ជាតិ
កូរ៉េខាងត្បូង ប្រាប់ថា មិនលូកដៃចូលផ្ទៃក្នុងរបស់កម្ពុជាឡើយ ជំនួបរវាងលោក ប្រាក់ សុខុន និងលោក គីម យ៉ុងជេ នៅថ្ងៃទី២ ខែមេសា ឆ្នាំ២0១៨
× ភ្នំពេញ៖ ក្នុងជំនួបទ្វេភាគី លោក គឹម យ៉ុងជេ (Kim Young-Chae) ឯកអគ្គរដ្ឋទូតនៃសាធារណរដ្ឋកូរ៉េប្រចាំអាស៊ាន បាននិយាយនៅចំពោះមុខលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា ថា កូរ៉េ មិនធ្វើកិច្ចការណា ដែលប៉ះពាល់ដល់ផ្ទៃក្នុងរបស់កម្ពុជានោះទេ។ ជំនួបរវាងអ្នកទាំងពីរ ធ្វើឡើងកាលពីថ្ងៃទី២ ខែមេសា ឆ្នាំ២0១៨ នៅទីស្តីការក្រសួងការបរទេសកម្ពុជា។
សេចក្តីប្រកាសព័ត៌មានស្តីពីលទ្ធផលនៃជំនួបខាងលើ បានស្រង់សម្តីរបស់ឯកអគ្គរដ្ឋទូតនៃសាធារណរដ្ឋកូរ៉េប្រចាំអាស៊ាន ដោយបកប្រែជាភាសាខ្មែរយ៉ាងដូច្នេះថា៖«ជំហររបស់កូរ៉េ គឺគោរពអធិបតេយ្យភាព និងមិនជ្រៀតជ្រែកចូលកិច្ចការផ្ទៃក្នុងរបស់កម្ពុជាឡើយ»។
លោក គឹម យ៉ុងជេ បន្តថា កូរ៉េខាងត្បូង យល់ពីតម្លៃនៃសន្តិភាព និងស្ថិរភាពរបស់កម្ពុជា ដែលជាលក្ខខណ្ឌចម្បង និងមិនអាចខ្វះបាន សម្រាប់ការអភិវឌ្ឍសេដ្ឋកិច្ច និងសង្គម។ លោក ក៏ឆ្លៀតសរសើរពីភាពឈ្លាសវៃក្នុងការដឹកនាំប្រទេសរបស់សម្តេចនាយករដ្ឋមន្ត្រី ហ៊ុន សែន ផងដែរ។ លើសពីនេះ លោក បានចាត់ទុកកម្ពុជា ថាជាប្រទេសមួយ ដែលសកម្ម ក្នុងការសម្របសម្រួល និងការលើកស្ទួយនូវទំនាក់ទំនងអាស៊ាន-កូរ៉េ។
សេចក្តីប្រកាសព័ត៌មានដដែល បានឲ្យដឹងថា លោក ប្រាក់ សុខុន ក្នុងនាមជាប្រមុខទូតកម្ពុជា បានសម្តែងក្តីរីករាយ និងអរគុណរដ្ឋាភិបាលកូរ៉េខាងត្បូង ដែលបង្ហាញនូវការយល់ដឹងចំពោះសភាពការណ៍នៅកម្ពុជា ហើយបានប្រកាន់ជំហរគោរពអធិបតេយ្យភាព និងកិច្ចការផ្ទៃក្នុងរបស់កម្ពុជា។
ការប្រកាសជំហរបែបនេះរបស់កូរ៉េខាងត្បួង គឺស្របពេលដែលសហគមន៍អន្តរជាតិមួយចំនួន កំពុងរិះគន់រដ្ឋាភិបាលកម្ពុជា ថាធ្វើឲ្យប្រជាធិបតេយ្យ សិទ្ធិមនុស្ស និងប្រព័ន្ធផ្សព្វផ្សាយ ធ្លាក់ចុះ។ សហគមន៍អន្តរជាតិទាំងនោះ ដោយមានសហរដ្ឋអាមេរិក និងសហភាពអឺរ៉ុប ជាអ្នកចេញមុខមាត់ខ្លាំងជាងគេ បានដាស់តឿនរដ្ឋាភិបាលកម្ពុជា ឲ្យកែលម្អស្ថានការណ៍ឲ្យល្អប្រសើរ មុនការបោះឆ្នោតថ្នាក់ជាតិ មកដល់។
សហគមន៍អន្តរជាតិ យល់ថា រដ្ឋាភិបាលកម្ពុជា គួរដោះស្រាយឲ្យបានឆាប់រហ័យ ដោយផ្តល់សេរីភាពដល់លោក កឹម សុខា និងបើកផ្លូវឲ្យគណបក្សសង្គ្រោះជាតិ រស់ឡើងវិញ ដើម្បីបានចូលរួមការបោះឆ្នោត។ បើពុំដូច្នេះទេ ពួកគេ នឹងចាត់ទុកការបោះឆ្នោតថា ធ្វើឡើងដោយមិនមានភាពស្របច្បាប់ និងមិនទទួលស្គាល់ឡើយ។
រដ្ឋាភិបាលកម្ពុជា មិនត្រឹមតែមិនធ្វើតាមការទាមទារខាងលើនោះទេ ប៉ុន្តែថែមទាំងចោទសហគមន៍អន្តរជាតិវិញថា បានជ្រៀតជ្រែកចូលអធិបតេយ្យរបស់កម្ពុជា ដែលខុសនឹងធម្មនុញ្ញនៃអង្គការសហប្រជាជាតិ ក៏ដូចជាច្បាប់អន្តរជាតិនានា។ រដ្ឋាភិបាលកម្ពុជា ប្រកាសជំហរដដែលៗថា ការបោះឆ្នោតថ្នាក់ជាតិ នៅថ្ងៃទី២៩ ខែកក្កដា ឆ្នាំ២0១៨ នឹងប្រព្រឹត្តទៅតាមការគ្រោងទុក ដោយមិនខ្វល់ពីការទទួលស្គាល់ ឬមិនទទួលស្គាល់ពីសហគមន៍អន្តរជាតិឡើយ៕
Tag:
កូរ៉េ
កម្ពុជា
ប្រាក់ សុខុន
© រក្សាសិទ្ធិដោយ thmeythmey.com