World Cup៖ ម្ចាស់ការពារតំណែងជើងឯក អាល្លឺម៉ង់តាមប្រមាញ់យកពានលើកទី៥

កីឡាអន្តរជាតិ

អន្តរជាតិ

World Cup៖ ម្ចាស់ការពារតំណែងជើងឯក អាល្លឺម៉ង់តាមប្រមាញ់យកពានលើកទី៥

13, Apr 2018 , 7:59 am

រូបភាព

ដោយ: ថ្មីៗ

ម្ចាស់ជើងឯក៤សម័យកាល អាល្លឺម៉ង់ ដែលជាក្រុមធ្លាប់ឈ្នះពានរង្វាន់កីឡាបាល់ទាត់ពិភពលោកច្រើនជាងគេទី២បន្ទាប់ពីប្រេស៊ីល បានកៅអីទៅកាន់ការប្រកួតដណ្តើមពានរង្វាន់ FIFA World Cup ឆ្នាំ២០១៨ នៅរុស្ស៊ី ស្ថិតនៅក្នុងពូល F ត្រូវជួបជាមួយ ម៉ិកស៊ិក ស៊ុយអែត និងកូរ៉េខាងត្បូង។

គ្រូបង្វឹក៖ លោក Joachim Low (អាល្លឺម៉ង់)

លោក Low គឺជាគ្រូបង្វឹករបស់អាល្លឺម៉ង់តាំងពីឆ្នាំ ២០០៦ មកម្ល៉េះដែលពីមុនធ្លាប់ជាជំនួយការរបស់លោក Jurgen Klinsmann។

គ្រូសញ្ជាតិអាល្លឺម៉ង់ វ័យ៥៨ឆ្នាំរូបនេះ បានដឹកនាំក្រុមរហស្សនាមឥន្ទ្រីដែកទទួលបានជោគជ័យយ៉ាងធំធេងក្នុងរយៈពេលជាងមួយទសវត្សរ៍ចុងក្រោយ ជាមួយនឹងការឈ្នះពានរង្វាន់ World Cup ក្នុងឆ្នាំ ២០១៤ និងឈ្នះពានរង្វាន់ FIFA Confederations Cup ជាមួយនឹងក្រុមយុវជននៅឆ្នាំ ២០១៧។

កីឡាករឆ្នើម៖ Toni Kroos

Kroos ជាខ្សែបម្រើកណ្តាលដ៏មានឥទ្ធិពលម្នាក់ និងជាតួអង្គសំខាន់មួយរូបរបស់ក្រុមក្នុងការឈ្នះពានរង្វាន់ពិភពលោកលើកទី៤ឲ្យអាឡឺម៉ង់នៅក្នុងឆ្នាំ២០១៤ ដែលប្រេស៊ីលធ្វើជាម្ចាស់ផ្ទះនោះ។ សមាជិករបស់ក្រុមយក្សអេស្ប៉ាញ វ័យ២៨ឆ្នាំរូបនេះ ធ្លាប់ឈ្នះពានរង្វាន់ UEFA Champions League ជាមួយ Bayern Munich និង Real Madrid ទៀតផង។

ប្រវត្តិក្នុង World Cup៖

នេះជាវត្តមានលើកទី ១៩ ហើយ សម្រាប់ក្រុមជម្រើសជាតិអាល្លឺម៉ង់នៅក្នុងព្រឹត្តិការណ៍កីឡាបាល់ទាត់ពិភពលោក និងជាប្រទេសស្ថិតនៅតំបន់អឺរ៉ុបដែលមានមុខក្នុងពានរង្វាន់នេះច្រើនជាងគេផងដែរ បន្តាប់ពីចូលរួមលើកដំបូងក្នុងឆ្នាំ ១៩៣៤ និង២០១៥។ លទ្ធផលល្អបំផុតដែលពួកគេទទួលបានគឺលើកពាន World Cup ៤ដង ក្នុងឆ្នាំ១៩៥៤, ១៩៧៤, ១៩៩០ និង២០១៤ និងរងជើងឯក៤លើកផងដែរ។ ក្រុមរហស្សនាមឥន្ទ្រីដែក ស្ថិតនៅចំណាត់ថ្នាក់ទី១ពិភពលោក ក្នុងតារាង FIFA Ranking។