ជាតិ
សេដ្ឋកិច្ច
ADB៖ សេដ្ឋកិច្ចកម្ពុជានៅបន្តវិជ្ជមាននៅឆ្នាំនេះ តែគួរកែលម្អនីតិវិធីធ្វើធុរកិច្ច ភ្នំពេញ៖ ធនាគារអភិវឌ្ឍន៍អាស៊ី (ADB) បានព្យាករសេដ្ឋកិច្ចកម្ពុជានៅឆ្នាំ២០១៨ និងឆ្នាំ២០១៩ ថា កម្ពុជានឹងនៅតែបន្តមានភាពវិជ្ជមាន ជាមួយកំណើនរឹងមាំ ៧ភាគរយ។ ប៉ុន្តែរបាយការណ៍របស់ ADB លើកឡើងថា ការព្យាករនេះនឹងប្រែប្រួល បើសិនហានិភ័យដែលអាចរំពឹងទុក កើតមានឡើង។ ADB បានណែនាំឲ្យកម្ពុជាកែលម្អនីតិវិធីធ្វើធុរកិច្ចរបស់ខ្លួន ដើម្បីទាក់ទាញវិនិយោគទុនបន្ថែមទៀត។
តាមរយៈការព្យាករកំណើនសេដ្ឋកិច្ចអាស៊ី ដែលមានកម្ពុជាផងនោះ ADB បានផ្ដល់ទឡ្ហីករណ៍លើកំណើនសេដ្ឋកិច្ចកម្ពុជា នៅថ្ងៃទី១១ មេសាដូច្នេះថា៖« វិស័យឧស្សាហកម្មទំនងជាមានកំណើន ៩,៦ភាគយ បើទោះបីវិស័យកាត់ដេរថមថយ តែទូទាត់កាត់កងមកវិញដោយកំណើនខ្ពស់ជាងមុននូវផលិតផលដែលទើបលេចរូបរាងថ្មីៗដូចជា គ្រឿងអគ្គិសនី គ្រឿងបន្លាស់រថយន្ត កង់ រួមទាំងការនាំចេញអង្ករ និងកៅស៊ូ»។
ប៉ុន្តែរបាយការណ៍របស់ ADB បានក្រើនរំលឹកពីផលប៉ះពាល់ដល់ការប្រកួតប្រជែងក្នុងវិស័យឧស្សាហកម្មរបស់កម្ពុជានៅលើទីផ្សារអន្តរជាតិ ដោយសារការដំឡើងប្រាក់ឈ្នួលគោលយ៉ាងឆាប់រហ័ស ខណៈសមត្ថភាពផលិតនៅតែមានកម្រិតទាប។
ងាកមកវិស័យសេវាកម្មវិញ ADB វាយតម្លៃថា អាចនឹងមានកំណើន ៧,១ភាគរយដូចឆ្នាំមុនដែរ ជាមួយការបន្តរឹងមាំនៃវិស័យទេសចរណ៍។ រីឯវិស័យកសិកម្ម គួរតែមានកំណើនប្រមាណ ១,៨ភាគរយ។
អតិផរណានឹងកើនឡើងដល់ ៣,២ភាគរយ នៅឆ្នាំនេះ និង ៣,៥ភាគរយនៅឆ្នាំ២០១៩។ ឱនភាពពាណិជ្ជកម្មនឹងបន្តមានកម្រិតខ្ពស់ ដោយសារតម្លៃទំនិញនាំចូលមានការកើនឡើង។នេះបើតាមរបាយការណ៍ខាងលើ។
ទស្សនវិស័យសេដ្ឋកិច្ចខាងលើនេះ អាចមិនសម្រេចបានតាមការព្យាករ បើហានិភ័យកើតឡើងចំពោះសេដ្ឋកិច្ចកម្ពុជា។ ហានិភ័យពីការរឹតបណ្តឹងអត្រាការប្រាក់នៅសហរដ្ឋអាមេរិកក្នុងល្បឿនលឿនជាងការរំពឹងទុក និងការកើនឡើងនូវភាពចលាចលក្នុងទីផ្សារហិរញ្ញវត្ថុអន្តរជាតិ (ដែលអាចប៉ះពាល់ដល់ការវិនិយោគមកកម្ពុជា និងប្រភពហិរញ្ញវត្ថុដែលធនាគារនៅកម្ពុជាខ្ចីពីក្រៅ)។
ADB បន្តថា កំណើនតម្លៃប្រេង ដែលកើតឡើងដោយពុំបានរំពឹងទុកជាមុន ក៏ជាហានិភ័យផងដែរ។ ក្រៅពីហានិភ័យខាងក្រៅ ភាពមិនប្រាកដប្រជា ដែលអាចកើតឡើងក្នុងអំឡុងការបោះឆ្នោតនៅកម្ពុជា គឺជាហានិភ័យខាងក្នុង។
ក្រៅពីការព្យាករកំណើនសេដ្ឋកិច្ច ADB បានណែនាំឲ្យកម្ពុជាកែលម្អនីតិវិធីធ្វើអាជីកកម្ម ដើម្បីភាពលូតលាស់ និងការធ្វើពិពិធកម្មសេដ្ឋកិច្ចរបស់ខ្លួន។ យោងតាមធនាគារពិភពលោក កម្ពុជា គឺឈរនៅលេខរៀងទី ១៣៥ ឯណោះ ក្នុងចំណោមប្រទេស ១៩០ ដែលបង្ហាញពីផលលំបាកចំពោះនីតិវិធីធ្វើធុរកិច្ច។ ផលលំបាក៣សំខាន់គឺ ការចាប់ផ្ដើមបង្កើតធុរកិច្ច ការទទួលលិខិតអនុញ្ញាតសាងសង់ និងការអនុវត្តកិច្ចសន្យា ដែលអ្នកតាក់តែងគោលនយោបាយគួរកែសម្រួលត្រង់ចំណុចទាំងនេះ៕
Tag:
កំណើនសេដ្ឋកិច្ច
ធុរកិច្ច
© រក្សាសិទ្ធិដោយ thmeythmey.com