ផ្សារទំនើបអ៊ីអន ចាប់ផ្តើមគិតកម្រៃ៤០០រៀលសម្រាប់ថង់ប្លាស្ទិក១

ជាតិ

ផ្សារទំនើបអ៊ីអន ចាប់ផ្តើមគិតកម្រៃ៤០០រៀលសម្រាប់ថង់ប្លាស្ទិក១

10, Apr 2018 , 8:33 pm

រូបភាព

ដោយ:

ភ្នំពេញ៖ ផ្សារទំនើបអ៊ីអន ចាប់ផ្ដើមគិតកម្រៃចំនួន ៤០០រៀលសម្រាប់ថង់ប្លាស្ទិក១ ចាប់ពីថ្ងៃទី១០ខែមេសានេះតទៅ។ នេះបើតាមសេចក្ដីជូនដំណឹងរបស់ផ្សារទំនើបមួយនេះ ដែលផ្សព្វផ្សាយនៅលើទំព័រហ្វេសប៊ុករបស់ក្រសួងបរិស្ថាន។

រដ្ឋាភិបាលបានចេញអនុក្រឹត្យមួយស្ដីពីការគ្រប់គ្រង់ថង់ប្លាស្ទិក ដើម្បីកាត់បន្ថយការប្រើប្រាស់ថង់ប្លាស្ទិក ដែលត្រូវចូលជាធរមានអនុវត្តចាប់ពីថ្ងៃទី១០ខែមេសានេះតទៅ។ បើតាម លោក ហេង ណារ៉េត អគ្គនាយកនៃអគ្គនាយកដ្ឋានគាំពារបរិស្ថាន ការយកកម្រៃបន្ថែមលើការប្រើប្រាស់ថង់ប្លាស្ទិក គឺត្រូវអនុវត្តនៅតាមបណ្ដាផ្សារទំនើប និងមជ្ឈមណ្ឌលពាណិជ្ជកម្ម។

លោក ណារ៉េត បន្ថែមថា ប្រកាសអន្តរក្រសួងបានកំណត់ឲ្យយកកម្រៃបន្ថែមជាអប្បបរមាគឺ ៤០០រៀលក្នុងថង់មួយ ដោយកម្រៃនេះត្រូវដាក់បញ្ចូលក្នុងវិក័យបត្រជូនអតិថិជន ហើយទឹកប្រាក់នោះបានទៅផ្សារទំនើប។

ប៉ុន្តែលោកបញ្ជាក់ថា ការយកកម្រៃនេះគឺអនុវត្តតែទៅលើថង់ប្លាស្ទិកទំហំទទឹងតូចជាង ២៥សង់ទីម៉ែត្រ និងកម្រាស់ ០,០៣មីលីម៉ែត្រប៉ុណ្ណោះ។ លោក ហេង ណារ៉េត មិនអាចបញ្ជាក់បានថាតើផ្សារទំនើបណាខ្លះដែលចាប់ផ្ដើមអនុវត្តតាមអនុក្រឹត្យនេះនោះទេ ដោយលោកប្រាប់ថាទើបតែទទួលដំណឹងពីផ្សារអ៊ីអនមួយប៉ុណ្ណោះ។ តែការមិនអនុវត្តតាមអនុក្រឹត្យនេះ ផ្សារទំនើបនឹងប្រឈមការអនុវត្តទោសទណ្ឌនានា។ នេះបើតាមលោក ណារ៉េត ។

ទោះយ៉ាងណាលោក ហេង ណារ៉េត អះអាងថា ការយកកម្រៃបន្ថែមនេះ មិនមានន័យថារដ្ឋាភិបាលអនុញ្ញាតឲ្យផ្សារទំនើបទាំងនោះស្វែងផលចំណេញបន្ថែមពីកម្រៃទាំងនេះឡើយ តែជាសារដាស់តឿនដល់សាធារណជនអំពីហេតុប៉ះពាល់បរិស្ថាន ដែលបណ្ដាលពីការប្រើប្រាស់ថង់ប្លាស្ទិក៕