ជាតិ
ទណ្ឌិតជាង៣០០នាក់ នឹងត្រូវបានលើកលែងនិងបន្ថយទោស ក្នុងពិធីចូលឆ្នាំខ្មែរ
លោក ជិន ម៉ាលីន អ្នកនាំពាក្យក្រសួងយុត្តិធម៌ ផ្តល់បទសម្ភាស់ដល់អ្នកកាសែតនាពេលកន្លងមក
×![]()
ដោយ: សារព័ត៌មានថ្មីៗ
អ្នកទោស៣២១នាក់ (ស្រី២៨នាក់) ត្រូវបានក្រសួងយុត្តិធម៌ បញ្ជូលទៅក្នុងបញ្ជីលើកលែងទោសនិងបន្ធូរបន្ថយទោស ក្នុងពិធីចូលឆ្នាំថ្មីប្រពៃណីខ្មែរខាងមុខនេះ។ ក្នុងចំណោមអ្នកទោសទាំងនោះ ក៏មានអ្នកទោសជាជនបរទេសប្រមាណជា១០ភាគរយផងដែរ។
លោក ជិន ម៉ាលីន អ្នកនាំពាក្យក្រសួងយុត្តិធម៌ បានប្រាប់សារព័ត៌មានថ្មីៗ តាមទូរសព្ទថា ក្រសួងយុត្តិធម៌ នឹងបញ្ជូនបញ្ជីឈ្មោះអ្នកទោសទាំង៣២១នាក់ ទៅកាន់ប្រមុខរដ្ឋាភិបាល ហើយបន្ទាប់មក ប្រមុខរដ្ឋាភិបាល នឹងថ្វាយទៅព្រះមហាក្សត្រ ដើម្បីព្រះអង្គ ឡាយព្រះហត្ថលេខាលើកលែងទោស និងបន្ធូរបន្ថយទោស។ លោក បន្តថា អ្នកដែលត្រូវបានលើកលែងទោស គឺជាអ្នកដែលបានជាប់ពន្ធនាគាររយៈពេល២ភាគ៣ ហើយអ្នកដែលត្រូវបានបន្ធូរបន្ថយទោស គឺជាអ្នកដែលបានជាប់ពន្ធនាគាររយៈពេលពេល១ភាគ៣។
អ្នកនាំពាក្យក្រសួងយុត្តិធម៌រូបនេះ បញ្ជាក់ដូច្នេះថា៖«មិនប្រាកដថា ឲ្យតែពួកគាត់ ជាប់ឃុំបាន២ភាគ៣ គឺទទួលបានការលើកលែងទោស ហើយជាប់ឃុំបាន១ភាគ៣ គឺទទួលបានការបន្ធូរបន្ថយទោសនោះទេ។ ទាល់តែយើង វាយតម្លៃទៅឃើញថា អ្នកទោសទាំងនោះ មានអត្តចរិតល្អ និងបានកែប្រែខ្លួនដែរ ទើបមានឱកាសទទួលបានការលើកលែងទោស និងការបន្ធូរបន្ថយទោស»។
យ៉ាងណាក៏ដោយ មន្ត្រីជាន់ខ្ពស់នៃក្រសួងយុត្តិធម៌ខាងលើ មិនទាន់អាចបញ្ជាក់បាននោះទេ ថា ក្នុងចំណោមអ្នកទោសទាំង៣២១នាក់ មានអ្នកទោសប៉ុន្មាននាក់ នឹងត្រូវលើកលែងទោស ហើយអ្នកទោសប៉ុន្មាននាក់ នឹងត្រូវបន្ធូរបន្ថយទោស៕
Tag:
ចូលឆ្នាំ
អ្នកទោស
© រក្សាសិទ្ធិដោយ thmeythmey.com
