កីឡាជាតិ
ជាតិ
U16 នារីកម្ពុជាបានបញ្ចប់បេសកកម្មក្នុងព្រឹត្តិការណ៍ AFF U16 Girl នៅឥណ្ឌូណេស៊ី
× ក្រុមកីឡាការិនីជម្រើសជាតិអាយុក្រោម១៦ឆ្នាំកម្ពុជាបានបញ្ចប់បេសកកម្មក្នុងព្រឹត្តិការណ៍ AFF U16 Girl Championship របស់ខ្លួនកាលពីថ្ងៃទី៦ ឧសភា ឆ្នាំ២០១៨ ជាមួយលទ្ធផលឈរបាតតារាងប្រចាំពូល B ក្រោយបរាជ័យ៣ប្រកួតជាប់ៗគ្នា។ ប៉ុន្តែព្រឹត្តិការណ៍ដែលរៀបចំដោយសហព័ន្ធកីឡាបាល់ទាត់អាស៊ានមួយនេះ មិនទាន់ចប់ការប្រកួតរបស់ខ្លួននៅឡើយទេ។
ក្រោយបរាជ័យ៣ប្រកួតជាប់ៗគ្នា នាការប្រកួតវគ្គជម្រុះក្នុងពូល B នាំក្រុមកីឡាការិនីជម្រើសជាតិអាយុក្រោម១៦ឆ្នាំកម្ពុជាបានបាត់បង់ឱកាសឡើងទៅវគ្គបន្តនៃព្រឹត្តិការណ៍ AFF U16 Girl Championship ប្រចាំឆ្នាំ២០១៨ ដែលរៀបចំនៅឥណ្ឌូណេស៊ី។ ក្នុងនោះកម្ពុជាបានចាញ់ឡាវក្នុងលទ្ធផល ៣-១ ក្នុងជំនួបបើកឆាក ហើយបានបន្តចាញ់ម្ចាស់ផ្ទះឥណ្ឌូណេស៊ី ២-០ ក្នុងជំនួបទី២ និងចាញ់ថៃ ៤-០ ក្នុងជំនួបចុងក្រោយ។
ការបរាជ័យជាបន្តបន្ទាប់នេះ ធ្វើឲ្យកម្ពុជាបញ្ចប់ក្នុងចំណាត់ថ្នាក់បាតតារាងប្រចាំពូល B ដោយមានសូន្យពិន្ទុ។ ដូច្នេះកម្ពុជាត្រូវបញ្ចប់បេសកកម្មរបស់ខ្លួនពីព្រឹត្តិការណ៍នេះត្រឹមជំនួបចុងក្រោយជាមួយថៃ កាលពីរសៀលថ្ងៃទី៦ ឧសភា ឆ្នាំ២០១៨។ មិនមែនមានតែកម្ពុជានោះទេ ដែលធ្លាក់ចេញពីពានរង្វាន់នេះ ម្ចាស់ផ្ទះឥណ្ឌូណេស៊ី ក៏ធ្លាក់ចេញពីការប្រកួតនេះដែរ ក្រោយឈរចំណាត់ថ្នាក់លេខ៣ក្នុងពូលដោយមាន៣ពិន្ទុ។
ក្រុមកីឡាការិនីជម្រើសជាតិអាយុក្រោម១៦ឆ្នាំថៃ នឹងដៃអ្នកជិតខាងឡាវ ឡើងទៅវគ្គពាក់កណ្តាលផ្តាច់ព្រ័ត្រព្រឹត្តិការណ៍ AFF U16 Girl Championship 2018 តំណាងឲ្យពូល ខណៈពូល A មិនទាន់រកឃើញជើងខ្លាំងនៅឡើយទេ ដោយពួកគេនៅសល់ពីរប្រកួតរៀងៗខ្លួន។ ព្រឹត្តិការណ៍ AFF U16 Girl Championship នឹងបញ្ចប់ការប្រកួតនៅថ្ងៃទី១៣ ឧសភា ខាងមុខនេះ៕
Tag:
បាល់ទាត់
U16 នារី
AFF U16 Girl
© រក្សាសិទ្ធិដោយ thmeythmey.com