់ ក៏កំពុងតែតែរងការចោទប្រកាន់ពីតុលាការថៃ ពាក់ព័ន្ធបទពុករលួយ និងធ្វើប្រហែសក្នុងការដឹកនាំប្រទេស ដែលតម្រូវឲ្យលោកស្រី ត្រូវផ្តល់សំណងរាប់លានដុល្លារ រួមទាំងទទួលខុសត្រូវទោសព្រហ្មទណ្ឌទៀតផង ។

អ្វីដែលគួរឲ្យកត់សម្គាល់នោះ ខណៈកំពុងតែរស់នៅនិរទេសខ្លួន អតីតមេដឹកនាំថៃទាំងពីររូបនេះ ហាក់មានឥរិយាបថស្ងប់ស្ងាត់ពាក់ព័ន្ធនឹងនយោបាយ ។ ពោលគឺអ្នកទាំងពីរ មិនមានចលនានយោបាយដើម្បីទាមទារឲ្យអន្តរជាតិជួយអន្តរាគមន៍ តាមរយៈការដាក់សម្ពាធនានាទៅលើរដ្ឋាភិបាលរបបសឹកឡើយ ។ ក៏ប៉ុន្តែអ្នកទាំងពីរ ជានិច្ចកាលតែងតែបង្ហាញវត្តមាននៅក្នុងប្រទេសក្នុងតំបន់ ដែលរួមមានទាំងចិន ជប៉ុន និងសិង្ហបុរីផងដែរនោះ ៕