ស្វាយរៀងស្វាគមន៍អង្គរថាយហ្គឺរ ក្រោយទ័ពជួបវេស្ទើន និងអគ្គិសនីប៉ះប៉ូលិស

កីឡាជាតិ

ជាតិ

ស្វាយរៀងស្វាគមន៍អង្គរថាយហ្គឺរ ក្រោយទ័ពជួបវេស្ទើន និងអគ្គិសនីប៉ះប៉ូលិស

08, Apr 2018 , 8:19 pm

រូបភាព

សកម្មភាពប្រកួតនៅពហុកីឡដ្ឋានជាតិ ដែលអាស៊ីអឺរ៉ុបយកឈ្នះវិសាខា ២-០ កាលពីថ្ងៃទី៧ ខែមេសា

ដោយ:

នៅថ្ងៃអាទិត្យ ទី៨ ខែមេសា ឆ្នាំ២០១៨នេះ ក្រុមព្រះខ័នរាជស្វាយរៀង (ស្វាយរៀង) ត្រូវបើកទ្វារកីឡដ្ឋានរបស់ខ្លួន ស្វាគមន៍ក្រុមភ្ញៀវអង្គរថាយហ្គឺរ សម្រាប់ជំនួបក្របខណ្ឌលីគកំពូលកម្ពុជា នាម៉ោង៦ល្ងាច។ ចំណែកក្រុមក្រសួងការពារជាតិ(ទ័ព) ប្រើពហុកីឡដ្ឋានជាតិ ទទួលវេស្ទើនភ្នំពេញ នាម៉ោង៣ កន្លះរសៀល ក្រោយក្រុមអគ្គិសនី តទល់ជាមួយក្រុមអគ្គស្នងការនគរបាលជាតិ(ប៉ូលិស) នាម៉ោង៣រសៀល នៅកីឡដ្ឋានអគ្គិសនី។

ក្រោយលត់ក្រុមអគ្គិសនីកម្ពុជា ៥-១ កាលពីសប្តាហ៍មុន ក្រុមព្រះខ័នរាជស្វាយរៀងដែលមិនទាន់ស្គាល់ចាញ់ ត្រូវតទល់ជាមួយក្រុមដែលបរាជ័យ៣ប្រកួតជាប់គ្នាអង្គរថាយហ្គឺរ សម្រាប់ការប្រកួតសប្តាហ៍ទី៤ នៃក្របខណ្ឌលីគកំពូលកម្ពុជា នាម៉ោង៦ល្ងាច នៅកីឡដ្ឋានខេត្តស្វាយ។ បីប្រកួតកន្លងមក ស្វាយរៀងបញ្ចប់ក្នុងលទ្ធផលឈ្នះ១ ស្មើ២ ក្នុងនោះបញ្ចប់ដោយគ្មានការស៊ុតបញ្ជូលទីជាមួយណាហ្គាវើល និងអគ្គស្នងការនគរបាលជាតិ ក្នុងជំនួបទី១ និងទី២ មុនយកឈ្នះ ៥-១ លើអគ្គិសនីក្នុងជំនួបទី៣។

ចំណែកក្រុមមានមូលដ្ឋាននៅខេត្តសៀមរាបអង្គរថាយហ្គឺរ មិនទាន់ស្គាល់ជ័យជម្នះនៅឡើយសម្រាប់៣ប្រកួតកន្លងមក។ នាការប្រកួតបើកឆាក អង្គរថាយហ្គឺរបានចាញ់ក្រុមទ័ព ក្នុងលទ្ធផល ១-០ ហើយបានបន្តចាញ់វិសាខា ២-០ និងណាហ្គាវើល ៣-០ ជាបន្តបន្ទាប់។

ក្រៅពីជំនួបដ៏ជក់ចិត្តខាងលើ ពហុកីឡដ្ឋានជាតិ នឹងក្លាយជាទីតាំងកាត់សេចក្តី រវាងក្រុមទ័ព និងក្រុមវេស្ទើនភ្នំពេញ នាវេលាម៉ោង៣កន្លះរសៀល។ សម្រាប់ជំនួបកាលពីសប្តាហ៍មុនក្រុមទ័ព បានយកឈ្នះក្រុមអាស៊ីអឺរ៉ុប ក្នុងលទ្ធផល ២-១ ខណៈវេស្ទើនភ្នំពេញ ចាញ់ក្រុមចំណូលថ្មីសូលទីឡូអង្គរ ៤-១។

ជាមួយគ្នានេះនៅម៉ោង៣រសៀល ក្រុមមិនដែលស្គាល់ជ័យជម្នះអគ្គិសនីកម្ពុជា បើកទ្វារកីឡដ្ឋានរបស់ខ្លួន ទទួលស្វាគមន៍ក្រុមភ្ញៀវអគ្គស្នងការនគរបាលជាតិ។ សម្រាប់៣ប្រកួតកន្លងមក វេស្ទើនភ្នំពេញ ដែលកំពុងឈរបាតតារាង បានចាញ់ក្រុមចំណូលថ្មីវិសាខា ៤-០ រួចបន្តចាញ់ណហ្គាវើល ៥-១ និងព្រះខ័នរាជស្វាយរៀង ៥-១។ ចំណែក៣ប្រកួតរបស់ប៉ូលិស ឈ្នះ១ ស្មើ១ និងចាញ់១ ក្នុងនោះយកឈ្នះវេស្ទើន ៦-០ ក្នុងជំនួបបើកឆាក មុនបញ្ចប់ដោយគ្មានការស៊ុតបញ្ចូលទី ជាមួយស្វាយរៀងក្នុងជំនួបទី២ និងចាញ់បឹងកេត ៥-១ ជំនួបទី៣។

សម្រាប់ការប្រកួតកាលពីថ្ងៃសៅរ៍ ទី៧ មេសា ឆ្នាំ២០១៨ ក្រុមចំណូលថ្មីសូលទីឡូអង្គរបានបង្ហាញភាពខ្លាំង តាមរយៈយកស្មើ ០-០ ក្រុមជើងឯកឆ្នាំចាស់បឹងកេត នៅពហុកីឡដ្ឋានជាតិ។ នៅកីឡដ្ឋាន RSN ក្រុមណាហ្គាវើលបានយកឈ្នះក្រុមម្ចាស់ផ្ទះភ្នំពេញក្រោន ១-០ ដើម្បីឡើងឈរកំពូលតារាងបណ្តោះអាសន្នជាមួយ១០ពិន្ទុ។

ចំណែកក្រុមអាស៊ីអឺរ៉ុប បានធ្វើឲ្យទស្សនិកជនភ្ញាក់ផ្អើលយ៉ាងខ្លាំង តាមរយៈយកឈ្នះក្រុមខ្លាំងវិសាខាក្នុងលទ្ធផល ២-០ នៅលើទឹកដីនៃពហុកីឡដ្ឋានជាតិ។ ជ័យជម្នះនេះមានន័យថា អាស៊ីអឺរ៉ុបជាក្រុមទី១ដែលធ្វើឲ្យវិខាសាស្គាល់បរាជ័យជាលើកដំបូង។ សម្រាប់៣ប្រកួតកន្លងមកវិសាខាមិនដែលស្គាល់បរាជ័យនោះឡើយ ពោលគឺឈ្នះ២ និងស្មើ១៕