អតីតអភិបាលខេត្តតាកែវ និងស្នងការរង ត្រូវជាប់ឃុំបណ្តោះអាសន្ន ក្រោមបទឃាតកម្ម

ជាតិ

អតីតអភិបាលខេត្តតាកែវ និងស្នងការរង ត្រូវជាប់ឃុំបណ្តោះអាសន្ន ក្រោមបទឃាតកម្ម

04, Apr 2018 , 10:04 am

រូបភាព

សកម្មភាពសមត្ថកិច្ច នាំខ្លួនលោក ឡាយ វណ្ណៈ អតីតអភិបាលខេត្តតាកែវ ទៅកាន់តុលាការ

ដោយ: ថ្មីៗ

ចៅក្រមស៊ើបសួរនៃសាលាដំបូងរាជធានីភ្នំពេញ បញ្ជាឲ្យឃុំលោក ឡាយ វណ្ណៈ អតីតអភិបាលខេត្តតាកែវ (ប្អូន) និងលោក ឡាយ ណារិទ្ធ ស្នងការរងខេត្តតាកែវ (បង) រួមទាំងមនុស្សពាក់ព័ន្ធពីរនាក់ផ្សេងទៀត ជាបណ្តោះអាសន្ន។ លោក លី សុផាណា អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានផ្តល់ព័ត៌មាននេះ ដល់ក្រុមអ្នកកាសែតតាមបណ្តាញទំនាក់ទំនងតេឡេក្រាម នៅយប់ថ្ងៃទី៣ ខែមេសា ឆ្នាំ២0១៨។

លោក ឡាយ វណ្ណៈ និង លោក ឡាយ ណារិទ្ធ ដែលជាបងប្អូនបង្កើត ត្រូវបានព្រះរាជអាជ្ញាចោទប្រកាន់ពីបទ «ឃាតកម្ម» លើលោកស្រី ចេវ សុវឌ្ឍនា។ រីឯ មនុស្សពីរនាក់ទៀត ត្រូវបានចោទថា លាក់បាំងតម្រុយ ដើម្បីធ្វើឲ្យមានឧបសគ្គក្នុងការស្វែងរកការពិតក្នុងសំណុំរឿងនេះ។

បន្ទាប់ពីចោទប្រកាន់រួចហើយ ព្រះរាជអាជ្ញា ក៏បញ្ជូនអ្នកទាំង៤ ទៅឲ្យចៅក្រមស៊ើបសួរ ដើម្បីចាត់ការបន្ត។ ព្រះរាជអាជ្ញា សន្និដ្ឋានថា មរណភាពរបស់លោកស្រី ចេវ សុវឌ្ឍនា ដែលមានទំនាក់ទំនងស្នេហាលួចលាក់ជាមួយលោក ឡាយ វណ្ណៈ មិនមែនជាការធ្វើអត្តឃាតនោះទេ ប៉ុន្តែទំនងជាអំពើឃាតកម្ម។

មាត្រា១៩៩ នៃក្រមព្រហ្មទណ្ឌ បានកំណត់ថា អំពើឃាតកម្ម ត្រូវផ្តន្ទាទោសពី១0ឆ្នាំ ទៅ ១៥ឆ្នាំ។ ចំណែក មាត្រា៥៣២ នៃក្រមព្រហ្មទណ្ឌ បានកំណត់ថា អំពើលាក់បាំងតម្រុយដែលធ្វើឲ្យមានឧបសគ្គក្នុងការស្វែងរកការពិត ត្រូវផ្តន្ទាទោសពី១ឆ្នាំ ទៅ ៣ឆ្នាំ និងពិន័យជាប្រាក់ពី២លានរៀល ទៅ ៦លានរៀល។

គួររម្លឹកថា លោកស្រី ចេវ សុវឌ្ឍនា ត្រូវបានគេប្រទះឃើញស្លាប់ ដោយស្ថានភាពចងក ក្នុងផ្ទះ ស្ថិតនៅក្រុងដូនកែវ ខេត្តតាកែវ កាលពីអំឡុងខែមករា ឆ្នាំ២0១៨។ ដោយសារតែមិនជឿថា លោកស្រី ចេវ សុវឌ្ឍនា សម្លាប់ខ្លួនដោយចងក សមត្ថកិច្ច ក៏ចាប់ផ្តើមស៊ើបអង្កេត។ ទីបំផុត អតីតអភិបាលខេត្តតាកែវ និងស្នងការរងខេត្តតាកែវ ត្រូវបានរកឃើញថា ជាប់ពាក់ព័ន្ធនឹងអំពើឃាតកម្មនេះ៕