កីឡាជាតិ
ជាតិ
លោក ហង់ ជួនណារ៉ុន៖ បើមន្ត្រីកីឡាមិនលើកកម្ពស់កីឡា យើងមិនអាចទាក់ទាញយុវជនបានទេ លោក ហង់ ជួនណារ៉ុន ថ្លែងក្នុងពិធីបិទពានរង្វាន់របស់ខ្លួនកាលពីថ្ងៃទី៥ មេសា នៅពហុកីឡដ្ឋានជាតិ, រូបភាពទាំងអស់ពីហ្វេសប៊ុកអគ្គនាយកដ្ឋានកីឡា
× រដ្ឋមន្ត្រីក្រសួងអប់រំយុវជននិងកីឡា លោក ហង់ ជួនណារ៉ុន ជំរុញឲ្យមន្ត្រី ដែលបម្រើការងារក្នុងក្របខណ្ឌកីឡា ត្រូវអនុវត្ត និងលើកកម្ពស់កីឡាជាអាទិភាព បើចង់ទាក់ទាញយុវជនឲ្យចូលរួមជាមួយវិស័យកីឡា។ ហើយលោកជឿជាក់ថា បើមន្ត្រីកីឡាខ្លួនឯងផ្ទាល់មិនអាចអនុវត្តបាននោះទេ គឺមិនអាចទាក់ទាញចិត្តយុវជនឲ្យស្រលាញ់វិស័យកីឡាបានឡើយ។ ការថ្លែងបែបនេះពេល លោក ហង់ ជួនណារ៉ុន ចូលរួមបិទពានរង្វាន់បាល់ទាត់ឯកឧត្តម ហង់ ជួនណារ៉ុន លើកទី១ កាលពីថ្ងៃទី៥ មេសា ឆ្នាំ២០១៨។
រដ្ឋមន្ត្រីក្រសួងអប់រំយុវជននិងកីឡា លោក ហង់ ជួនណារ៉ុន មានការជឿជាក់ថា ការធ្វើជាគំរូដ៏ល្អរបស់ថ្នាក់ដឹកនាំកីឡាក្នុងក្របខណ្ឌកីឡាតាមរយៈការចូលរួមលេងកីឡា ជាចលករដ៏សំខាន់ក្នុងការទាក់ទាញយុវជនឲ្យចូលរួមជាមួយវិស័យមួយនេះ។ បើពុំមានភាពជាគំរូទេនោះ គឺមិនអាចទាក់ទាញទឹកចិត្តយុវជនបានឡើយ។
«បើយើងជាមន្ត្រីក្រសួងអប់រំយុវជននិងកីឡា មិនអនុវត្តលើកកម្ពស់វិស័យកីឡាដោយខ្លួនឯងនោះទេ គឺយើងមិនទាក់ទាញបេះដូងយុវជនរបស់យើងឲ្យស្រលាញ់វិស័យកីឡាបានទេ។ ដូច្នេះ នេះគឺ...ជាគំរូមួយដ៏ល្អ ហើយវាក៏ជាការបង្ហាញភាពជាអ្នកដឹកនាំ តាមរយៈការផ្តល់នូវគំរូដ៏ល្អ»។ នេះជាការលើកឡើងរបស់លោក ហង់ ជួនណារ៉ុន ក្នុងថ្ងៃបិទពាន់រង្វាន់ឯកឧត្តម ហង់ ជួនណារ៉ុន លើកទី១កាលពីល្ងាចថ្ងៃទី៥ មេសា ឆ្នាំ២០១៨ នៅពហុកីឡដ្ឋានជាតិ។
ក្រោយឆ្លងកាត់ការប្រកួតអស់រយៈពេល២ខែចាប់ពីថ្ងៃទី៥ កុម្ភៈ ដល់ថ្ងៃទី៥ ខែមេសា ពានរង្វាន់ឯកឧត្តម ហង់ ជួនណារ៉ុន ដែលបានប្រព្រឹត្តទៅយ៉ាងរលូន និងទទួលបានការវាយតម្លៃខ្ពស់ពីថ្នាក់ដឹកនាំក្រសួងអប់រំថា បានបញ្ចប់យ៉ាងជោគជ័យ បានរកឃើញម្ចាស់ជ័យលាភីហើយ។ ក្នុងនោះជើងឯកបានទៅក្រុមបាល់ទាត់អគ្គនាយកដ្ឋានកីឡា ដោយទទួលបានថវិកាលើកទឹកចិត្តចំនួន៤លានរៀល រីឯអគ្គនាយដ្ឋានអប់រំបាន៣លានរៀលក្រោយទទួលបានលេខ២ និងក្រុមលេខ៣អគ្គនាយកដ្ឋានឧត្តមសិក្សា បាន២លានរៀល។
តាមរយៈពានរង្វាន់នេះក្រសួងអប់រំយុវជននិងកីឡា ចម្រាញ់បានកីឡាករជើងខ្លាំង២៥រូប សម្រាប់ត្រៀមចូលរួមប្រកួតពានរង្វាន់អន្តរក្រសួងប្រចាំឆ្នាំ២០១៨ តំណាងឲ្យស្ថាប័នខ្លួនផងដែរ។ ដើម្បីត្រៀមពានរង្វាន់អន្តរក្រសួង ក្រុមបាល់ទាត់ក្រសួងអប់រំយុវជននិងកីឡា ត្រូវជួបប្រកួតមិត្តភាពកម្តៅសាច់ដុំជាមួយក្រុមប៉ៃលិន ស្ទឹងត្រែង និងឧត្តរមានជ័យ។ ការប្រកួតព្រឹត្តទៅចាប់ពីថ្ងៃទី៧-៨ ខែមេសា ឆ្នាំ២០១៨៕
Tag:
ហង់ ជួនណារ៉ុន
អ៊ុក សិទ្ធិជាតិ
បាល់ទាត់
© រក្សាសិទ្ធិដោយ thmeythmey.com