កីឡាជាតិ
ជាតិ
ភ្នំពេញក្រោនស្វាគមន៍ណាហ្គាវើល រីឯបឹងកេតជួបសូលទីឡូអង្គរ មុនវិសាខាប៉ះអាស៊ីអឺរ៉ុប
សកម្មភាពប្រកួត ដែលភ្នំពេញក្រោនបញ្ចប់ដោយគ្មានការស៊ុតបញ្ចូលទីជាមួយវិសាខាកាលពីសប្តាហ៍ទី៣
×![]()
ក្រោយសម្រាកអស់រយៈពេលពីរសប្តាហ៍កន្លងមក ការប្រកួតបាល់ទាត់ក្របខណ្ឌលីគកំពូលកម្ពុជា បានវិលត្រឡប់មកវិញហើយដោយនៅថ្ងៃសៅរ៍ ទី៧ ខែមេសា ឆ្នាំ២០១៨នេះ មានការប្រកួតចំនួន៣គូ។ ក្នុងនោះក្រុមភ្នំពេញក្រោនបើកទ្វារកីឡដ្ឋាន RSN ស្វាគមន៍ក្រុមភ្ញៀវណាហ្គាវើលនាម៉ោង៦ល្ងាច រីឯបឹងកេត តទល់ជាមួយសូលទីឡូអង្គរនៅម៉ោង៦:៣០នាទីល្ងាច មុនវិសាខាប្រជែងជាមួយអាស៊ីអឺរ៉ុបនៅម៉ោង៣:៣០នាទីរសៀលនៅពហុកីឡដ្ឋានជាតិដូចគ្នា។
ក្រោយសម្រាកពីរសប្តាហ៍ បន្ទាប់ពីកីឡាករមួយចំនួនជាប់ភារកិច្ចជួយក្រុមកីឡាជម្រើសជាតិក្នុងព្រឹត្តិការណ៍ AFC Asian Cup បាល់ទាត់ក្របខណ្ឌលីគកំពូលកម្ពុជាត្រូវបន្តការប្រកួតសប្តាហ៍ទី៤របស់ខ្លួនក្នុងសប្តាហ៍នេះ។ នៅថ្ងៃសៅរ៍ ទី៧មេសា ឆ្នាំ២០១៨នេះ ក្រុមភ្នំពេញក្រោនត្រូវធ្វើការធ្ងន់ ដោយទទួលស្វាគមន៍ក្រុមភ្ញៀវណាហ្គាវើល នាម៉ោង៦ល្ងាចនៅកីឡដ្ឋាន RSN។
នាការប្រកួតសប្តាហ៍ទី៣កន្លងទៅ ណាហ្គាវើលបានយកឈ្នះក្រុមអង្គរថាយហ្គឺរក្នុងលទ្ធផល ៣-០ នៅពហុកីឡដ្ឋានជាតិ ដើម្បីឈរលេខរៀងទី២បណ្តោះអាសន្នដោយមាន៧ពិន្ទុ។ ចំណែកភ្នំពេញក្រោន បានបញ្ចប់ដោយគ្មានការស៊ុតបញ្ចូលទីជាមួយក្រុមចំណូលថ្មីវិសាខា នៅលើទឹកដីវេស្ទើន ដែលជាទឹកដីបណ្តោះអាសន្នរបស់វិសាខា។ បច្ចុប្បន្នភ្នំពេញក្រោនកំពុងឈរលេខរៀងទី៤ ដោយមាន៧ពិន្ទុស្មើណាហ្គាវើល តែចាញ់គ្រាប់បាល់ចំណេញ។
ក្រៅពីគូជក់ចិត្តខាងលើ ក្រុមជើងឯកឆ្នាំចាស់បឹងកេត ប្រជែងជាមួយក្រុមចំណូលថ្មីសូលទីឡូអង្គរ នាម៉ោង៣:៣០នាទីរសៀលនៅពហុកីឡដ្ឋានជាតិ។ នាការប្រកួតសប្តាហ៍មុនក្រុមទាំងពីរសុទ្ធតែបានយកឈ្នះគូប្រកួតរៀងៗខ្លួន ក្នុងនោះបឹងកេតលត់ក្រុមអគ្គស្នងការនគរបាលជាតិក្នុងលទ្ធផល ៥-១ ខណៈសូលទីឡូអង្គរលត់វេស្ទើនភ្នំពេញ ៤-១។ បច្ចុប្បន្នបឹងកេតកំពុងឈរកំពូលបណ្តោះអាសន្នក្នុងសប្តាហ៍ទី៣ ដោយមាន៩ពិន្ទុ រីឯសូលទីឡូអង្គរឈរលេខរៀងទី៨ដោយមាន៣ពិន្ទុ។
នៅពហុកីឡដ្ឋានជាតិនាម៉ោង៦:៣០នាទីល្ងាច ក្រុមចំណូលថ្មីវិសាខា ដែលកំពុងឈរលេខរៀងទី៣ជាមួយពិន្ទុត្រូវតទល់ជាមួយក្រុមអាស៊ីអឺរ៉ុប ដែលឈរលេខរៀងទី៩ដោយមាន៣ពិន្ទុ។ សម្រាប់៣ប្រកួតកន្លងមក វិសាខាមិនដែលស្គាល់ពាក្យបរាជ័យនោះទេ ដោយយកឈ្នះអគ្គិសនី ៤-០ ក្នុងជំនួបបើកឆាក ហើយបានបន្តឈ្នះអង្គរថាយហ្គឺរ ២-០ ក្នុងជំនួបទី២ មុនពួកគេស្មើ ០-០ ជាមួយភ្នំពេញក្រោន។ ចំណែក៣ប្រកួតរបស់អាស៊ីអឺរ៉ុបឈ្នះ១ចាញ់២ ក្នុងនោះឈ្នះសូលទីឡូអង្គរ ២-១ ចាញ់បឹងកេត ៤-៣ និងចាញ់ក្រសួងការពារជាតិ ២-១៕
Tag:
បាល់ទាត់
Cambodian League 2018
© រក្សាសិទ្ធិដោយ thmeythmey.com
