ខ្មែរក្រហម
ជាតិ
នយោបាយជាតិ
លោក យឹម សុវណ្ណ៖បាតុកម្មប៉ុន្មានដងក៏ដោយ លោក កឹម សុខា រក្សាការមិនសុំទោស លោក ជុំ ម៉ី តំណាងជនរងគ្រោះរបបខ្មែរក្រហមទាមទារឲ្យលោក កឹម សុខា ធ្វើការសុំទោសនូវអ្វីដែលខ្លួនបាននិយាយ
× មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ បានអត្ថាធិបាយនៅថ្ងៃទី៣១ ខែឧសភានេះថា ប្រធានស្ដីទីគណបក្ស លោក កឹម សុខា នៅតែរក្សាជំហររបស់ខ្លួនដោយមិនសុំទោសអ្នករងគ្រោះជាដាច់ខាត ទោះបីជាមានរលកមហាបាតុកម្មប៉ុន្មានដងពីក្រុមជនរងគ្រោះនៃរបបខ្មែរក្រហមប្រឆាំងរូបលោកក៏ដោយ។
លោក យឹម សុវណ្ណ បានបញ្ជាក់ថា គ្មានអ្វីដែលត្រូវឲ្យលោក កឹម សុខា ចេញមុខសុំទោសនោះទេ ព្រោះលោកមិនមែនជាអ្នកកាប់សម្លាប់ ឬធ្វើបាបប្រជាជនខ្មែរនៅក្នុងសម័យខ្មែរក្រហមឡើយ ហើយថា ចំពោះករណីគុកទួលស្លែងវិញនោះ លោក កឹម សុខា ក៏ធ្លាប់បានស្រាយបំភ្លឺទៅកាន់សាធារណជន ក៏ដូចជាជនរងគ្រោះរួចរាល់ហើយថា លោកមិនដែលបាននិយាយថា គុកទួលស្លែងជាគុកសិប្បនិម្មិតនោះឡើយ។
ទោះបីជាយ៉ាងណាក៏ដោយ លោក ជុំ ម៉ី ប្រធានសមាគមជនរងគ្រោះដោយរបបខ្មែរក្រហម និងជាអតីតអ្នកជាប់គុកនៅមន្ទីរស២១ ឬគុកទួលស្លែងនោះ បានអត្ថាធិប្បាយថា សមាគមរបស់លោកបានសម្រេចដាក់ឱសានវាទចំនួន១០ថ្ងៃដល់ លោក កឹម សុខា ដើម្បីធ្វើការពិចារណាចេញមុខសុំទោសជាសាធារណៈដល់ប្រជាជនកម្ពុជា ជាពិសេសអ្នកសេសសល់ពីការធ្វើទារុណកម្មក្នុងមន្ទីរស២១ ដែលលោកបានហៅថាជាគុកសិប្បនិម្មិតនោះ។
គិតមកត្រឹមថ្ងៃទី៣១ ខែឧសភានេះ គឺនៅសល់រយៈពេលតែ៣ថ្ងៃទៀតប៉ុណ្ណោះ ពោលគឺពេលវេលារបស់លោក កឹម សុខា ដែលក្រុមជនរងគ្រោះនៃរបបខ្មែរក្រហមដាក់ឱសានវាទឲ្យនោះនឹងត្រូវដល់កំណត់ហើយ។
បើតាម លោក ជុំ មី ប្រសិនបើដល់ថ្ងៃកំណត់ហើយ លោក កឹម សុខា នៅតែរឹងទទឹងមិនសុំទោសជនរងគ្រោះទៀតនោះ លោកនឹងដឹកនាំប្រជាពលរដ្ឋខ្មែរប្រមាណជាងមួយម៉ឺននាក់ធ្វើបាតុកម្មនៅមុខទីស្នាក់ការគណបក្សសង្គ្រោះជាតិ និងនៅមុខគុកទួលស្លែង។
បច្ចុប្បន្នលោក កឹម សុខា កំពុងបំពេញទស្សនកិច្ចនៅសហរដ្ឋអាមេរិក ហើយបើតាមការបញ្ជាក់របស់លោក យឹម សុវណ្ណ ប្រធានស្តីទីគណបក្សសង្គ្រោះជាតិរូបនេះ នឹងធ្វើមាតុភូមិនិវត្តន៍មកកម្ពុជាវិញនាថ្ងៃទី៣ ខែមិថុនា ខាងមុខនេះ៕
© រក្សាសិទ្ធិដោយ thmeythmey.com