នាយករដ្ឋមន្ត្រីឡាវ វៀតណាម និងថៃ នឹងមកប្រជុំនៅកម្ពុជា ជុំវិញបញ្ហាទន្លេមេគង្គ

ជាតិ

នាយករដ្ឋមន្ត្រីឡាវ វៀតណាម និងថៃ នឹងមកប្រជុំនៅកម្ពុជា ជុំវិញបញ្ហាទន្លេមេគង្គ

04, Apr 2018 , 8:19 pm

រូបភាព

(ពីឆ្វេងទៅស្តាំ) សម្តេច ហ៊ុន សែន នាយករដ្ឋមន្រ្តីកម្ពុជា លោក ង្វៀន សួនហ៊្វុក នាយករដ្ឋមន្រ្តីវៀតណាម និងលោក ថងលូន ស៊ីសូលីត នាយរដ្ឋមន្រ្តីឡាវ ស្ថិតក្នុងកិច្ចប្រជុំកំពូលកម្ពុជា-ឡាវ-វៀតណាម កាលពីថ្ងៃទី៣0 ខែមីនា ឆ្នាំ២0១៨ នៅទីក្រុងហាណូយ ប្រទេសវៀតណាម។ រូបពីទំព័រហ្វេសបុកសម្តេច ហ៊ុន សែន

ដោយ: ថ្មីៗ

លោក ថងលូន ស៊ីសូលីត នាយរដ្ឋមន្ត្រីឡាវ លោក ប្រាយុទ្ធ ច័ន្ទអូចា នាយករដ្ឋមន្ត្រីថៃ និងលោក ង្វៀន សួនហ្វ៊ុក នាយករដ្ឋមន្ត្រីវៀតណាម នឹងដឹកនាំគណៈប្រតិភូ មកកាន់កម្ពុជា ដើម្បីចូលរួមកិច្ចប្រជុំកំពូលនៃគណៈកម្មការទន្លេមេគង្គលើកទី៣ ដែលនឹងរៀបចំឡើងនៅក្រុងសៀមរាប នៅថ្ងៃទី៥ ខែមេសា ឆ្នាំ២០១៨។ នេះបើតាមសេចក្តីជូនព័ត៌មានពីក្រសួងការបរទេសកម្ពុជា។

សេចក្តីជូនព័ត៌មាន បានឲ្យដឹងទៀតថា ក្រៅពីមេដឹកនាំនៃប្រទេសបី តំណាងជាន់ខ្ពស់នៃប្រទេសចិន និងមីយ៉ាន់ម៉ា ក៏នឹងមកចូលរួមក្នុងកិច្ចប្រជុំនេះដែរ។ ប្រធានបទនៃកិច្ចប្រជុំនេះ គឺ «ការលើកម្ពស់កិច្ចខិតខំប្រឹងប្រែងរួមគ្នា និងភាពជាដៃគូ ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាព ក្នុងអាងទន្លេមេគង្គ-ទន្លេមេគង្គតែមួយ ស្មារតីតែមួយ»។

សម្តេច ហ៊ុន សែន នាយករដ្ឋមន្ត្រីកម្ពុជា នឹងធ្វើជាប្រធាននៃកិច្ចប្រជុំនេះ។ សេចក្តីជូនព័ត៌មាន បានបញ្ជាក់ ក្រោយបញ្ចប់កិច្ចប្រជុំ «សេចក្តីថ្លែងការណ៍ក្រុងសៀមរាប» នឹងត្រូវអនុម័តនិងប្រកាសឡើង ដោយឆ្លុះបញ្ចាំងនូវការប្តេជ្ញាចិត្តផ្នែកនយោបាយកម្រិតខ្ពស់របស់ប្រទេសជាសមាជិកនៃគណៈកម្មការទន្លេមេគង្គ ក្នុងការបន្តធ្វើឲ្យប្រសើរនូវកិច្ចសហប្រតិបត្តិការក្នុងតំបន់។

ក្រៅពីកិច្ចប្រជុំស្តីពីទន្លេមេគង្គ នាយករដ្ឋមន្ត្រីកម្ពុជា ក៏នឹងមានជំនួបដាច់ដោយឡែកជាមួយ លោកនាយករដ្ឋមន្ត្រី ថងលូន ស៊ីសូលីត លោកនាយករដ្ឋមន្ត្រី ប្រាយុទ្ធ ច័ន្ទអូចា និងលោកនាយករដ្ឋមន្ត្រី ង្វៀន សួនហ្វ៊ុក ផងដែរ។ នេះបើតាមសេចក្តីសេចក្តីជូនព័ត៌មានដដែល៕