អន្តរជាតិ
អ្នកនាំពាក្យ៖ ក្រុមសិទ្ធិមនុស្សកំពុងក្លាយជា « ឈ្នាន់ » របស់មេគ្រឿងញៀនដើម្បីប្រឆាំងរដ្ឋាភិបាលហ្វីលីពីន ប្រតិបត្តិការបង្ក្រាបឈ្មួញគ្រឿងញៀននៅហ្វីលីពីន។ រូបថត AFP
× រដ្ឋាភិបាលក្រុងម៉ានីល បានមើលឃើញពីស្ថានភាពមួយ ដែលក្រុមឈ្មួញគ្រឿងញៀន កំពុងតែទទួលផលប្រយោជន៍ ដោយប្រយោលតាមរយៈសកម្មជនសិទ្ធិមនុស្ស ។ នោះគឺ ក្រុមសិទ្ធិមនុស្ស បានធ្លាក់ចូលជាឈ្នាន់មួយរបស់ឈ្មួយគ្រឿងញៀនក្នុងការធ្វើឲ្យស្ថានភាពនៃការបោសសម្អាតគ្រឿងញៀនរបស់រដ្ឋាភិបាលហ្វីលីពីន មើលឃើញកាន់តែអាក្រក់ពីសំណាក់អ្នកខាងក្រៅ ។
អ្នកនាំពាក្យប្រធានាធិបតីហ្វីលីពីន លោក Harry Roque កាលពីថ្ងៃ២៦ មីនា បានចេញសេចក្តីថ្លែងការណ៍មួយ ដោយបានអះអាងថា ក្រុមមេឈ្មួយគ្រឿងញៀន បានរងការខាតបង់ផ្នែកហិរញវត្ថុរបស់ពួកគេជាច្រើនលើសលប់ គិតចាប់តាំងពីការអនុវត្តសង្គ្រាមគ្រឿងញៀន២០ខែកន្លងមក ហើយ ក៏មានក្រុមមួយចំនួន បានព្យាយាមធ្វើឲ្យរដ្ឋាភិបាលហ្វីលីពីន ជួបបញ្ហាផងដែរ ។
តាមការចុះផ្សាយរបស់សារព័ត៌មានហ្វីលីពីន ABS-CBN អ្នកនាំពាក្យ ថែ្លងបែបនេះ ហើយ ក៏បានទាញក្រុមសិទ្ធិមនុស្សជាមួយ ដោយលោកអះអាងថា ក្រុមនេះ កំពុងតែក្លាយជាឈ្នាន់របស់ឈ្មួញគ្រឿងញៀនដោយប្រយោល ក្នុងការប្រយុទ្ធប្រឆាំងតបតទៅនឹងសង្គ្រាមគ្រឿងញៀនរបស់លោកប្រធានាធិបតី រ៉ូឌ្រីហ្គោ ឌូទើតេ ។
ការណ៍ ដែលអ្នកនាំពាក្យលើកឡើងបែបនេះ ដ្បិតកន្លងមក ក្រុមសិទ្ធិមនុស្ស តែងតែចេញថ្លែងការណ៍ថ្កោលទោសរដ្ឋាភិបាលហ្វីលីពីនរបស់លោក ឌូទើតេ ថា បានបំពានសិទ្ធិមនុស្សយ៉ាងធ្ងន់ធ្ងរ ខណៈហ្វីលីពីន ក៏តែងតែអះអាងម្តងហើយម្តងទៀតថា សង្គ្រាមគ្រឿងញៀនរបស់គេ ធ្វើឡើងដើម្បីកែប្រែសង្គមហ្វីលីពីនឲ្យកាន់តែស្អាតស្អំ ជាពិសេសនោះ ធ្វើឲ្យអ្នកបន្តវេនជំនាន់ក្រោយហ្វីលីពីនឃ្លាតឆ្ងាយពីគ្រឿងញៀនផង ។
តាមប្រភពព័ត៌មានដដែលនោះ អ្នកនាំពាក្យប្រធានាធិបតីហ្វីលីពីន មិនបញ្ជាក់ឈ្មោះ ក្រុមអង្គការសិទ្ធិមនុស្សណាមួយ ដែលកំពុងតែក្លាយជាឈ្នាន់របស់ក្រុមឈ្មួញគ្រឿងញៀនឡើយ ។ តែកន្លងមក មានអង្គការសិទ្ធិមនុស្សជាច្រើន រួមទាំងអង្គការសហប្រជាជាតិ ក៏បានចូលរួមរិះគន់ និងថ្កោលទោសចំណាត់ការរបស់ហ្វីលីពីន ។
បើ់តាមការអះអាងរបស់ប៉ូលិសហ្វីលីពីន កន្លងមក ពួកគេ បានសម្លាប់ជនសង្ស័យពាក់ព័ន្ធគ្រឿងប្រមាណជាង បួនពាន់នាក់មកហើយ ។ រដ្ឋាភិបាលហ្វីលីពីនរបស់លោក ឌូទើតេ ក៏បានអះអាងដែរថា លោក នឹងបន្តអនុវត្តសង្គ្រាមគ្រឿងញៀននេះរហូតដល់ផុតអាណត្តិឆ្នាំ២០២២ ៕
Tag:
ហ្វីលីពីន
អាស៊ាន
គ្រឿងញៀន
© រក្សាសិទ្ធិដោយ thmeythmey.com