លោក សម រង្ស៊ី ទៅជប៉ុន ដើម្បីសុំឲ្យជួយកែប្រែស្ថានភាពនៅកម្ពុជា មុនការបោះឆ្នោតមកដល់

ជាតិ

លោក សម រង្ស៊ី ទៅជប៉ុន ដើម្បីសុំឲ្យជួយកែប្រែស្ថានភាពនៅកម្ពុជា មុនការបោះឆ្នោតមកដល់

11, Apr 2018 , 11:19 am

រូបភាព

លោក សម រង្ស៊ី ផ្តល់បទសម្ភាស់ដល់អ្នកកាសែត ក្រោយទៅដល់ប្រទេសជប៉ុន នៅថ្ងៃទី១0 ខែមេសា ឆ្នាំ២0១៨

ដោយ: ថ្មីៗ

លោក សម រង្ស៊ី និងលោកស្រី ជូឡុង សូមួរ៉ា ដែលជាភរិយារបស់លោក រួមទាំងសហការីផ្សេងទៀត បានទៅដល់ប្រទេសជប៉ុន នៅថ្ងៃ១០ មេសា ឆ្នាំ២០១៨ ដើម្បីស្វែងរកអន្តរាគមន៍ ចំពោះស្ថានការណ៍នៅកម្ពុជា។ ក្រោយចុះពីយន្តហោះ លោក សម រង្ស៊ី អតីតប្រធានគណបក្សសង្គ្រោះជាតិ និងបច្ចុប្បន្នជាប្រធានចលនាសង្គ្រោះជាតិ បានឆ្លៀតផ្តល់បទសម្ភាសប្រមាណជាង១០នាទី ដល់អ្នកកាសែត ជុំវិញដំណើររបស់លោកទៅកាន់ប្រទេសជប៉ុន។

លោក សម រង្ស៊ី បានប្រាប់អ្នកកាសែតថា ជប៉ុនជាប្រទេសមួយ ដែលតែងតែជួយអភិវឌ្ឍប្រទេសកម្ពុជាលើវិស័យជាច្រើន រួមទាំងប្រជាធិបតេយ្យ សិទ្ធិមនុស្ស និងការបោះឆ្នោត។ ហេតុដូច្នេះ លោក ជឿជាក់ថា សម្រាប់ស្ថានការណ៍បច្ចុប្បន្ននេះ ជប៉ុន ក៏នៅតែអាចកែលម្អប្រជាធិបតេយ្យនៅកម្ពុជាឡើងវិញដែរ ហើយជាពិសេសជួយឲ្យគណបក្សសង្គ្រោះជាតិ បានចូលរួមការបោះឆ្នោត នៅថ្ងៃទី២៩ ខែមេសា ឆ្នាំ២០១៨។

លោក សម រង្ស៊ី បាននិយាយជាភាសាអង់គ្លេស ដោយមានន័យជាភាសាខ្មែរ យ៉ាងដូច្នេះថា៖«យើង នឹងសុំឲ្យជប៉ុនជួយ។ ខ្ញុំគិតថាជប៉ុនប្រហែលជាគិតគូររួចហើយថា នឹងធ្វើយ៉ាងម៉េច ដើម្បីធានាការបោះឆ្នោតនៅកម្ពុជា ឲ្យប្រព្រឹត្តទៅដោយសេរី និងត្រឹមត្រូវ ដោយមានការចូលរួមរបស់បក្សប្រឆាំង។ បើគ្មានបក្សប្រឆាំង ការបោះឆ្នោតនឹងគ្មានន័យ ហើយគ្មានប្រយោជន៍នោះទេ»។

លោក សុខ ឥសាន អ្នកនាំពាក្យគណបក្សប្រជាជនកម្ពុជា អះអាងជាមុនថា បំណងរបស់លោក សម រង្ស៊ី ដែលចង់ឲ្យប្រទេសជប៉ុន ជួយក្រុមប្រឆាំងរបស់លោក នឹងមិនបានសម្រេចឡើយ។ លោក បានលើកឡើងថា ប្រទេសជប៉ុន នៅតែមានជំហរគាំទ្ររដ្ឋាភិបាលកម្ពជា និងលើកកម្ពស់លទ្ធិប្រជាធិបតេយ្យនៅកម្ពុជាដដែល។

អ្នកនាំពាក្យបក្សកាន់អំណាចរូបនេះ បានសរសេរសារទៅកាន់អ្នកកាសែត តាមបណ្តាញទំនាក់ទំនងតេឡេក្រាមយ៉ាងដូច្នេះថា៖«ក្តីសង្ឃឹម [របស់លោក សម រង្ស៊ី] គ្មានឡើយ ដោយសារជប៉ុន បានសម្រេចបន្តជួយកម្ពុជា ដោយបន្ថែមជំនួយឲ្យកម្ពុជា និង គ.ជ.ប.»។

ក្រុមប្រឆាំង បានទទួលជោគជ័យខ្លះ ក្នុងការជំរុញឲ្យសហគមន៍អន្តរជាតិនានា ដាក់ទណ្ឌកម្មមកលើរដ្ឋាភិបាលកម្ពុជា។ ប៉ុន្តែ ប្រទេសជប៉ុន ហាក់មានជំហររឹងមាំជាមួយរដ្ឋាភិបាលកម្ពុជា ដោយមិនទាន់មានប្រតិកម្ម ឬថ្កោលទោស មកលើរដ្ឋាភិបាលកម្ពុជា តាមសំណើរបស់ក្រុមប្រឆាំងនោះទេ។

ផ្ទុយទៅវិញ ប្រទេសជប៉ុន នៅតែបន្តជួយកិច្ចការផ្នែកការបោះឆ្នោតនៅកម្ពុជា។ ថ្មីៗនេះ ប្រទេសជប៉ុន បានសន្យាថា នឹងផ្តល់ហិបឆ្នោត សម្រាប់បម្រើឲ្យការបោះឆ្នោតនៅកម្ពុជា នាពេលខាងមុខ។ លើសពីនេះ អ្នកជំនាញរបស់ជប៉ុន នៅតែសហការជាមួយគណៈកម្មាធិការជាតិរៀបចំការបោះឆ្នោត (គ.ជ.ប.) ដោយមិនទាន់ដកខ្លួននៅឡើយទេ៕