កម្ពុជានឹងធ្វើជាម្ចាស់ផ្ទះ នៃកិច្ចប្រជុំកំពូលគណៈកម្មការទន្លេមេគង្គ ដើម្បីការពារតំបន់ទន្លេមេគង្គ

ជាតិ

កម្ពុជានឹងធ្វើជាម្ចាស់ផ្ទះ នៃកិច្ចប្រជុំកំពូលគណៈកម្មការទន្លេមេគង្គ ដើម្បីការពារតំបន់ទន្លេមេគង្គ

31, Mar 2018 , 3:03 pm

រូបភាព

ដោយ:

ភ្នំពេញ៖ កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលគណៈកម្មការទន្លេមេគង្គលើកទី៣ ដែលរៀបចំនៅខេត្តសៀមរាបប្រទេសកម្ពុជា នៅថ្ងៃទី០៤ និងទី០៥ ខែមេសា ។ ក្នុងកិច្ចប្រជុំនេះក្រោមប្រធានបទស្តីពី «មេគង្គមួយ ស្មារតីមួយ» ដើម្បីជាកិច្ចពង្រឹងការយកចិត្តទុកដាក់លើការគ្រប់គ្រងធនធានទឹក និងធនធានដទៃទៀតក្នុងទន្លេមេគង្គ ។

ប្រទេសកម្ពុជា ថៃ ឡាវ និងវៀតណាម ព្រមទាំងតំណាងជាន់ខ្ពស់មកពីប្រទេសចិន និងមីយ៉ាន់ម៉ា ដែលជាដៃគូសន្ទនារបស់ MRC នឹងពិភាក្សាគ្នាលើទិសដៅរួមគ្នា ក្នុងការការពារនិងទប់ស្កាត់បញ្ហានានា នៃតំបន់អាងទន្លេមេគង្គប្រកបដោយចីរភាព។ នេះបើតាមសេចក្តីប្រកាសព័ត៌មានរបស់គណៈកម្មការទន្លេមេគង្គ(MRC)។

លោក Pham Tuan Phan នាយកប្រតិបត្តិ របស់គណៈកម្មការទន្លេមេគង្គ បានលើកឡើងថា ថ្នាក់ដឹកនាំរបស់ប្រទេសទាំងបួននៃទន្លេមេគង្គជួបប្រជុំគ្នាលើកទី៣នេះ ដើម្បីរំឮកជាថ្មីពីការប្ដេជ្ញាចិត្តកម្រិតខ្ពស់បំផុតរបស់ពួកគេ ចំពោះតួនាទីភារកិច្ចនិងការបំពេញការងារបស់គណៈកម្មការទន្លេមេគង្គ ក្នុងទិសដៅធ្វើឲ្យតំបន់អាងទន្លេមេគង្គក្លាយជាតំបន់ដែលមានវិបុលភាពសេដ្ឋកិច្ច យុត្តិធម៌សង្គមនិងមានបរិស្ថានល្អប្រសើរ។

បើតាមលោក Pham Tuan Phan បានបន្ថែមថា ការពង្រឹងលើគ្រប់វិស័យ គឺជាការធានាបាននូវនិរន្តភាពធនធាននេសាទ ការកែលម្អគ្រប់គ្រងគ្រោះទឹកជំនន់ គ្រោះរាំងស្ងួតនិងការថែរក្សាប្រព័ន្ធអេកូឡូហ្ស៊ី ក្នុងតំបន់ទន្លេមេគង្គ។

នាយកប្រតិបត្តិ របស់គណៈកម្មការទន្លេមេគង្គប្រចាំប្រទេសឡាវ បានបញ្ជាក់ដូច្នេះថា៖«ដោយសារកំណើនសម្ពាធមកលើតំបន់អាងទន្លេនេះ ជាពិសេសការកើនឡើងនូវចំនួនប្រជាជន ការអភិវឌ្ឍហេដ្ឋារចនាសម្ព័ន្ធ និងផលប៉ះពាល់ដែលបង្កឡើងដោយអាកាសធាតុ ជាការសំខាន់បំផុតដែលយើងត្រូវប្រើប្រាសព្រឹត្តិការណ៍នេះ ជាកាលានុវត្តភាព ដើម្បីដាក់ចេញនូវអាទិភាពឲ្យបានច្បាស់លាស់។ យើងចាំបាច់ត្រូវធ្វើការងាររួមគ្នា ទាំងឆ្លងដែន ទាំងឆ្លងវិស័យ ដើម្បីធានាឱ្យមានការចែករំលែកធនធានទឹក និងអត្ថប្រយោជន៍ ដែលពាក់ព័ន្ធនានា ប្រកបដោយសមធម៌»។

គណៈកម្មការទន្លេមេគង្គ(MRC) ជាស្ថាប័នអន្តរជាតិរដ្ឋាភិបាលដែលមានតួនាទីជំរុញ និងពិភាក្សា កិច្ចពិគ្រោះយោបល់ និងកិច្ចសហការប្រតិបត្តិការថ្នាក់តំបន់ទន្លេមេគង្គក្នុងខ្សែទឹកខាងក្រោម។ ហើយក៏ជាវេទិកាថ្នាក់តំបន់សម្រាប់ទូតផ្នែកទឹក និងជាអ្នកថែរក្សាធនធានទឹក។ ស្ថាប័ននេះត្រូវបានបង្កើតឡើងក្នុងឆ្នាំ១៩៩៥ ផ្អែកទៅតាមកិច្ចព្រមព្រៀងរវាងកម្ពុជា ថៃ ឡាវ និងវៀតណាម៕

អត្ថបទទាក់ទង

កងកម្លាំងច្រើនរយនាក់ត្រៀមការពារសន្តិសុខក្នុងកិច្ចប្រជុំទន្លេមេគង្គលើកទី៣នៅសៀមរាប